1 Awodeen keed a-akekereke Yoob amaaba ke abio Us. Awo ami amaanana ndo anyʌñ anen; anye amaabaak Abasi anyʌñ asọọn idiọọk. 2 Anye akenie nditọ ideen itiaba ye nditọ ibaan ita, 3 anyʌñ anie edọñ tọsịn itiaba (7,000), kamel tọsịn ita (3,000), ñyaaraenañ ikie ition (500) ye dọñki ikie ition (500), ye uwak nditọufọk. Anye akedo ataa ekamba awo ke atu mbon Usakkautịn.

4 Nditọ ideen amọ ekesidia usọrọ usen emana ammọ ke atʌñ ammọ, enyʌñ esikoot nditọeka ammọ ibaan ita ebo edikeene edia enyʌñ enwọñ ye ammọ. 5 Ke ini usọrọ ami amaakweeñe, Yoob ayaanam ndutʌm adidiọñ ammọ nọ esana. Ke ataa ubakusen, anye amaasifọp uwa anọ ammọ keedekeed, sia anye akere abo, "Akeme adido nditọ mmi e-enam idiọọkñkpọ enyʌñ esuuñọ Abasi ke isọñ esịd ammọ." Ami akesido ndutʌm Yoob ke ini ke ini.

6 Usen keed mme enyere* emaeben idem ammọ edi ke iso Abọọñ, Setan* ñko amaanyʌñ asaña ye ammọ adi. 7 Abọọñ amaabo Setan ate, "Uke ke afo ato adi?"

Setan amaabọọrọ Abọọñ ate, "Nto ke adiyooñ ke afịd ederimbod, ñkaa iso ñnyʌñ ntịmme edem."

8 Ndin Abọọñ amaabọọrọ Setan ate, "Nte afo ametʌm ase awo mmi Yoob? Ibaaha awo mfen a-abaaha nte anye ke afịd iso isọñ; anye anana ndo anyʌñ anen, awo a-abaaha Abasi anyʌñ asọọn se idiọọk."

9 Setan amaabọọrọ Abọọñ ate, "Ado nte Yoob abaak Abasi ke unana ntak? 10 Nte afo usịnne akọ ukanna anye ye ufọk amọ ukʌk ye afịd se anye anie? Afo amediọñ ubọkutom amọ, tutu afịd ufene mme inie amọ etaara eyọhọ afịd isọñ. 11 Ado idahami nyan ubọk nyʌñ biat afịd se anye anie, ndin ke akpanikọ anye ayausuuñọ fiin ke iso mfo."

12 Abọọñ amaabo Setan ate, "Afọn, ndin, afịd ñkpọ se anye anie esịne ke adudu mfo, ado amaado anye ke idem amọ kuuyak nnuunubọk mfo atuuk anye."

Ndin Setan amaadakka akpọñ iso Abọọñ.

13 Usen keed idaha nditọ ideen ye nditọ ibaan Yoob ekesʌkkọ edia usọrọ enyʌñ enwọñ ukọd ke atʌñ ayịneka ammọ awodeen andikikpon ñkan, 14 isʌñutom keed amaadibo Yoob ate, "Ñyaaraenañ ekesʌk efʌñ isọñ, mme dọñki ekenyʌñ esʌk eta mbid ekpere ammọ, 15 mbon Seba emaenwana ye ammọ enyʌñ emuum ammọ. Ammọ emaekama akañkañ ewoot afịd nditọufọk mfo, ndin ami ndo ukweeñe awo se ikibọkkọ ifeghe iditañ unọọ fiin!"

16 Naña anye asʌkkọ akaiso atañ ikọ ado, isʌñutom mfen amaadi adibo anye ate, "Ikañ Abasi amaato anyọñ adifọp mme edọñ ye mme nditọufọk mfo, ndin ami ikpọọñ mbọkkọ adiditañ unọọ fiin!"

17 Idaha anye akesʌkkọ aka iso atañ ikọ, isʌñutom mfen amaadi adibo anye ate, "Mbon Kaldi emaetʌm idem ammọ edọñ ke mbakka ita ekanna mme kamel mfo ekʌk enyʌñ ekoono ammọ enyọñọ. Ammọ emaekama akañkañ ewoot nditọufọk mfo, ndin ami ndo ukweeñe awo a-akebọkkọke aditañ unọọ fiin!"

18 Naña anye akesʌkkọ akaiso atañ ikọ ado, isʌñutom mfen amaadi adibo ate, "Idaha nditọ mfo ideen ye ibaan ekesʌkkọ edia usọrọ enyʌñ enwọñ mmịn ke atʌñ ayịneka ammọ awodeen andikpon ñkan afịd ammọ, 19 ekamba adiwad afịm ayobio amaato akpautatan adi inikeed-inikeed adituai ndibene ufọk ado naña inaañ. Ufọk ado amaaduọ atọ afịd ammọ awot, ndin ami ndo ukweeñe awo a-akebọkkọke nọ aditañ unọọ fiin!"

20 Ke adikop ami, Yoob amaadakka ada anyʌñ awai afọñ amọ, anyʌñ akwaat ided iwuod amọ. Akema anye amaaduọ ke isọñ ke ukpono 21 anyʌñ abo:

"Ami ñkesaña ifed ñwuọ ke idịb eka mmi,

ifed ñko ke ami ndiisaña ñnyọñ.

Abọọñ akenọọ, Abọọñ anyʌñ abọ;

yak itooro anie anyịñ Abọọñ."

22 Ke afịd mme ñkpọ ami, Yoob ikinamma idiọọkñkpọ ke adibiom Abasi ikpe.