1 "Nte mme awo inieghe akpọsọñ utom adinam ke ederimbod?

Nte mme usen ammọ ibaaha nte mbon e-enamma utom ke ukpe akʌk?

2 Nte afʌn a-mfuud ndubiayio awʌttọ anye adikịt,

me awo ukpekpe utom a-atieghe abet yak ekpe anye akʌkutom amọ,

3 ke ntoro ke e-edeeme mme ikpu-ikpu afiọñ ennọ miin,

e-enyʌñ enịm ukuud ke akonayio ennọ miin.

4 Ke ini ami mmaakesuuk nnaa ami ñkere, ‘Me adiikpeene die mbemiso ami ndakka nda?’

Akonayio akpeene, ami ñnyʌñ nnaa mmiañña tutu usiere.

5 Abʌkidem mmi ayọhọ ye utʌñ ye ñkpa inia,

ikpọkidem mmi asakka anyʌñ awuọñọ mmọọñ.

6 "Mme usen uwem mmi esọp ekan afia idañ,

enyʌñ ediwuọ utịd, inieghe idodanyen.

7 O Abasi, toiyo ke uwem mmi ado inweek keed;

anyen mmi idiikịtte inemesịd aba.

8 Anyen añkịtte miin idahami, idiñkịtte miin aba;

afo ayañyem miin, ado ami ndiibaaha aba do.

9 Nte ntọñanyọñ asuanake anyʌñ asop,

ntoro ke awo a-atịkkeke adʌk esịd udi imiitịmmeke idi aba.

10 Anye idiitịmmeke idi ufọk amọ aba;

atʌñ ammọ idiidiọọñọke anye aba.

11 "Ke ntoro ami ndiidoppo uyio;

Ami ñyaatañ ikọ ke iyadesịd sịbidịd mmi,

Ami ñyaaseeme ke ndutʌhọ ukpọñ mmi.

12 Nte ami ndo inyañ ibom, me akukubarakpa ake esịd mmọọñ,

nọ afo ansịn miin ke idak ukpeme?

13 Ini se ami ñkere mbo ke akwañ mmi ayannọ miin idọñesịd

ndin ñnyʌkkọ mbere ñkpọitie mmi ayaanam eseeme mmi asuuhọ,

14 akpesʌkado afo adatta ndab ansịn miin ndịk

anyʌñ anam idem añnyeñ miin ye mme ñkukịd,

15 nọ ato do ami ñyem uyịre ekpan ye ñkpa,

utu ke utọ ikpọkidem mmi ami.

16 Ami mmesọọn uwem mmi; ami ndiiduuho ke nsi-nsi.

Ñkpọñ miin; mme usen mmi iwuọñọke ñkpọ ndomokeed.

17 "Awo ado nsoo a-anamma yak afo anekke akere ñkpọ abaña anye,

anyʌñ anọ ammọ afịd ini mfo,

18 anyʌñ aduuñọ ammọ afịd ubakusen

anyʌñ adomo ammọ ase afịd ini?

19 Nte afo uduusioho anyen uñkpọñ miin,

me adinsaana miin ñyaak ke etək ibio ini?

20 Adieke adooho ami mmenam idiọọkñkpọ, nsoo ke ami unam fiin,

afo a-adooho amekịt afịd ñkpọ se ñnyịn inam?

Nsoo inam yak afo awuuk anyen ke idem mmi?

Nte ami mmekappa ndo ukọ unọ fiin?

21 Nsoo inam afo ufeene mme ndudue mmi

unyʌñ udakka unnọ ke mme idiọọkñkpọ mmi?

Ami ñyaasọp nnaa ke ntọñ;

afo ayañyem miin, ado ami ndiibaaha aba."