1 Ke idaha ini mme abiideikpe ekekarake, akañ amaaba ke isọñ. Ndin awodeen keed a-aketooho Betlehem ke Yuda, ye anwaan amọ ye nditọ ideen amọ iba emaekaiya adikidʌñ ke Mọb ke etək ini. 2 Anyịñ awodeen ado akedo Elimelek, anyịñ anwaan amọ akedo Nọọmi, ñko nditọ ideen iba amọ ekekere Mahlọn ye Kiliọn. Ammọ ekedo mbon Efrad ke Betlehem, Yuda. Ndin ammọ emaekaa Mọb ekedʌñọ do.

3 Akem ebe Nọọmi, Elimelek amaakpa, anye adinyʌñ asʌhọ ye nditọ ideen amọ iba. 4 Ammọ emaedọi ibaan Mọb, keed akekere Ọpa, anye ako akekere Rud. Ke ammọ amaakedʌñ do ke ñkpọ nte isua duob, 5 Mahlọn ye Kiliọn emaenyʌñ ekeene ekpañña, Nọọmi adiba ikpọọñ inieghe ayịn me ebe aba.

6 Ke ini Nọọmi aketieghe ke Mọb akop ke Abọọñ aditua mbon amọ mbọm ke adinọ ammọ ndidia, anye ye ibaan nditọ amọ emaebeeñe idem editịmme nto do ñnyọñ ufọk. 7 Anye amaasaña ye ibaan nditọ amọ iba awuọ akpọñ itie anye akesidʌññọ anyʌñ adʌk usʌñ adiidat ammọ ñkewuọ abio Yuda.

8 Ndin Nọọmi amaadọkkọ ibaan nditọ amọ awo iba ate, "Ndufo keedekeed, itịmme inyọñọ, ikaa ufọk eka ndufo. Yak Abọọñ iwọt ndufo mfọnido, kpa naña ndufo eñwọt miin ye mme akpañña ñkpa ebe ndufo mfọnido. 9 Yak Abọọñ anam yak ndufo keedekeed enie mfọn ke iso ebe mfen ake ndufo ediidọ."

Ndin anye amaatʌm ammọ inua anyʌñ akọọm unyọñọ, ammọ emaenyʌñ etua ke akpọsọñ uyio 10 ebo anye ete, "ñnyịn iyaukeene fiin inyọñ ikeene mbon ndufo."

11 Ado Nọọmi amaabo, "Nditọ mmi ibaan, itịmme inyọñ ufọk. Ntak a-ndufo eyemme iñkeene miin-e? Ado nte ami ñyaamaana mman nditọ ideen mfen se ikeme ediidọ ndufo? 12 Nditọ mmi ibaan, itịmme inyọñ ufọk; Ami mmesọñ ñkan se ndọ ebe mfen. Akpekọm ami ñkpekere ke idodanyen asʌk aba annọ miin, akpekọm ñkpedọ ebe akonayio ami ñnyʌñ mmaan nditọ ideen, 13 ndufo eyaebet yak ammọ ekpoon awo? Eyaetre udọ ndọ eda ebet ammọ? Iyoo nditọ ibaan mmi. Anekke adiọọk ye ami sia ubọk Abọọñ awọññọ añkpọñ miin!"

14 Ke ntom ammọ emaana etua enweek. Ndin Ọpa amaatʌm ekaebe amọ inua akọọm anye unyọñ, ado Rud akpa ayịre anye.

15 Nọọmi amaabo, "Sese, ke anwaan ndufo atịmme anyọñ abịne mbon amọ ye mme abasi amọ. Keene anye nyọñ."

16 Ado Rud amaabọọrọ anye ate, "Kuñkpek miin ubo ntịmme ukpọñ fiin me ñkanna iso ukpọñ fiin. Itie nte afo akaa ke ami ndiika, ñko nte afo aba ke ami ndiiba. Mbon mfo ediido mbon mmi ñko Abasi mfo ado Abasi mmi. 17 Itie nte afo akpa ke ami ndiikpa, do ñko ke edimbuuk miin. Yak Abọọñ anam ye ami, kpa idiọọk-idiọọk, adieke ñkpa udiaññake fiin añkpọñ miin." 18 Nọọmi akekịt ke Rud amaabiide adikeene imọ, anye amaatre adikpak anye.

19 Ke ntoro ibaan iba ado emaesaña keed tutu ekesịm Betlehem. Ke ammọ ekedisịmme Betlehem, afịd idʌñ ekpokko ke ntak ammọ, mme ibaan ebọñ ke ñkpaidem "Me Nọọmi akpedo ami?"

20 Anye amaabo ammọ, "Ikiñkoot miin Nọọmi.*" Amaadian do, "Iñkoot miin Mara* (ndod-ndod), sia Andikoñ Ñkan* anam yak uwem mmi ado idod-idod. 21 Ami ñkesaña ayọhọ ñwuọ, ado Abọọñ amben miin ñkaña anyọñ adi. Nsoo ido ntak eñkoodo miin Nọọmi? Abọọñ antʌhọde miin; Andikoñ Ñkan aben ndiọọkiso ansọk miin."

22 Ndin Nọọmi amaato Mọb anyọñ adi asaña ye Rud awonwaan Mọb, anwaan ayịn amọ, adiwuọ Betlehem ke ini idọk baali atọọñọke.