1 Ndin ideen ita ami emaetre edibọọrọ Yoob ikọ, sia anye akedo adinen awo ke anyen amọ. 2 Ado Elihu ayịn Barakel awo Buus, awo ubon mme Ram, amaayat esịd eti-eti ye Yoob ke anye adikịt idem amọ nte imidot ke ini akpedooho Abasi. 3 Elihu ñko amaayat esịd ye mme ufan ita ado, sia ammọ ikikịtte usʌñ ndomokeed adifaaña mme Yoob, ado esʌk ebiom anye ikpe. 4 Idaaha ami Elihu amaabet diin mbemiso anye atañ ikọ ye Yoob sia ammọ emaesọñ ekan anye. 5 Ado Elihu akekịt ke mme ideen ita ado ikinieghe ñkpọ aba se etañ, iyadesịd amọ amaademme.

6 Ndin Elihu ayịn Barakel aketooho Buus amaabo:

"Ami mmesịp ke isua emana,

ndin afo amesọñ;

ado akenam nọ ami ñkop ndịk,

ñnyʌññọ ñkan ntañ inọ ndufo se ami ndiọọñọ.

7 Ami ñkekere mbo ke, ‘Ekamba isua emana akpena atañ ikọ;

isua akponno akpena akpeep awo aniọñ.’

8 Ado, ado sịbidịd a-abaaha awo ke idem,

ibifịk Andikoñ Ñkan, anọ ammọ ndiọọñọidem.

9 Idooho mbon esọññọ ikpọọñ enie enọ aniọñ,

idooho mbon esọññọ ikpọọñ ediọọñọ se ido akpanikọ.

10 "Ndin ami mbo: Kpañ utọñ nnọ miin;

Ami ñko ñyaudọkkọ fiin se ami ndiọọñọ.

11 Ami mmaatie mbet idaha afo aketañña ikọ,

ami mmaanyʌñ ñkpañ utọñ ñkop mme akikere mfo;

idaha afo akeyemme mme ikọ se atañ,

12 Ami mmaanekke inọ ndufo ayọhọ ñkpañutọñ.

Ado ibaaha awo ndufo ndomokeed se ikiwọt ke Yoob amaadue;

ibaaha awo ndufo ndomokeed a-akebọọrọke mme ikọ mfaaña amọ.

13 Ikiibo ite, ‘Ñnyịn imikịt aniọñ;

yak ado Abasi, akuudo awo, afaaña mme anye.’

14 Ado Yoob ikitañña ikọ amọ imbaña miin,

ndin ami ndiinyʌññọ ndat ikọ mfaaña ndufo mbọọrọ anye.

15 "Idem amaakpa ammọ ndin ammọ ikiinieghe aba se etañ;

ikọ amaakak ammọ aditañ.

16 Me ana nte ami mbet, idahami a-adooho ammọ e-edop uyio,

idahami a-ammọ edaaha do inieghe ibọọrọ?

17 Ami ñko ñyaanie ibọọrọ mmi;

Ami ñko ñyaatañ se ami ndiọọñọ.

18 Sia ami ñyọhọ mme ikọ,

ndin sịbidịd ambaaha miin ke idem añnyịk miin;

19 ke esịd idem ami mba nte ukọd esịnne ke ekpeme esiit,

nte mme ufa ikịm ukọd eyemme adibomo.

20 Ana ami ntañ ikọ ñnyʌñ mbọ nduọkadudu;

Ana ami ñkʌppọ inua mmi ñnyʌñ mbọọrọ.

21 Ami ndiibaaha awo anyen,

me aditañ ikọ nnem awo ndomokeed esịd;

22 sia akpedo mmaanekke nnie ifiọk ke utañ ikọ nnem awo esịd,

Andikimbod miin akpaakesọp adimben miin asio.