1 Akem Boas amaadọọk akaa inuaatob abio akesuuk atie do nte andifakka isọñ ake anye aketañña abaña adiisaña adiboiyo. Boas amaabo, "Ufan mmi, saña di umi, di suuk tie mi." Ndin anye amaasaña akesuuk atie.

2 Boas amaaben mme ñkpisọñ duob ke abio anyʌñ abo, "Isuuk itie mi," ammọ emaenyʌñ enam ntoro. 3 Ndin anye amaabo andifakka isọñ ado, "Nọọmi, a-aketooho abio Mọb anyọñ adi a-anyam isọñ a-ayịnete ñnyịn Elimelek akenieghe. 4 Ami mmaakere ke akpena nnam yak afo adiọọñọ ñkpọ ami ñnyʌñ mbo yak afo adep ke iso mbon e-etieghe mi ye ke iso mme ñkpisọñ mmi ami. Akpedo afo ayaafakka anye, nam ntoro. Ado akpedo afo umuuduunamma, ndọkkọ miin nọ ami ndiọọñọ. Sia ibaaha awo ndomokeed mfen se inie unen adinam ami imiibọhọke afo, ñko ami ukeene fiin ke edem."

Anye amaabo, "Ami ñyaafakka anye."

5 Ndin Boas amaatañ abo, "Usen ake afo adep isọñ ado ato Nọọmi, afo anyʌñ adep Rud awonwaan Mọb, ebekpa ayịn ado, nọ ato do anyịñ akpañkpa asʌk aba ye inie amọ."

6 Ke ami, andifakka isọñ amaabo, "Akpedo ntoro ami ndiikanna mfakka sia akeme adibiat inie mmi. Afo kappa fakka ke idem mfo. Ami ndiikanna nnam."

7 (Ndin naña akesido ke ido Isrel, ke adifakka ye adiyaak nnọ adinie nsọọñọnda, ana awo keed asio ikpaukod amọ anọ awo anye ako. Ntom ke ekesidat esọọñọ utọ adinam ami ke Isrel.)

8 Ke ntoro andifak isọñ ado amaabo Boas, "Ben dep ke idem mfo." Ndin anye amaasio ikpaukod amọ.

9 Ndin Boas amaabo mme ñkpisọñ ye afịd awo, "Mfịn ami ndufo emedo ntiense ke ami mmedep afịd inie Elimelek, Kiliọn ye Mahlọn nto Nọọmi. 10 Ami mmenyʌñ ndep Rud awo Mọb, ebekpa Mahlọn, nte anwaan mmi, nọ ato do ami nsʌk ñkaiso nnịm anyịñ akpañkpa ye mme inie amọ, mbaak anyịñ amọ adisop ke atu ekpək amọ me ke abio idʌñ amọ. Mfịn ndufo emedo ntiense!"

11 Ndin afịd mme ñkpisọñ ye afịd awo se ikiba ke inuaatob emaebo, "Ñnyịn ido mme ntiense. Yak Abọọñ anam awonwaan a-adʌkkọ adi ufọk mfo aba nte Ratiel ye Lia, e-ekedaaha keed ebọp ekpək Isrel. Afo akpekap anie idaha ke Efrata anyʌñ awuọ etob ke Betlehem. 12 Ato ke nditọ Abọọñ unọọhọ fiin ato abọikpa awonwaan ami, yak ubon mfo aba nte ubon Peres, ake Tama akemanna anọ Yuda."

13 Ndin Boas amaaben Rud anye adido anwaan amọ. Ke ini anye akenamma ima ye anye, Abọọñ amaanam anye ayommo idịb, anye amaanyʌñ aman ayịn. 14 Ibaan emaebo Nọọmi: "Itooro anie Abọọñ i-imiiyakka afo anana andifakka isọñ ke usen ami. Yak anye adiiwuọ etob ke afịd Isrel! 15 Anye ayaademme uwem mfo anyʌñ ukama fiin ke ini usọñ mfo. Sia anwaan ayịn mfo, u-umaaha fiin eti-eti a-anyʌññọ afọn ye afo akan nditọ ideen itiaba, ado andiman anye."

16 Ndin Nọọmi amaaben ayịn ado akama ke ubọk amọ anyʌñ ado adep anọ anye. 17 Mme ibaan e-ekedʌññọ do emaebo, "Nọọmi anie ayịn!" Ammọ enyʌñ esio anye anyịñ Obed. Anye akedo ete Yesi, a-akedooho ete Defid.

18 Ami ndin ado ubon Peres:

Peres akedo ete Hesrọn,

19 Hesrọn ado ete Ram,

Ram abon Aminadab,

20 Aminadab ado ete Nasọn,

Nasọn abon Salmọn,

21 Salmọn abon Boas,

Boas abon Obed,

22 Obed ado ete anọ Yesi,

ndin Yesi abon Defid.