1 Adọdiọọk anọ abio afai,

a-ayọhọke ye nsu,

a-ayọhọke ye mbịme,

a-ammiinanake se awai eta!

2 Uyom ikpa,

uyom ñkwaaha mme ikara ukwak,

uyom itọk mme enañmbakara

ye mme ntəkko sariọd!

3 Mbon enañmbakara e-edịppe

mmịneñ-mmịneñ akañkañ

ye ñyayamma eduad!

Uwak se enọmọ,

eboho mme akpo awo,

akpo ewak ekan se ebat,

mme awo etuak ukod ke mme akpo eduọ,

4 afịd ado ke ntak atịme udọñ akpara,

e-ekaiyake idiọñ,

e-ekesịnne mme idịd ifʌn ke ntak akpara amọ,

ye mme awo ke ntak ifọd amọ.

5 Abọọñ Andikponñkan atañ: "Ami mmenam ikọ ye afo,

ami ñyaadịppe mme ñkpịn mfo ufʌk iso.

Ami ñyaaben ifed mfo ñwọt mme idịd,

ñnyʌñ ñwọt mme abioubọọñ abuud mfo.

6 Ami ñyauduọk fiin ñkpọ ndọk ke idem,

ami ñyausịn fiin ke ndek,

ñnyʌñ nnam afo ado ñkpọ ndise.

7 Afịd mbon se ukịt fiin eyaefeeñe enyʌñ ebo,

‘Ninife aduọkkọ abono, anie idiitua inọ anye?’

Ke mmọọ ke ami ndiikịt awo se udọñ fiin esịd?"

8 Nte afo amefọn akan Tebes,

a-abaaha ke Nail,

a-mmọọñ akannake anye akʌk?

Inyañ akedo ukpeme amọ,

mmọọñ ado ndibene amọ.

9 Kuus ye Iyib ekedo ananautịd adudu amọ;

Pud ye Libia ekedo mme nsaña amọ.

10 Kpayeado emaemʌm anye nte mbuodekọñ

enyʌñ esio anye efep ke abio.

Emaeboom ntəkayịn amọ mbai-mbai

ke afịd ñwakka usʌñ.

Emaesịn afia ebaña mme adaaha amọ,

enyʌñ edọñ mme ñkpisọñ amọ ke ñkpọnọ.

11 Ukọd ayaanyʌñ unaam fiin ñko;

afo ayaakedịbe

anyʌñ ayem itie udịbe ato asua.

12 Afịd ñkpọsọñ itie mfo eba nte eto fik,

ye mme akpa mfịd ammọ;

ke ini enyegheke ammọ,

mme fik ado eduọ edʌk inua mme andidia.

13 Se mme udịmekọñ mfo,

afịd ammọ edo mme idek.

Inuaatob isọñ emana mfo

ana inwañ anọ mme asua mfo;

ikañ ata itịm inuaatob mfo.

14 Bọ mmọọñ nịm mbaak ini eduukanna ikʌk,

sọọñọ mme ñkpọsọñ itie mfo!

Nuakka mbad,

sọnnọ nsọñ,

diọñ utom itiad ukọọk ufọk!

15 Do ke ikañ aduuta fiin;

eduad ayaukpịkke fiin anịm,

ammọ eduuta fiin nte eboho ñkukuñkpọyọriyọ.

Tọt nte ataktak,

tọt nte ñkukuñkpọyọriyọ!

16 Afo amenam ibad mbon unyamudua mfo ewak,

tutu ammọ ewak ekan ntantaafiọñ ke anyọñ,

ado nte ñkukuñkpọyọriyọ, ammọ enịm isọñ anaan,

enyʌñ efuurọ enyọñ.

17 Mbon ukpeme mfo ebit ñkukuñkpọyọriyọ,

mme adaaha mfo nte eboho ñkukuñkpọyọriyọ

e-edianake ke ndibene ke ndedeñ usen,

ado ayio amaasakka ammọ efuurọ enyọñ,

ndin awo idiọọñọke itie nte ekaiya.

18 Adidem Asiria, mme akpemeedọñ* mfo eba idab-idab;

mbọọñ mfo esuuk enaa eduọk adudu.

Mbon mfo e-esuana ke anyọñ ikpọabod,

awo ibaaha se ikoot ammọ ibok.

19 Ibaaha se idiikan ukọk fiin;

unan mfo adiitre ke ñkpa.

Afịd mbon se ikop etob ubaña fiin,

ekwak ubọk ammọ ke iduọ mfo,

sia anie awo idiidiọọñọke

ndoom mfo i-imiinieghe utịd?