1 "Ado idahami ammọ ensak miin,

mme ideen esịppe eñkan miin,

a-adooho ñkpekese mme ete ammọ nte idotto

edisịne ke atu udịm ewa edọñ mmi."

2 Nsoo ido ufọn adudu ubọk ammọ ke idem mmi,

sia inweek ammọ amaawuọ ammọ ke idem?

3 Idem adiọọk ammọ ato ke unana ye abiọọñ,

ammọ edutịn ekanna nsaad isọñ

ke mme mbiara isọñ nsobo ke akonayio.

4 Ke esịd ikọd ammọ ekpook mme inʌñ-inʌñ mfañ,

ndin ndidia ammọ akedo mme adʌñ nsadañ.

5 Emaebịne ammọ esio ke atu ubon awo,

ebọọñ ñkpo ekeene ammọ nte mme inọ.

6 Emaenyịk ammọ ekedʌñ ke itie idịm akesatta,

ke atu mme itiad ye ke mme ndudu ke esịd isọñ.

7 Ammọ ebọọñ ñkpo ke ikọd

enyʌñ edọñọ ke ikọd mme akpab.

8 Nditọ ndisịme ye nditọ i-imiinieghe anyịñ,

emaebịne ammọ esịññe ke isọñ.

9 "Ndin idahami ñkparawa ado ensịn miin ke ikwọ esak;

Ami mmenyʌñ ñkappa ndo ufiid nnọ ammọ.

10 Ammọ ensua miin enyʌñ eda nsan-nsan;

ammọ inyʌññọ ibiat ini adimfiat miin etab ke iso.

11 Idahami a-adooho Abasi amaakịppe utịgha mmi anyʌñ añkuut miin,

ammọ ikoppo ndịk ke iso mmi.

12 Ke ubọk nnasia mmi, aduuk etop ekọñ;

ammọ enyʌñ ekọọk afia enọ ukod mmi,

enyʌñ ebọp ebọb ekọñ embaha miin.

13 Ammọ eboom usʌñ mmi;

enyʌñ ekan edinsobo miin.

Ammọ ete, ‘Ibaaha awo ndomokeed adiikan adinyaaña anye.’

14 Ammọ ebʌññọ edi nte ekamba ndibene aduọ;

ke ufọọd ñwuudo ami, ammọ ewere edʌk edi.

15 Akpọsọñ ndịk amfʌk miin;

ebịn ukpono mmi eduọọk nte afịm,

ifuuro mmi asop nte ntọñanyọñ.

16 "Ndin idahami uwem mi aba nte akebe mmọọñ;

mme usen ufen ammʌm miin.

17 Akonayio akịm mme akpọ mmi;

akpọsọñ ubiak innọọhọ utañifia.

18 Ke ekamba adudu amọ Abasi akappa aba nte afọñ ami nsịneke;

anye amfʌk miin nte itọñ afọñidem mmi.

19 Anye antop miin asịn ke mbad,

ndin ami nsuuho ñkedo abu ye ntọñ.

20 "Abasi, ami mmetua ukoot fiin, ado afo umbọọrọke;

Ami mmedakka nda, ado afo asʌk anseese miin.

21 Afo amekappa amfiomo miin;

afo amedat adudu ubọk mfo anwana ekọñ ye ami.

22 Afo añwappa miin abọ anyʌñ añwat miin asịn ke iso afịm;

afo amentop miin akanna ke ayobio.

23 Ami mmediọọñọ ke afo ayandʌt miin aka isọñ tutu akewuọ ñkpa,

aka itie enịmme enọ afịd mme aduuwem.

24 "Ke akpanikọ awo ndomokeed inyanna ubọk ituuk awo unana

ke idaha anye atuaha ayem unwam ke nnananyen amọ.

25 Nte ami ñketuaha ayịd nnọ mbon e-ebaaha ke mfịna?

Nte ukpọñ mmi ifʌhọke ibaña mbon uweene?

26 Ado ke ini ami ndotto anyen ke eti ñkpọ, idiọọk adi;

ke ini ami ndotto anyen ke unwana, ndin ekịm adi.

27 Esịd idịb mmi itreke adibukko;

mme usen ukuud ensịm miin.

28 Ami mmesaña ndo abubịd ñkpọ, ado idooho ayio anam ñnwen;

Ami ndakka nda ke ekamba esob ñnyʌñ ntua ñyem unwam.

29 Ami mmekappa ndo ayịneka ye ewaikọd,

awo nsaña mme ñkịdikịd.

30 Ikpọkidem mmi akappa abre anyʌñ afọọñọ;

idem mmi ayeghe ye ufiobidem.

31 Laiya mmi akappa abre ikwọ mfʌhọ,

adʌk mmi anyʌñ ado ñkpọ utua ayịd.