1 Ndin Yoob amaakaa iso ke ikọ amọ:

2 "Se naña ami ñyem mme afiọñ amaakeboiyo,

ke mme usen ake Abasi akeñkpemeke miin,

3 ke idaha utuenikañ amọ akeyammake ke iwuod mmi

ndin ami ñkedat unwana amọ nsaña ke ekịm!

4 O, naña ami ñkeba ke ini uyịn mmi,

ke in ataa ufan ye Abasi akediọññọ ufọk mmi,

5 ke idaha Andikoñ Ñkan akesʌkkọ aba ye ami

ndin nditọ mmi enyʌñ ekeñkanna miin ekʌk,

6 ke idaha usʌñ mmi akeyọhọke ye adan mmọọñeba

ndin itiad anyʌñ anwañña idịm adan ọlif annọ miin.

7 "Ke ini ami mmaakekaa inuaatob abio

ñnyʌñ ndat itie mmi ke afe abio,

8 iwaad emaeñkịt miin enyʌñ ekọkkọ eda

ndin mme ikpọ ideen emaenyʌñ edakka eda;

9 mme ikpọ mbọọñ emaetre editañ ikọ

emaenyʌñ efʌk ubọk ammọ ke inua ammọ;

10 mme mbọọñ eketañ ikọ ke uyio adu,

ndin mme edeme ammọ amaadiana ke nsịñ ammọ.

11 Afịd awo se ikiñkop miin emaetañ eti ikọ embaña miin,

ndin mbon se ikiñkịt miin emaentooro miin,

12 sia ami mmaanyaaña uweene a-aketuaha ayem unwam,

ye nditọakpa i-imiikinieghe awo ndomokeed se inwam ammọ.

13 Awo a-akebaaha ke nnaa ñkpa amandiọñ miin;

Ami mmaanam esịd ebekpa akwọ ikwọ.

14 Ami mmaasịne adinenido nte afọñidem;

unenikpe akedo mbọbọ mmi ye tọban mmi.

15 Ami ñkedo anyen nnọ mbon nnan

ñnyʌñ ndo ñkpad nnọ mme mbʌñọ.

16 Ami ñkedo ete nnọ mbon unana;

Ami mmaaben mfịna asenawo ñkama.

17 Ami mmaabuuñ eded mbon ibak

ñnyʌñ ñwappa mbon se ammọ ekemuum ke eded nsio.

18 "Ami mmaakere mbo, ‘Ami ndiikpa ke ufọk mmi,

mme usen mmi ewak nte ntan isọñ.

19 Mme adʌñ mmi eyaetuuk mmọọñ,

ndin ndedeb ayaaduọkkọ ke mme ñkọk mmi afịd akonayio.

20 Ubọọñ mmi idiikpuuho;

idañ adiisʌk ido ufa ke ubọk mmi ke nsi-nsi.’

21 "Mme awo emaekpañ utọñ ennọ miin ye idodanyen,

enyʌñ edop ebet item mmi.

22 Ke ami mmaaketañ ikọ mma, ammọ ikitañña ikọ aba;

mme ikọ mmi amaaduọkkọ ammọ ke utọñ usʌk-usʌk.

23 Ammọ emaetie embet miin nte nsasaha edịm

enyʌñ enwọñ ikọ mmi nte mmọọñ edịm.

24 Ke ami mmaakedueek inua imam ye ammọ, ammọ ikikanna inịm ke akpanikọ;

unwana iso mmi akedo uyaiya ñkpọ anọ ammọ.

25 Ami mmaamek usʌñ nnọ ammọ ndin ntie nte abọọñ ammọ;

Ami mmaadʌñ nte adidem ke atu udịm ekọñ amọ;

Ami ñkeba nte awo adọññọ mbon mfʌhọ esịd.