1 Amaaba awodeen keed a-aketooho Ramataim, awo Suuf a-aketooho abio abod Ifrem; anyịñ amọ akedo Elkana ayịn Yeroham, ayịn Elihu, ayịn Tohu, ayịn Suuf, awo Ifrem. 2 Anye akedọ ibaan iba; keed akekere Hana, anye ako akekere Penina. Penina amaanie nditọ ado Hana ikinieghe ndomo keed.

3 Isua ke isua awodeen ami amaasiwuọ ke abio amọ akekpono anyʌñ anam uwa anọ Abọọñ Andikponñkan ke Silo, itie Họfni ye Finehas, nditọ ideen Elai iba ekedooñoke aku Abọọñ. 4 Ini akeedodo a-anaaha nte Elkana anam uwa, anye ayaadeeme mbaak unam anọ Penina anwaan amọ ye nditọ amọ ideen ye ibaan. 5 Ado ake Hana anye akesinọ udeeme awo iba sia adooho anye amaama anye, ñko Abọọñ amaakọp anye idịb. 6 Sia Abọọñ amaakọp Hana idịb, anwaan ufịb amọ amaasima adiyem anye ikọ nọ ato do esịd ayat anye. 7 Ñkpọ ami amaasika iso aba isua ke isua. Ini akeedodo Hana akaaha ufọk Abọọñ ana anwaan ufịb amọ anam esịd ayat anye tutu anye atua anyʌñ atre udia ndidia. 8 Elkana ebe amọ ayaabịp anye abo, "Hana nsoo inam afo atua? Ntak afo umuudiaha ñkpọ-ọ? Nsoo inam esịd ubʌññọ fiin? Ado nte ami mfọnnọ ñkan nditọ duob afo akpenieghe?"

9 Ini keed, ke ammọ emaekedia ñkpọ inyʌñ inwọñ ñkpọ ima ke Silo, Hana amaadakka ada. Idaha ntom, Elai a-akedooho aku mmọdo aketie ke ñkpọitie ke mben usʌñ ufọk Abọọñ. 10 Ke ayọhọ mfʌhọ ye ntuaayịd amọ Hana amaabọñ akam anọ Abọọñ. 11 Anye amaanyʌñ anam akaaña, abo, "Abọọñ Andikponñkan, adieke afo aduuse ukuud ayịnufọk mfo unyʌñ untoiyo miin unyʌññọ ufre ayịnufọk mfo ado anọ anye ayịn, ami ñyaayaak anye nnọ Abọọñ ke afịd ayio uwem amọ, ñko akadañ idiidʌkkọ anye iwuod."

12 Ke anye asʌkkọ abọñ akam anọ Abọọñ akpeene, Elai amaase anye inua. 13 Hana akebọñ akam ke esịd amọ, ndin ñkpọkinua amọ anyeghe ado awo ikoppo uyio amọ. Elai akekere ke ukọd anaam anye. 14 Elai amaanyʌñ abo anye "Ukọd aduunaam fiin ikpeene die? Benne ukọd mfo sio."

15 Hana amaabọọrọ, "Abọọñ mmi, idooho ntoro. Ami ndo awonwaan ake esịd amọ anekkeke atịmede. Ami ñkinwọññọ ukọd me bie; ñkenwañña esịd mmi nnọ Abọọñ. 16 Kuudat ayịnufọk mfo nte awonwaan ibak; ami nsibọñ akam mi ato ke ayọhọ mfʌhọ ye ukuud mmi."

17 Elai amaabọọrọ anye abo, "Nyọñ ke emem ñko yak Abasi Isrel unọ fiin se afo abeeñe ato anye."

18 Anye amaabo, "Yak ayịnufọk mfo akịt mfọn ke iso mfo." Ndin anye awuọ anyọñ akedia ñkpọ, ñko iso amọ itaaha efiad aba.

19 Usiere edem usen ammọ edakka eda etuak iwuod ke iso Abọọñ ndin ammọ etịmme enyọñọ ufọk ammọ ke Rama. Elkana amaanam ima ye Hana anwaan amọ, Abọọñ anyʌñ adise anye. 20 Nte ini akaaha iso Hana amaayommo idịb anyʌñ aman ayịn awodeen. Anye amaasio ayịn ado anyịñ Samwel,* abo, "Sia adooho ami ñkebeeñe anye nto Abọọñ."

21 Ke ini Elkana ebe amọ akesañake ye afịd ufọk amọ adọọk aka adikinọ Abọọñ uwa afịd isua amọ ye adisio akaaña amọ, 22 Hana ikikaaha. Anye akebo ebe amọ, "Ami mmaasio ayịn ke eba, ami ñyaaben anye ñkeyaak nnọ Abọọñ ndin anye ayaadʌñ do ke nsi-nsi."

23 Elkana ebe amọ amaabọọrọ anye, "Nam se afo akịt abo ke ufọn fiin. Ba mi tutu afo asio anye ke eba; ado yak Abọọñ anam ikọ amọ afọn ama." Ke ntoro mma ado amaatie ke ufọk akama ayịn amọ tutu anye awuọ ke eba.

24 Ke anye amaakewuọ ke eba, anye amaaben ayịn amọ naña akesịp ado, asaña ye ayaaraenañ isua ita, ndomuyo ke efa* keed ye akpọ ukọd aben anye adi ufọk Abọọñ ke Silo. 25 Ke emaekewa ayaaraenañ, ammọ emaeben ayịn ado esọk Elai, 26 anye anyʌñ adibo anye, "Dakka nnọ miin, abọọñ mmi. Adaña nte afo aduuho uwem, ami ndo awonwaan a-akedaaha udiana fiin abọñ akam anọ Abọọñ. 27 Ami ñkebọñ akam mbeeñe ayịn ami, Abọọñ anyʌñ annọ miin se ami ñkebeeñe anye. 28 Ke ntoro, idahami ami mmeyaak anye nnọ Abọọñ. Ke afịd uwem amọ ediiyaak anye inọ Abọọñ." Anye amaanyʌñ atuak iwuod anọ Abọọñ do.