1 Ndin Samwel amaaben ekpeme adan ọlif aduọk Sọọl ke iwuod anyʌñ atịm anye inua abo, "Nte Abọọñ uyette fiin adan ibo ado andikara anọ udeeme amọ? 2 Afo umauñkpọñ miin mfịn ami, afo ayaakịt ideen iba ke ñkpere udi Ratiel, ke Selsa ke adaña Benyamin. Ammọ eyaubo fiin, ‘Mme dọñki afo akekaaha adiyem, emaekịt. Ñko idahami ete mfo atre adikere mbana ammọ akappa ayeeme nsia ubaña fiin.’ " Anye abo, "Ndiinam die mbaña ayịn awodeen mmi?"

3 "Ndin afo ayaakaa iso asaña tutu afo akesịm itie ekamba eto Tabọ. Ideen ita e-edọọhọ eka edikpono Abasi ke Beteel eyausoobo fiin do. Keed adiikama ñyịn ebod ita, mfen akama uyo ita, keed ako akama atu ukọd. 4 Ammọ eyaukọọm fiin enyʌñ unọ fiin uyo iba, afo ayaabọ ammọ."

5 "Ke ado amaaboiyo, afo ayaakaa Kibie ake Abasi, i-itie ukpeme mbon Filistia abaaha. Nte afo akpereke abio ado, afo ayaakịt udịm mme prọfed nte eto ñkoñ-ñkoñ itie edi ekama mme ndidoudʌk, mme ibịdubọk, mme adʌk ye mme ekpa ebre ekeene ammọ, ndin ammọ esʌk etañ prọfesi. 6 Ndin Sịbidịd Abọọñ ayaudoro fiin ke idem akpọsọñ-akpọsọñ, ndin afo ayaakeene ammọ atañ prọfesi; ñko afo ayaakappa ado awo mfen. 7 Ndin mme idiọọñọ ami emaewuọ ewọt idem, nam se adodo ake ubọk mfo atuuhọ adinam, sia Abasi mmọdo aba ye afo."

8 "Mbem miin iso kaa Kilkal. Ke akpanikọ, ami nsʌk ndi ubịne fiin adinam ufọfọb uwa ye uwa adidiana keed, ado ana afo aba usen itiaba tutu ami ndi ubịne fiin ndudọkkọ fiin se afo adiinam."

9 Adikem ke idaha Sọọl akewọññọke akpọñ Samwel, Abasi amaakpəho esịd Sọọl, ndin afịd mme idiọọñọ ado amaawuọ awọt idem usen ado. 10 Ke ini anye ye ayịnufọk amọ ekesịmme Kibie, udịm mme prọfed esoobo ye anye; Sịbidịd Abasi amaadoro anye ke idem ekamba-ekamba, ndin anye amaakeene ammọ atañ prọfesi. 11 Ke ini afịd mbon se imaikidọdiọọñọ anye ekekịtte anye nte atañ prọfesi, ammọ emaebịp emọ-emọ ete, "Nsoo ñkpọ itịppe ntom inọ ayịn Kisi? Nte Sọọl asịne ke atu mme prọfed?"

12 Awodeen a-akedʌññọ do amaabọọrọ, "Anie ado ete ammọ?" Ke ntoro adikappa ado ufiid: "Nte Sọọl asịne ke atu mme prọfed?" 13 Ke Sọọl amaaketañ prọfesi ima, anye amaadakka akaa ñkoñ-ñkoñ itie.

14 Akem ayịneka ete Sọọl amaabịp anye ye ayịnufọk amọ abo, "Ndufo ekeba ke mmọọ?"

Anye amaabọọrọ, "Adikiyem mme dọñki. Ado sia ñnyịn ikikịt ke awo ikikịtte ammọ, ñnyịn imaikaa ibịne Samwel."

15 Ayịneka ete Sọọl amaabo, "Ndọkkọ se Samwel akibo ndufo."

16 Sọọl amaabọọrọ, "Anye akidọkkọ ñnyịn ke emaekịt mme dọñki." Ado anye ikidọkkọke ayịneka ete amọ se Samwel aketañ abaña udaubọọñ amọ.

17 Samwel amaanọ nditọ Isrel ewʌhọ ate eboho ke atọ Abọọñ ke Mispa 18 amaanyʌñ abo ammọ, "Se Abọọñ, Abasi Isrel atañ ado ami: ‘Ami ñkesio Isrel ke isọñ Iyib, ñko ami ñnyaaña ndufo nsio ke adudu Iyib ye afịd idịd e-ekifiighe ndufo.’ 19 Ado idahami ndufo emesịn Abasi ndufo, a-akinyaañake ndufo asio ke afịd ukuud ye mbaba. Ndin ndufo emebo, ‘Iyoo, mek adidem inọ ñnyịn.’ Ndin idahami, idida ke iso Abọọñ ke esiin ye ubon ndufo."

20 Ke Samwel amaakenam afịd Isrel ewuọñọ edi ke esiin ke esiin, emaekama ukañ esio ubon Benyamin edat. 21 Ndin anye amaasio esiin Benyamin adaaha ke ekpək ke ekpək, ndin emaemek ubon Matri. Ke akpatre emaemek Sọọl ayịn Kisi. Ado ke ini ekeyemme anye awo ikikịtte anye. 22 Ke ntoro, ammọ emaana ebịp Abọọñ "Nte awo ado adi mmi diin?"

Abọọñ amaanyʌñ abọọrọ, "Ii, ado anye adịbe ke atu ñkpoduoho."

23 Ammọ emaefeghe ekesio anye edi, ndin ke ini anye akewuọhọ ada ke atu awo anye amaanyọọñ akan afịd awo se ikida. 24 Samwel amaabo afịd mbon awo, "Nte ndufo emekịt awodeen se Abọọñ amek? Ibaaha awo se iba nte anye ke atu afịd mbon awo."

Ndin mbon awo emaebọñ, "Itọñ uwem asọñ adidem!"

25 Samwel amaanam anwaña mbon awo se unen ye utom adidem ado. Anye amaawet ammọ ke ikpañwed anyʌñ anịm ke iso Abọọñ. Ndin Samwel amaasuan mbon awo ate enyọñ ufọk ammọ.

26 Sọọl ñko amaanyʌñ anyọñ ufọk amọ ke Kibie, asaña ye mme uko ideen ake Abasi amaaketuuk esịd ammọ. 27 Ado usʌk mme abʌd-abʌd awo emaebo, "Utọ awo ami abiinam die inyaaña ñnyịn?" Ammọ emaese anye ke ndek inyʌññọ iben enọ ndomokeed isọk anye. Ado Sọọl ikisioho uyio.