1 Ndin Yoob amaabọọrọ ate:

2 Ami mmekop mme uwak ñkpọ ntom;

afịd ndufo idoññoke nti mbon idọñesịd!

3 Nte anyan nduwañña ikọ ndufo idiinieghe utịd?

Nsoo ñkpọ iyat ndufo a-anamma yak ndufo akaiso afaaña mfaaña?

4 Ami ñko mmekeme aditañ ikọ nte ndufo,

adieke ndufo ekpebaaha ke itie mmi;

Ami ñkpaakan aditañ nti ikọ ibaña ndufo

ñnyʌñ ñnyeghe iwuod inọ ndufo.

5 Ado inua mmi ayainọ ndufo isọñesịd;

idọñesịd a-atooho ñkpọkinua mmi ayaisuuk ndufo esịd.

6 Ado adieke ami ntañña ikọ, ubiak mmi isuuhọke;

ndin ñkpedop uyio, anye isʌkkọ itre.

7 Ke akpanikọ, Abasi, afo amenam ami ñkpa mba;

afo amesobo afịd mbon ufọk mmi.

8 Afo amenam idem mmi asat, ndin anye akappa ado ntiense;

ndiọọkidem mmi adakka ke anyọñ atañ ikọ ntiense ambaña miin.

9 Iyadesịd Abasi adakka ada añwai miin

anyʌñ akwaaha eded amọ ambaña miin;

asua mmi awuuk anyen ifiobesịd amọ anse miin.

10 Mme awo etat inua ammọ ennọ miin ñnyọọ;

ammọ entuak miin ebek ke emiom

enyʌñ esọñ ediana keed enam ikọ mme ami.

11 Abasi añyaak miin anọ mbon i-imiidiọọñọke Abasi

anyʌñ antop miin asịn ke ubọk mbon ibak.

12 Afịd ñkpọ amaafọn ye ami, ado anye ansuan miin;

anye amammʌm miin ke itọñ anyʌñ antọ asuan.

Anye annam miin iso idañ amọ;

13 mme nta atobidañ amọ eñkanna miin ekʌk.

Anye akịm ekpuud mmi inyʌññọ iñkop udʌk

anyʌñ aduọk atidod mmi ke isọñ.

14 Anye ambom miin amaana ambom;

anye afeghe ambịne miin nte awo ekọñ.

15 Mmekịm afọñikpo nsịne ke idem

ñnyʌñ mbuuk adudu akoiso mmi ke ntọñ.

16 Iso mmi adat akeene ntuaayịd,

ndukpọñ ekịm atọ akanna anyen mmi;

17 ado ubọk mmi inamma afai

ñko akam mmi ado adisana.

18 Isọñ, kuufʌk iyiib mmi;

kuuyak ayịd mmi abọ nduọkadudu!

19 Idem idahami, ntiense mmi aba ke hefịn;

ibededem mmi anyʌñ aba ke anyọñ.

20 Andinam ñkpeubọk innọọ miin ado ufan mmi

naña anyen mmi atua mmọọñayịd anọ Abasi;

21 Ke iwuod awo, anye akpeiye Abasi ubọk

nte awo akpeiye ubọk anọ ufan amọ.

22 Ibad-ibad isua adiiboiyo

mbemiso ami ndʌk usʌñ ake mmendiitịmmeke edem.