* 1 Ke Sọọl amaakenyọñ adibịne mbon Filistia adi, emaedọkkọ anye ebo "Defid aba ke Akpautatan En Kedi." 2 Ndin Sọọl amaaben iwaad esọññọ idem, awo tọsịn ita (3,000) ato ke afịd Isrel anyʌñ adakka isañ adikiyem Defid ye ikọd amọ ke ñkpere mme abaitiad itie mme Ebod Ikọd.

3 Anye amaadisịm mme abaedọñ e-ebaññake ke usʌñ; abaitiad amaaba do, ndin Sọọl amaadʌk akaa adikikeñ idem. Defid ye ideen amọ ekeba ke ataa edem abaitiad ado. 4 Ideen ado emaebo, "Mfịn ado usen Abọọñ aketañña abaña idaha anye akubooho, fiin ‘Ami ñyaayaak mme asua mfo usịn fiin ke ubọk yak afo anam ammọ naña afo ama.’ " Ndin Defid asọọp ke ndịbe akekpịkke mben afọñ Sọọl.

5 Akema ado esịd amaaduọ Defid ke anye adikpịkke mben afọñidem Sọọl. 6 Anye amaabo ideen amọ, "Abọọñ akan ami adinam eteufọk mmi utọ ñkpọ ado, awo Abọọñ ayette adan, me adituuk anye ubọk; sia adooho anye ado awo Abọọñ amaayet adan." 7 Ke ikọ ami Defid amaasua anọ mme ideen amọ usọp-usọp. Ñko ikiyakka ammọ enwana ye Sọọl. Ndin Sọọl amaakpọñ abaitiad ado akaa uwa amọ.

8 Ndin Defid amaawuọ ke abaitiad akeda abọọñ akoot Sọọl, "Adidem abọọñ mmi!" Ke ini Sọọl akannake anyen ase edem, Defid amaanyuuk iwuod asịn ke isọñ anyʌñ aduọ asịn iso ke isọñ. 9 Anye amaabo Sọọl, "Ntak a-afo asinịmme ke awo amaubo fiin ‘Defid a-abiide adunọmọ fiin’? 10 Usen mfịn afo amekịt ke anyen mfo naña Abọọñ uyaak fiin ansịn miin ke ubọk ke abaitiad. Usʌk awo emaebo yak ami uwot fiin, ado ami mmaunịm fiin uwem; Ami mmaabo idem mmi, ‘Ami ndiituuhọ abọọñ mmi sia anye ado awo Abọọñ amaakeyet adan.’ 11 Sese, ete mmi, se utọñ afọñ mfo ke ubọk mmi! Ami mmaakpịkke utọñ afọñ mfo ado ñkuwotto fiin. Se, ke ñkpọ nte keed ibaaha ke ubọk mmi awọttọ ke ami mmudue fiin me ke mme ntịdutọñ. Ami udueghe fiin, ado afo asʌk ayem adiñwot miin. 12 Yak Abọọñ akpe ikpe ke ufọọd mmi ye afo. Ñko yak Abọọñ asio usiene idiọọk a-afo annamma miin, ado ubọk mmi iduutuuho fiin. 13 Nte akaan ikọ esed a-abooho, ‘Idiọọk ñkpọ ato ke idiọọk awo,’ ke ntoro ubọk mmi iduutuuho fiin."

14 "Adidem Isrel awuọ ayem anie awo? Anie ke afo abịne? Adukpo ewa? Abịne ndañ? 15 Yak Abọọñ ado akpe ikpe iwuod ñnyịn anyʌñ ase ke ufọọd ñnyịn. Yak anye anduuñọ miin anyʌñ anam unen. Yak anye antoppo miin ikpe ke adinsio miin ke ubọk mfo."

16 Ke Defid amaaketañ ado ama, Sọọl amaabịp, "Defid ayịn mmi, uyio mfo adodo?" Ndin anye amaatua ke akpọsọñ uyio. 17 Anye amaabo Defid, "Afo amenen añkan miin. Afo ameñwọt miin mfọn, ado ami mmenam idiọọk ye afo. 18 Afo amendọkkọ miin abaña mfọn a-afo akefọnnọ ye ami; Abọọñ amañyaak miin usịn fiin ke ubọk, ado afo uñwotto miin. 19 Ke ini awo akịtte asua amọ, anye asiyaak anye adakka ke imiinamma anye ñkpọ? Yak Abọọñ unọ fiin eti utịb ke naña afo anam ñkpọ ye ami mfịn ami. 20 Ami mmediọọñọ ke afo ayaado adidem ke Isrel ñko ke abioubọọñ Isrel adiisọọñọ ida ke ubọk mfo. 21 Idahami nwọñọ ñkpọ nnọ miin ke anyịñ Abọọñ bo ke imọ idiiwotto ubon mmi me isọọk anyịñ mmi isio ke ekpək ete mmi."

22 Ndin Defid amaanọ Sọọl unwọñọ amọ. Akem Sọọl atịmme anyọñ ufọk ke ini Defid ye mme ideen amọ emaekedọọk ekaa akpọsọñ itie ado.