1 Mbon Filistia emaekoot afịd mbon ekọñ ammọ ebʌk ke Afek, ndin Isrel emaenịm nnaaekọñ ammọ ke Yesriil. 2 Nte mme mbọọñ Filistia ekesañake ke ikie (100) ke ikie (100) ye ke tọsịn (1,000) ke tọsịn (1,000), Defid ye mme ikọd amọ ekesaña ke edem ye Akis. 3 Mme adaiso mbon ekọñ Filistia emaebịp, "Mme anie ido mbon Hibru ami?"

Akis amaabọọrọ, "Nte idooho Defid a-akedooho anam utom Sọọl adidem Isrel ado ami? Anye a-ababa ye ami akan isua keed, ndin tọọñọ anye akekpọñ Sọọl adiba ye ami tutu idahami, ami ñkịtte ndudue ndomokeed nto anye."

4 Ado mme adaiso mbon ekọñ Filistia emaeyat esịd ye Akis enyʌñ ebo, "Nọ awo ami atịmme anyọñ, yak anye atịmme akeba ke itie a-afo akebooho anye aba. Inaaha anye asaña ye ñnyịn aka ekọñ, imiidooho ntoro anye ayaakanna ada anwana ye ñnyịn ke ini enwanake ekọñ. Anye akpenam die atịmme anie mfọn ato eteufọk amọ akan anye adikpịkke iwuod ideen ñnyịn? 5 Idooho kpa Defid ami ke ekekwọ ebaña ke ikwọ ammọ idaha eboho

" ‘Sọọl amaawot mme tọsịn (1,000) amọ,

ndin Defid amaawot mme tọsịn duob (10,000) amọ?’ "

6 Ke ntoro, Akis amaakoot Defid anyʌñ abo anye, "Adaña nte Abọọñ aduuho uwem, afo amenen ke mme edinam mfo, ñko ami ñkpaama afo asaña ye ami ke atu ekọñ ami. Tọọñọ ke usen afo akediighe ambịne miin tutu mfịn ami, ami ñkịtte ndudue ndomokeed uto fiin, ado mme adaiwuod uyemme fiin. 7 Tịmme edem idahami nyọñ ke emem; kuunam ñkpọ ndomokeed se iyat mme adaiwuod Filistia."

8 Ado Defid amaabịp Akis, "Nsoo ke ami nam? Nsoo utọ idiọọk ke afo akịt ato awo mfo tọọñọ ke usen a-ami ñkidiighe ubịne fiin tutu idahami? Ntaha ami ndiikeeneke ñkenwana ye mme asua adidem ye abọọñ mmi-e?"

9 Akis amaabọọrọ Defid, "Ami mmediọọñọ ke afo amefọn ke iso mmi nte enyere Abasi; ado mme adaiso ekọñ mbon Filistia ebo, ‘Inaaha anye asaña ye ñnyịn aka ekọñ.’ 10 Ndin bak dakka da, ye nditọufọk eteufọk mfo ekedieghe ye afo, nyʌñ nyọñ ubakusen ayio amaanwaña."

11 Ke ntoro Defid ye mme ikọd amọ emaedakka eda ubakusen enyʌñ etịmme enyọñ idʌñ mbon Filistia, mbon Filistia emaenyʌñ edọọk ekaa Yesriil.