1 Abọọñ amaabo Yoob ate:

2 "Nte anye a-atọhọke ye Andikponñkan ayaanekke anye?

Yak awo a-akịtte ndudue anọ Abasi abọọrọ anye!"

3 Ndin Yoob amaabọọrọ Abọọñ:

4 "Ami ndotto, nduubọọrọ fiin die?

Ami ndat ubọk mmi mfʌk ke inua mmi.

5 Ami mmaatañ ikọ ini keed, ado ami nnieghe ibọọrọ

akañ iba, ndin ami ndiitañña ikọ aba."

6 Akem Abọọñ amaatañ ikọ anọ Yoob ke ayobio:

7 "Bọbọ mbọbọ ndin ke isịn nte awodeen;

Ami ñyaubịp fiin mbuume,

ndin afo ayambọọrọ miin."

8 "Nte afo ayaabo ke ikpe mmi inenne?

Nte afo ayambiom miin ikpe nọ ato do afo anie unen?

9 Nte afo amenie ubọk a-atieghe nte ake Abasi,

nte uyio mfo akeme adisọñ nte uyio amọ?

10 Ndin dat ubọọñ ye mmọnyọ bana idem mfo,

nyʌñ dat ukpono ye uyai sịne ke idem mfo.

11 Nwañña afịd iyadesịd mfo,

se afịd mbon se ikokko idem nyʌñ suuhọ ammọ nịm ke isọñ,

12 se afịd mbon se iwọt idem nyʌñ suuhọ ammọ itie

nuak ndiọi awo ke itie a-ammọ edaaha.

13 Buuk afịd ammọ ke abu ini keed;

nyʌñ fʌk iso ammọ ke udi.

14 Ndin ami ke idem mmi ñyaanyịmme ye afo

ke ubọk nnasia mfo akeme adunyaaña fiin.

15 "Se Behemọd,

a-ami ñkenamma ye afo

a-anyʌññọ ata mbid nte ayaaraenañ.

16 Kap se adudu se anye anie ke isịn amọ,

kap se inweek se iba ke asịb idịb amọ!

17 Isịm amọ anyeeñe nte eto sida;

mme asịb ifʌkkọ amọ adudiana-adudiana.

18 Mme akpọ amọ edo mme akpọ e-enamma ke brọns,

Ukod ye ubọk amọ ebit esañ ukwak.

19 Anye ado akpa ke atu mme ubọkutom Abasi,

ado Andinam anye akeme adibịne anye ye akañkañ amọ.

20 Mme abod enyʌñ edat mme mfịd inwañ ammọ esọk anye,

ndin afịd mme unam ikọd ebre mbre ekpere anye.

21 Anye anaa ke idak mfañ lotus,

ke idak ñnyanyaha ke adeb.

22 Mme lotus edịb anye ke ndukpọñ ammọ;

Mme ikpọ eto ke mben idịm ekanna anye ekʌk;

23 Uyom mmọọñ inyañ idịkkeke anye;

anye anie nsọọñọnda, akpesʌkado Yọdan abịmmeke asịm anye inua.

24 Nte aba awo a-akemeke adimʌm anye ke anyen,

me adikọọk afia mmʌm anye ñnyʌñ ntịppe anye iwuo?