1 Sọọl akedo isua edịb mme duob* idaha a-anye akedooho adidem, ndin anye amaakara Isrel ke isua aba* mme iba.

2 Sọọl amaasio ideen tọsịn ita (3,000) ato Isrel; tọsịn iba (2,000) ekeba ye anye ke Mikmas ye ke abod a-abaaha ke Beteel, tọsịn keed (1,000) ekenyʌñ eba ye Yọnatan ke Kibie ke Benyamin. Ideen se ikiyọhọ isʌhọ, anye amaanọ etịmme enyọñọ ufọk ammọ.

3 Akem Yọnatan amaasuan mbon ekọñ nditọ Filistia ke Keba, ndin mbon Filistia emaekop ebaña. Ndin Sọọl amaafịt adukpoñ ke afịd isọñ ate yak afịd Hibru ekop! 4 Ndin afịd Isrel emaekop etob ado: "Sọọl amaasuan mbon ekọñ Filistia, Isrel idahami akedido ubiak anọ mbon Filistia." Ñko emaekoot mbon awo yak ediana ye Sọọl ke Kilkal.

5 Mbon Filistia emaesoobo idem itie keed adinwana ye Isrel, ekama sariọd tọsịn ita (3,000), mbon uwat sariọd tọsịn itiokeed (6,000), ye mbon ekọñ e-ekewakka nte ntan a-abaaha ke mben akpainyañ. Amọ emaewuọ ekenịm nnaaekọñ ammọ ke Mikmas, ke usakkautịn Bed Afịn. 6 Ke ini Isrel ekekịtte ke mbaba mmimọ akpon ñko ke enekke efiik mbon ekọñ mmimọ, ammọ emaekedịbe ke mme abaitiad ye ke mme ikọd ñkukịm, ke ufọọd ikpọitiad ye ke ube ye ke ntotəño itie. 7 Usʌk mbon Hibru emaekaaña Yọdan ekaa idʌñ Kad ye Kilied.

Sọọl akesʌk aba ke Kilkal, ñko afịd udịm se ikiba ye anye ekeba ke ñnyeñidem. 8 Anye amaabet usen itiaba, usen se Samwel akenịm anọ anye; ado Samwel ikidiighe Kilkal, ñko mme ideen Sọọl emaetọọñọ esuana. 9 Ke ntoro anye amaabo, "Iben ufọfọb uwa ye uwa ewuana insọk" Ndin Sọọl amaawa ufọfọb uwa ado. 10 Kpa idaha anye amaaha uwa ado, Samwel abiọññọ, Sọọl amaanyʌñ awuọ akekọọm anye.

11 Samwel amaabịp, "Nsoo ke afo anam?"

Sọọl amaabọọrọ, "Ke ini ami ñkekịtte ke ideen mmi ekesʌk esuana, ñko ke afo ukudiighe idaha a-afo akenịmme, ñko ke mbon Filistia mmọdo ekeboho ke Mikmas, 12 ami mmaakere, ‘Idaha ado mbon Filistia eyaedi embịne miin ke Kilkal ñko ami ñkebọọhọ mfọn nto Abọọñ.’ Ke ntoro ami mmaakere ke akpena nnam ufọfọb uwa."

13 Samwel amaabo Sọọl, "Afo amenam ndisịme ñkpọ. Afo unịmme mbed Abọọñ Abasi mfo akunọọhọ fiin; akpedo afo amaanam, anye akpaawuuk abioubọọñ mfo ke Isrel ke afịd mme ini. 14 Ado idahami, abioubọọñ mfo idiisọọñọke ida; Abọọñ a-ayem awo ake esịd amọ amaaha anyʌñ amek anye andikara ikọd amọ, sia adooho afo unịmme ewʌhọ Abọọñ."

15 Ndin Samwel amaadakka akpọñ Kilkal anyʌñ akaa Kibie ke abio Benyamin, ñko Sọọl amaabat mbon se iba ye anye. Ammọ edo awo ikie itiokeed.

16 Sọọl ye ayịn amọ Yọnatan ye mme ideen ekebaaha ye ammọ ekebañña ke Kibie* ke abio Benyamin, ke ini mbon Filistia ekenịmme nnaaekọñ ammọ ke Mikmas. 17 Mme udịmekọñ emaewuọ ke atu mbon Filistia ke ikpeghe ita. Keed akaa ñkañ Ọfra ke ñkañ Sual. 18 Mfen amaakaa ñkañ Bed Họrọn, ñko ayọhọ ita emaedʌk utịd adaña a-aseeghe Abedeñ Seboyịm a-aseeghe anaan.

19 Awo ikikịtte adomutịm ndomokeed ke afịd isọñ Isrel, sia mbon Filistia emaebo, "Imiidooho ntoro mbon Hibru eyaenam mme akañkañ ye mme eduad!" 20 Ke ntoro afịd mbon Isrel emaekaa ebịne mbon Filistia nọ ekeban mme ukịmisọñ, mme ukwak, mme ekịd ye mme akọbọ. 21 Ekọmudua adiban ukịmisọñ ye ekịd akedo mbakka iba sekel keed* ndin adiban nsọbọ inua ukwak akedo mbakka sekel keed ke mbaak ita*.

22 Ndin ke usen ekọñ baaba awo ekọñ ndomokeed a-akebaaha ye Sọọl me ye Yọnatan a-akenieghe eduad me idañ ikibaaha; sʌk Sọọl ye ayịn amọ Yọnatan ikpọọñ ekenie.

23 Akem mbon Filistia emaewuọ ekaa iboiyo ke Mikmas.