1 Abọọñ amaabo Samwel, "Afo uduufʌhọ Sọọl yak akpeene die, sia adooho ami mmesịn anye nte adidem ke Isrel? Tọkkọ adan sịn yak ayọhọ ke nnʌk mfo nyʌñ dakka isañ dʌk usʌñ; ami mmudọñ fiin nnọ Yesi ke Betlehem. Ami mmemek ayịn awodeen amọ keed nte adidem."

2 Ado Samwel amaabo, "Ami ndiisaña die ñka? Adieke Sọọl akoppo abaña, anye ayañwot miin."

Abọọñ amaabo, "Ben ñkpʌk ñyịn umanenañ kama kaa nyʌñ bo, ‘Ami mmedi adinam uwa nnọọ Abọọñ.’ 3 Koot Yesi yak adiwuana ke uwa, ndin ami ñyauwọt fiin se adiinam. Ana afo ayet awo ake ami nduuwọt fiin adan."

4 Samwel amaanam se Abọọñ akebo. Ke ini anye akesịmme Betlehem, mme ñkpisọñ abio emaenyeñ idem ke ini ammọ ekekịtte anye. Ammọ emaebịp, "Afo adi ke emem?"

5 Samwel amaabọọrọ, "Ii, ke emem; ami ndi adiwa uwa nnọọ Abọọñ. Ndufo inam idem ndufo asana inyʌñ iñkeene miin idi uwa." Ndin anye amaanam Yesi ye nditọ amọ ideen esana anyʌñ akoot amọ edi uwa.

6 Ke ini ammọ ekesịmme, Samwel amaakịt Eliab anyʌñ akere "Ke akpanikọ anye Abọọñ ayette adan ada ami ke iso Abọọñ."

7 Ado Abọọñ amaabo Samwel, "Kuuse naña anye aba me unyọọñ amọ, sia adooho ami mmesịn anye. Abọọñ isiseeghe mme ñkpọ se mme awo ese. Mme awo esise anyọñidem awo ado Abọọñ ase esịd."

8 Ndin Yesi amaakoot Abinadab anam anye asaña aboiyo Samwel ke iso. Ado Samwel amaabo, "Abọọñ imekke anye ami ñko." 9 Yesi amaanyʌñ anam Sama asaña aboiyo. Ado Samwel amaabo, "Abọọñ inyʌññọ imek anye mmi." 10 Yesi amaanam nditọ ideen amọ itiaba esaña eboiyo Samwel ke iso, ado Samwel amaabo anye, "Abọọñ imekke mbio ami." 11 Akema, anye amaabịp Yesi, "Ukweeñe nditọ ideen se afo anie edoñño ami?"

Yesi amaabọọrọ, "Andisịb ñkan mmọdo. Anye akpeme edọñ."

Samwel amaabo, "Dọñ ekoot anye; ñnyịn idiisuuho itie tutu anye anyọñ adi."

12 Ke ntoro, anye amaadọñ ekekoot anye anyʌñ anam eben anye edʌk edi. Anye amaanekke akop nsọñidem anyʌñ anie uyaiya ikpaidem anyʌñ ado uyaiya awodeen.

Ndin Abọọñ amaabo, "Dakka da yet anye adan; anye ado ami."

13 Ke ntoro, Samwel amaaben adan ke nnʌk anyʌñ ayet anye ke iwuod ke iso nditọeka amọ, ndin tọọñọ ke usen ado, Sịbidịd Abọọñ adidoro ke idem Defid ekamba-ekamba. Ndin Samwel amaanyọñ Rama.

14 Akem Sịbidịd Abọọñ amaawuọ akpọñ Sọọl, ndin ndedeghe* sịbidịd a-atooho Abọọñ adidoro anye ke iwuod atịmede anye.

15 Nditọufọk Sọọl emaebo anye, "Sese, idiọọk sịbidịd a-atooho Abasi u-utʌkkọ fiin. 16 Yak abọọñ ñnyịn anọ nditọufọk amọ uyio ke mmi yak eyem awo se ikan ibre ndidoudʌk. Anye ayaabre ke ini idiọọk sịbidịd a-atooho Abasi udoroke fiin ke iwuod, ndin afo ayaakop nsọñidem."

17 Sọọl ndin amaabo ayịnufọk amọ, "Yem awo se ikan inekke ibre ben nsọk."

18 Ayịnufọk amọ keed amaabọọrọ abo, "Ami mmekịt ayịn Yesi a-atooho Betlehem a-adiọọñọke naña esibre ndidoudʌk. Anye ado awo uko ye awo ekọñ. Anye adiọọñọ naña etañ ikọ anyʌñ ado uyaiya awodeen. Ñko Abọọñ aba ye anye."

19 Ndin Sọọl amaadọñ isʌñutom utom anọ Yesi abo, "Nọ Defid ayịn mfo a-abaaha ye mme edọñ ensọk miin." 20 Ndin Yesi amaaben dọñki a-akebenne uyo, ukọd ke ikịm ye ñyịn ebod anọ ayịn amọ Defid yak adat asọk Sọọl.

21 Defid amaadika abịne Sọọl anyʌñ akenam utom anọ anye. Sọọl amaanekke ama anye, ndin Defid amaakeene ado keed ke atu mme akama ñkpọ ekọñ amọ. 22 Ndin Sọọl amaadọñ utom anọ Yesi ate, "Yak Defid aba ye ami sia ami mmenem esịd ye anye."

23 Ini keed akeedodo sịbidịd a-atooho Abasi adoroke Sọọl ke idem, Defid ayaaben ndidoudʌk amọ abre. Ntoro ke idem adiifeere Sọọl; ayaafọn anye ke idem, ñko idiọọk sịbidịd ado ayaakpọñ anye.