1 Ke ami amaakeboiyo, Yoob amaakʌppọ inua amọ anyʌñ asueñ usen emana amọ. 2 Yoob amaabo:

3 "Yak usen a-ami ñkemanake akịt nsobo,

ye akonayio a-akebooho, ‘E-eyommo ayịn!’

4 Usen ado, yak anye akappa ado ekịm;

Yak Abasi ke anyọñ akuuse ñkpọ abaña anye;

yak unwana ndomokeed akuunyʌñ asakka anọọ anye.

5 Yak ndobo ye akpọsọñ ekịm amaana aben anye;

yak ntọñanyọñ adoro afʌk anye;

yak ekịm afʌk anye.

6 Akonayio ado, yak ataa ekịm amʌm anye;

yak ke ebat anye esịn ke atu mme usen ke isua

me adibat anye nsịn ke afiọñ ndomokeed.

7 Yak akonayio ado ado ada;

yak awo akuukop ñkpo idaara ato anye.

8 Yak mbon se isuuñọ mme usen esuuñọ usen ado,

mbon e-ebeeñeke idem adidemme idiọọk unam mmọọñ.

9 Yak mme ntantaafiọñ ubakusen amọ ekappa ekịm;

yak anye atie abet unwana usen ke ikpu-ikpu

akuunyʌñ akịt akpa unwana usiere,

10 sia anye imiikibette usʌñ idịb imbaha miin

adidịp mfịna ke anyen mmi.

11 "Ntak ami mmeñkekpaaha ke emana-a,

mmeñkenyʌññọ ñkpa naña ami ñkewuọhọ ke idịb-e?

12 Ntak ake mme edọñ ekebaaha edimbọọ miin-e

ye mme eba se ñwọp-ọ?

13 Idahami, ami ñkpenaana nduọk adudu ke emem;

Ñkpedaiya idab ñnyʌñ nduọk adudu

14 ye mme ndidem ye mme andikara ederimbod,

e-ekebọppọ mme itie enọ idem ammọ e-ebaaha idahami ke ñwuudo,

15 ye mme mbọọñ e-ekenieñeke kold,

e-ekeyọhọke ufọk ammọ ye silfa.

16 Me nsoo ikido ntak ekedindịppe miin ke isọñ nte adukpo nsekayịn,

nte nsekayịn a-mmiikikịtte utịn usen?

17 Do ke mbon ibak etre afanekọñ,

kpa do ñko ke mbon ekpaaha mba inieghe ukeme ndin eba ke nduọkadudu.

18 Mbon ñkpakọb ekop inem ke adiduọk adudu;

Ammọ ikoppo aba nduaiya ñkpo akpeme ifʌn.

19 Ntək awo ye ikpọ awo eba do,

mme ifʌn enyʌñ enie ñkpọkñyak ke ubọk mme andinie ammọ.

20 "Nsoo inam eben unwana enọ mbon e-ebaaha ke ukuud,

enyʌñ eben uwem enọ mbon se ukpọñ ammọ adodoro,

21 ye mbon se ñkpa awʌt ado ñkpa idiighe,

e-eyemme ñkpa ekan ndedịbe ñkpọuto,

22 e-eyọhọke ye inemesịd

enyʌñ edaara ke ammọ emaewuọ udi?

23 Ntak e-enọọhọ awo

u-usʌñ amọ adooho ndedịbe uwem-e,

ake Abasi akʌkkọ anye akanna?

24 Sia mmịm mmi akappa ado ndidia usen mmi;

ñkuun mmi anyʌñ anwañña awuọ nte mmọọñ.

25 Se ami ñkebaak adi adinsịme miin;

se ami ñkesifeghe anyʌñ aditịppe annọ miin.

26 Ami nnieghe emem, ñnyʌññọ nnie ndobuyio;

Nnieghe nduọkadudu, ado afanekọñ kpọd ke nnie."