1 "Ke ami esịd mmi aduọ

anyʌñ atamma akpọñ itie amọ.

2 Kpañ utọñ! Kpañ utọñ nọ uyom uyio amọ,

uyom a-atooho inua amọ.

3 Anye asaana akebkeb amọ ayaak ke idak afịd hefịn

anyʌñ adọñ anye anọ mme utịd ederimbod.

4 Ke ado amaaboiyo, ayedo uyio ñkpo amọ;

anye akpooro ye uyio akwa ubọọñ amọ.

Idaaha uyio amọ amaanake ayomo,

anye itegheke ube.

5 Uyio Abasi aduọ nte aduma ke mme ñyọọ-ñyọọ usʌñ;

anye anam ikpọ ñkpọ akan se ñnyịn idiọọñọ.

6 Anye abo sino ate, ‘Duọ ke ederimbod,’

anyʌñ abo ñkeñe edịm, ‘Do ataa ekamba edịm.’

7 Nọ afịd awo se anye akebot ediọọñọ ubọkutom amọ,

anye atre afịd awo adinam utom ammọ.

8 Mme unam efeeñe edịbe;

ammọ esʌhọ ke ndudu ammọ.

9 Ayobio ato ke ubeed amọ awuọ adi,

atueb ato ke afịm a-awatta adi.

10 Inweek Abasi asio ataa ndedeñ,

ndin mmọọñ a-atarake akpon akappa ais.

11 Anye afiik mme ntọñanyọñ ye mbara;

anye asuan akebkeb ato do.

12 Ke ndadusʌñ amọ, ammọ eyʌt ekanna

ke iso afịd ederimbod

adinam se anye awuuk ammọ.

13 Anye aben ntọñanyọñ adi adimia mme awo ufen,

me adiduọk mmọọñ ke ederimbod amọ ñnyʌñ ñwọt ima amọ.

14 "Kpañ utọñ nọ ami, Yoob;

tuak da diin, nyʌñ kere baña mme utịppeñkpọ Abasi.

15 Afo amediọọñọ naña Abasi akara mme ntọñanyọñ

anyʌñ anam akebkeb amọ amịneñ?

16 Nte afo amediọọñọ naña mme ntọñanyọñ ekọñọ ke ikpaanyọñ,

mme utịppeñkpọ ami, anie awo anie ayọhọ-ayọhọ ifiọk?

17 Afo a-asịneke afọñ a-anamma yak idem ufiop

ke idaha isọñ anaaha sʌñ-sʌñ ke ini afịm usuuk,

18 nte afo amekeme adidiana ye anye ke aditat ikpaanyọñ,

a-asọọñọ nte ukịdiso e-enamma ke brọns?

19 "Temme ñnyịn se akpenaa ñnyịn itañ inọ anye;

ñnyịn ikanna iben ikpe ñnyịn iwọt ke ntak ake ñnyịn ibaaha ke ekịm.

20 Me akpena ebo anye ke ami mmeyem aditañ ikọ?

Me aba awo se ikpibo yak eben imọ emen?

21 Awo ndomokeed ikemeke adisak anyen nse utịn,

ke naña anye ayamma ke ikpaanyọñ

ke idaha afịm amaakekwọọk ammọ nọ asana.

22 Ke awuọhọ ato adoro-adoro ako anye adi ye mmọnyọ amọ;

Abasi adi ke uteeñe ubọọñ amọ.

23 Andikoñ Ñkan idooho se ñnyịn ikeme adisịme ndin anye anyʌñ akpon ke adudu;

ke unenikpe ye ekamba adinenido amọ, anye ifiighe awo.

24 Ke ntoro, mme awo eteeñe anye,

ado nte anye inieghe ukpono inọ afịd mbon aniọñ ke esịd ammọ?"