1 Ndin Bildad a-atooho Suu amaabọọrọ ate:

2 "Adiikpeene die afo adika iso ntañ mme utọ ikọ ado?

Mme ikọ mfo edo uyom afịm.

3 Nte Abasi asikpe ukwañ ikpe?

Nte Andikoñ Ñkan akeme adinam se imaikinen akwaña?

4 Idaha nditọ mfo ekenamma anye idiọọkñkpọ,

anye amaayaak ammọ anọ ubiomikpe idiọọkñkpọ ammọ.

5 Ado adieke afo ayemme Abasi ke afịd esịd

anyʌñ akpe Andikoñ Ñkan ubọk,

6 adieke afo adooho adisana ye adinen awo,

kpa idahami anye idiitreke adibenne idem ke ntak mfo

anyʌñ atịmme uben fiin akenọ uforo uwem mfo.

7 Ntọọñọ uwem mfo adiiba nte nsuukidem,

ini iso mfo adiiyọhọ ye uforo nti ñkpọ.

8 "Ibịp mbio emana ako

inyʌñ iduuñọ se mme eteete ammọ ekekpeep,

9 sia ñnyịn ikimana ñkpọñ aboiyoke mi, idiọọñọke ñkpọ ndomokeed,

ndin mme usen uwem ñnyịn ke ederimbod atie nte ndukpọñ.

10 Nte ammọ iduudʌttọ fiin utọñ inyʌñ itañ unọ fiin?

Nte ammọ idiisioñoke ikọ itañ ikeene naña ñkpọ anwaña ammọ?

11 Nte mfañ papirus a-akeme adikọt ñnyọọñ ke mbad imiibaaha?

Nte ñnyanyaha a-akeme adikọt ke mmọọñ imiibaaha?

12 Ke ini esʌkkọ ekọkọt, awo inyʌññọ ikpekpịkke,

ammọ esọp eyeeme ekan mbid.

13 Kpa ntoro ñko ke uwem mbon e-efreke Abasi aba;

ndin idodanyen awo i-imiidiọọñọke abasi atak.

14 Se ammọ ebuọt idem inieghe nsọọñọnda;

se ammọ edat nte ibededem ado udʌk utuudekpe.

15 Ammọ ebet edem ke udʌk utuudekpe, ado anye awuudo;

ammọ esọọñọ emʌm anye ekama, ado anye isọọñọke ida.

16 Ammọ eba nte eto e-enekkeke eduọi mmọọñ enọ ke ini ndaayio,

a-asuanna emịne amọ anyʌñ atara ayọhọ inwañ;

17 anye adọñ ñkam amọ akanna mme abaitiad

anyʌñ ayem itie ke atu mme itiad.

18 Ado ke anye amaawakka ke itie amọ,

itie ado ate ke iyemme anye anyʌñ abo, ‘Kpaanam ukịtte fiin.’

19 Ke akpanikọ uwem amọ ayeeme aboiyo afep,

ndin ato ke isọñ mme eto mfen etịppe ekọọt.

20 "Ke akpanikọ Abasi isịnne awo a-afọnnọ ama

me adisọọñọ ubọk mme anam ibak.

21 Anye ñko ayaayọhọ inua mfo ye imam

ye ñkpọkinua mfo ye ñkpo idaara.

22 Mbon usua mfo eyaesịne afọñ abuud,

ndin itieidʌñ mme anam idiọọk idiibaaha aba."