1 Ndin Elifas awo Teman amaabọọrọ:

2 Adieke awo ayemme adineme nneme ye afo, ayaanana ime?

Ado anie awo akeme aditre aditañ ikọ?

3 Kere baña naña afo akenọọ uwak awo item,

anyʌñ anam mme mmeem-mmeem ubọk esọọñ.

4 Ikọ mfo amaasọọñọ mbon e-eketuakka ukod;

afo amesọọñọ mme edọñ e-edutọọrọke.

5 Ado idahami, mfịna adusịm fiin, ndin afo amekop umiọñ,

anye utuuk fiin idem, ndin esịd uduọ fiin.

6 Nte uteeñe a-afo anieghe ikpidooho nsọọñọidem mfo

nte nti usʌñ uwem mfo ikpinyʌññọ ido idodanyen mfo?

7 Kere baña idahami: Akenaanam anie ado idueghe, ado atak?

Ke mmọọ ke ekesobo mme ndinen awo?

8 Naña ami nda ñkịt, mbon e-etọọhọ ndiọi

ye mbon e-etọọhọ mfịna edọk kpasʌk ado.

9 Inweek Abasi anam ammọ etak;

ke ayobio iyadesịd amọ ammọ ibaaha aba.

10 Mme ekpe e-ekeme edikuun enyʌñ enyamma,

kpayeado eded ñkpọsọñ ekpe ebeghe.

11 Ekpe akpa anọ unana ndidia,

ndin esuan nditọ uman ekpe.

12 Emaeditañ ikọ ennọ miin ke ndịbe,

utọñ mmi anyʌñ akop anye nte adu.

13 Ke ufọọd idiọọk ndab ke akonayio,

ke ini akpọsọñ idab amaaben mme awo,

14 ndịk ye ñnyeñidem ammʌm miin

anyʌñ anam afịd mme akpọ mmi enyeñ.

15 Sịbidịd keed amaasaña aboiyo ke iso mmi,

ndin ided ke idem mmi emaenyʌñ edaaña eda.

16 Anye amaatuak ada,

ado ami ñkikanna ntañ se anye akedo.

Mbid ñkpọ amanda miin ke iso,

ndin ami mmaakop uyio naña atañ usʌk-usʌk:

17 Nte awo akeme adinen ñkan Abasi?

Nte idem akpọsọñ awodeen akeme adisana ñkan Andibod anye?

18 Adieke Abasi imiinieghe mbuọdidem ke idem nditọufọk amọ,

adieke anye akịtte ndudue anọ mme enyere amọ,

19 kap se ndin mbon e-edʌñọke ke mme ufọk mbad,

esịnne mme itiad idakisọñ ammọ ke ntọñ,

ake esọppọ enuak ammọ ekan naña ekpenuak ñkakad!

20 Ke ufọọd ubakusen ye ndubi, ammọ ewuudo ebono mbai-mbai;

awo ikịtte ammọ, ammọ etak ke nsi-nsi.

21 Nte awo idʌttọ mme idʌk a-abọppọ mme atayad ammọ,

nọ ato do ammọ ekpa ke unana ndadmmana aniọñ?