1 "Mme awo, a-awonwaan amanna,

enie ibad-ibad usen enyʌñ eyọhọ ye mfịna.

2 Ammọ etịppe nte mme ñkpokpoñ enyʌñ eyeeme;

nte ndukpọñ, ammọ ikpeeñeke.

3 Nte afo amewuuk anyen mfo ke ammọ?

Afo ayaaben ammọ adi iso mfo ke ikpe?

4 Anie awo akeme adiben se isana nto se imiisanake ndi?

Ibaaha awo!

5 Enịm adaña ebaña mme usen awo;

afo amenịm ewʌhọ abaña mme ibad afiọñ amọ

anyʌñ anịm adaña se anye imiikanna iboiyo.

6 Ke ntoro sio anyen mfo kpọñ anye nyʌñ saana anye yaak,

tutu ini amọ akem nte awo e-ekpeeghekpe utom.

7 "Kpayeado, etək idodanyen a-aba anọ eto:

Ekpekpịkke anye enịm ke isọñ, ayaamaana aseghe,

ñko ufa emịne amọ idiitreke adiseghe.

8 Mme adʌñ amọ ekeme edisọñ ke isọñ

itịghe amọ anyʌñ akpa ke ntan,

9 ado ke adikop ufịk mmọọñ anye ayaaset

anyʌñ asịññe emịne nte eto.

10 Ado awo amaakpa enyanna enịm;

anye anweek akpatre ibifịk, ndin anye ibaaha aba.

11 Kpa naña mmọọñ idịm asat

me isọñinyañ adiduọ anyʌñ asat,

12 ntoro ke anye asʌk ana inyʌññọ idakka ida;

tutu mme hefịn ibaaha aba, mme awo idiidemmeke

awo idiinyʌññọ itọi ammọ ke idab.

13 "Akpekapado afo ayandịp miin ke udi

anyʌñ amfʌk miin tutu iyadesịd mfo aboiyo!

Akpekapado afo akpaanịm ini annọ miin

ndin anyʌñ antoiyo miin!

14 Adieke awo akpaaha, ammọ eyaemaana edu uwem?

Afịd mme usen akpọsọñ utom mmi

Ami ñyaabet nọ adidemme mmi adi.

15 Afo ayañkoot ndin ami ñyauyie fiin;

itọñ ayaudọñ abaña ñkpọ ake ubọk mfo abotto.

16 Ke akpanikọ, ndin afo ayaabat ñkpad isañ mmi

ado uduukanna ukeene usʌñ idiọọkñkpọ mmi.

17 Eyaedịp idiọọkñkpọ mmi ke ekpad;

afo ayaafʌk idiọọkñkpọ mmi.

18 "Ado naña abod abomo anyʌñ awuuro

naña enyʌñ ebenne itiad esio ke itie amọ,

19 naña mmọọñ ayet mme itiad

mme akpa enyʌñ eyet isọñ,

ntoro ke afo abiat idodanyen awo.

20 Afo amekan ammọ udịd ini keed, ammọ enyʌñ enyọñọ;

afo amekpuuñọ ammọ edu anyʌñ asio ammọ unyọñ.

21 Adieke enọọhọ nditọ ammọ ukpono, ammọ idiọọñọke;

ekpesuuhọ nditọ ammọ itie, ammọ ikịtte.

22 Ammọ ekop ubiak ke abʌkidem ammọ

enyʌñ eseeme enọ idem ammọ ikpọọñ."