1 Ndin Yoob amaabọọrọ Abọọñ ate:

2 "Ami mmediọọñọ ke afo amekeme adinam afịd ñkpọ;

ibaaha uduak mfo ndomokeed ekemeke edibiat.

3 Afo amaabịp, ‘Anie awo ido ami a-abiọọñọke mme uduak mmi ke unana ifiọk?’

Ke akpanikọ ami mmaatañ ikọ mbaña mme ñkpọ se imiikiñnwañake miin,

mme ñkpọ e-edooho ataa utịppeñkpọ ekan se ami ndiọọñọ.

4 "Afo amaabo, ‘Kpañ utọñ idahami, ndin ke ami ñyaatañ ikọ;

Ami ñyaubịp fiin mbuume,

ndin afo ayambọọrọ miin.’

5 Utọñ mmi amaakop ubaña fiin

ado idahami anyen mmi ukịt fiin.

6 Ke ntoro ami mmesua idem mmi

ndin mmenyʌñ ñkappa esịd ntie ke abu ye ke ntọñ."

7 Ke Abọọñ amaaketañ mme ñkpọ ami anọ Yoob ama, anye amaabo Elifas awo Teman, "Ami mmeyat esịd ye afo ye mme ufan mfo iba, ke ntak a-adooho afo utañña akpanikọ umbaña miin, nte awo mmi Yoob atañña. 8 Ndin idahami ndufo iben ñyaaraenañ itiaba mme akukịmedọñ itiaba inyʌñ ikaa ibịne awo mmi Yoob ikiwa ufọfọb uwa ibaña idem ndufo. Isʌñutom mmi Yoob ayaabọñ akam inọ ndufo, ndin ami ñyaakop akam amọ, ndin ami ndiinọọhọ ndufo ufen ñkeene ndisịme ido ndufo. Ndufo itañña akpanikọ imbaña miin, nte naña isʌñutom mmi Yoob atañ." 9 Ndin Elifas awo Teman, Bildad awo Suu mme Sofa a-atooho Naama emaenam se Abọọñ akebo ammọ enam; ndin Abọọñ amaabọ akam Yoob.

10 Ke Yoob amaakebọñ akam anọ mme ufan amọ ama, Abọọñ amaamaana anọ anye mme inie amọ anyʌñ anọ anye utịme ñkemba mme inie se anye akenenie akpa. 11 Afịd nditọeka amọ ideen ye ibaan ye afịd awo se ikidiọọñọ anye emaedi edidia ñkpọ ye anye ke ufọk amọ. Ammọ emaeseeme mme anye enyʌñ edọñ anye esịd ebaña afịd mme ñkpọntịppe se Abọọñ akenam nọ asịm anye, ammọ keedekeed emaenọ anye mbaak silfa keed ye ñkpannuun kold keed.

12 Abọọñ amaadiọñ utịd ini uwem Yoob akan ntọọñọ uwem amọ. Anye amaanie edọñ tọsịn duob mme inaañ (14,000), kamel tọsịn itiokeed (6,000), ñyaaraenañ e-enamma utom tọsịn keed (1,000) ye dọñki tọsịn keed (1,000). 13 Ndin anye amaanyʌñ anie nditọ ideen itiaba ye nditọ ibaan ita. 14 Anye akesio adiaha amọ Yemaima, udiana anye asio Kesia anyʌñ asio ayọhọ ita Keren-Hapuk. 15 Ikibaaha ke afịd isọñ ado nte ekekịt ibaan se ikiyaiya nte nditọ ibaan Yoob, ndin ete ammọ amaanọ ammọ udeeme inie ammọ ye nditọeka ammọ ideen.

16 Ke mme ñkpọ ami amaakeboiyo, Yoob amaadu uwem isua ikie keed mme aba (140); anye amaakịt nditọ ye nditọnditọ amọ tutu awuọ ayọhọ ubon inaañ. 17 Ndin Yoob amaakpa, akaanadeen anyʌñ ayọhọ ye isua.