1 Ndin Elihu amaabo:

2 "Afo akere abo ke ami anen?

Afo abo, ‘Ami mmenen, Abasi inenne.’

3 Ado afo abịp anye, ‘Nsoo ido udod mmi,

nsoo ñko ido udod mmi ke ami mmennamma idiọọkñkpọ?’

4 "Ami ñkpaama adubọọrọ fiin

ye mme ufan mfo ñko.

5 Dịppe anyen se mme hefịn nyʌñ kịt;

wuuk anyen se ntọñanyọñ ke ata anyọñ.

6 Adieke afo anamma idiọọkñkpọ, ado abeghe die anye?

Adieke ndiọiñkpọ mfo ewakka, nsoo ke ado anam anọ anye?

7 Adieke afo adooho adinen, nsoo ke afo anọọ anye,

me nsoo ke anye ubọọ fiin ke ubọk?

8 Ibak mfo afịna uduud awo nte ndufo kpọd,

ndin adinenido mfo anyʌñ atuuk mbon awo mfen.

9 "Mme awo etua ke idak akpọsọñ ufịk;

ammọ eyem ufak eto ubọk mbon adudu.

10 Ado ibaaha awo ndomokeed se ibo, ‘Mmọ Abasi Andimbod miin,

ake anọọhọ ikwọ ke akonayio,

11 ake ikpeebe ñnyịn ñkpọ akan naña anye akpeep mme ndiọi unam ederimbod

anyʌñ anam ñnyịn idiọọñọ ñkpọ ikan mme inuen ke ikpaanyọñ?’

12 Anye isibọọrọke mme awo emaetua

ato ke ntak ñkokkoidem mbon ibak.

13 Ke akpanikọ, Abasi isikoppo ukpọk aseeme ammọ;

Andikoñ Ñkan isinieghe ini inọ ñkpọ ntom.

14 Akañ ifañ ke anye adiikop

ke ini afo abooho ke imọ ikịtte anye,

ke ikpe mfo aba anye ke iso

ndin ana afo atie abet anye,

15 adian do, ke iyadesịd amọ isañake ye ufen

ndin ke anye ñko iseeghe ndoom.

16 Akem Yoob akʌppọ inua amọ ye ikpu-ikpu ikọ;

ke unana ifiọk anye anam ikọ amọ atọt."