1 Mbon Siif emaekaa ebịne Sọọl ke Kibie ekebo, "Idooho Defid adịbe ke abod Hakila, a-asakkaiso ase Yesimọn?"

2 Ke ntoro Sọọl amaadidakka akaa Akpautatan Siif, ye mbon ekọñ Isrel tọsịn ita (3,000) ake anye akesatta asio, adikiyem Defid ke ndo. 3 Sọọl amaanam itie nnaa amọ ke mben usʌñ ke abod Hakila a-aseeghe Yesimọn, ado Defid akeba ke anaan. Ke ini anye akịtte ke Sọọl ikeene imọ adi ndo, 4 Defid amaadọñ mbon uyeb anyʌñ adiọọñọ ke akpanikọ ke Sọọl amaadiwuọ.

5 Ndin Defid amaasaña awuọ akaa itie nte Sọọl akenịm itie nnaa amọ. Anye amaakịt itie nte Sọọl ye Abna ayịn Nee, adaiso mbon ekọñ, ekesuuk enaa. Sọọl akena ke esịd itie nnaa, ndin mbon ekọñ emaenaa ekanna anye ekʌk.

6 Defid amaabịp Ahimelek awo Hed ye Abisai ayịn Seruya, ayịneka awodeen Yoab, "Anie awo idiñkeene miin ikaa nnaaekọñ Sọọl?"

Abisai amaabo, "Ami ñyaukeene ñka."

7 Ke ntoro Defid ye Abisai emaekaa itie ekọñ akonayio, ndin do ke Sọọl akenaa asʌk adaiya ke esịd itie nnaa ndin eduad amọ awʌhọ ke isọñ ke mben iwuod amọ. Abna ye mbon ekọñ emaenyʌñ enaa ekpere anye.

8 Abisai amaabo Defid, "Mfịn Abasi ayaak asua mfo usịn fiin ke ubọk. Yak ndat eduad ñkịm anye ndian ke isọñ ini keed; ami ndiikịmme anye akañ iba."

9 Ado Defid amaabo Abisai, "Kuusobo anye! Anie ikpikan ituuk awo se Abọọñ amaakeyet adan ndin atre adidue isob?" 10 Defid amaabo, "Adaña nte Abọọñ abaaha ke uwem, Abọọñ ke idem amọ adiiwot anye, imiidooho ntoro ini amọ ayaadi ndin anye ayaakpa, imiidooho anye ayaakaa ekọñ aketak. 11 Ado Abọọñ akan ami adituuk awo ake Abọọñ amaakeyet adan ubọk. Ndin dịppe eduad ye atu mmọọñ a-anaaha do akpere iwuod amọ di yak inyọñ."

12 Ndin Defid amaadịppe eduad ye atu mmọọñ akekpereke iwuod Sọọl, ndin ammọ enyʌñ edaaña. Ikibaaha awo se ikikịt me idiọọñọ ibaña, ikinyʌññọ iba awo se ikidemme. Afịd ammọ ekesʌk edaiya, sia Abọọñ amaatọ ammọ idab ammọ enekke edaiya.

13 Ndin Defid amaakaaña ada ke edem ñkañ uko ke anyọñ abod ke itie a-akemaanake asanna; ekamba ukpa amaanaa ke ufọọd ammọ. 14 Defid amaada akoot mbon ekọñ ye Abna ayịn Nee, "Abna, afo ubooho umbọọrọ miin?"

Abna amaabọọrọ, "Afo ado anie a-akoodo adidem?"

15 Defid amaabo Abna, "Afo ado awodeen, idooho ntoro? Ñko anie awo iba nte afo ke Isrel? Ntaha afo umuukukpemeke adidem abọọñ mfo? Awo amaadi adiwot adidem abọọñ mfo. 16 Se afo anam ifọnnọ. Adaña nte Abọọñ aduuho uwem, afo ye ideen mfo ana ekpañña, sia ndufo ikikpemeke eteufọk ndufo, anye ake Abọọñ akeyette adan. Ise ikanna idem ndufo. Mmọ eduad ye atu mmọọñ adidem e-ekebonoke ekpere iwuod amọ?"

17 Sọọl amaadiọọñọ uyio Defid anyʌñ abo, "Defid ayịn mmi, uyio mfo adodo."

Defid amaabọọrọ "Ii anye ke do adidem abọọñ mmi." 18 Anye amaamaana adian do, "Nsoo ido ntak abọọñ mmi adubịnneke ayịnufọk amọ? Nsoo ke ami nnam, ñko nsoo idiọọk ke ami ndue? 19 Ndin yak adidem abọọñ mmi akpañ utọñ anọ ikọ ayịnufọk amọ. Adieke adooho Abọọñ udọọñ fiin yak ambịne miin, yak anye abọ uwa. Ado adieke adooho ke usʌñ ndomokeed anye ado awo anam ami, yak isuuñọ akeene ammọ ke iso Abọọñ! Ammọ embịne miin mfịn esio ke udeeme mmi ke inie Abọọñ, ndin ammọ embo miin, ‘kaa ke kpono abasi mfen.’ 20 Ndin kuuyak nọ iyiib mmi aduọkkọ ke isọñ anyọọñ akpọñ iso Abọọñ. Adidem Isrel amaawuọ adi adiyem ndañ, nte awo ayem asasa inuen ke mme ikpọabod."

21 Ndin Sọọl amaabo, "Ami mmenam idiọọkñkpọ. Defid ayịn mmi tịmme di. Sia adooho afo amedat uwem mmi nte ñkpọuto mfịn ami, ami ndiiyemme unọmọ fiin aba. Ke akpanikọ ami mba nte ndisịme mmenyʌñ nnekke ndue."

22 Defid amaabọọrọ, "Sese eduad adidem mi. Yak awo keed ke atu ñkparawa ndufo akanna adibọ. 23 Abọọñ anọ afịd awo utịb adinenido ye akpanikọ ammọ. Abọọñ amauyaak fiin ansịn miin ke ubọk mfịn ami, ado ami ndiinyanna ubọk ntuuk anye ake Abọọñ amaakeyet adan. 24 Kpa naña ami mbat uwem mfo nte ekamba ñkpọ mfịn ami, ñko yak Abọọñ abat uwem mmi nte ekamba ñkpọ ndin añnyaaña miin asio ke afịd afanekọñ."

25 Ndin Sọọl amaabo Defid, "Yak adidiọñ usịm fiin, Defid ayịn mmi; afo ayaanam ekamba ñkpọ anyʌñ anie edikan."

Ke ntoro Defid amaakaa uwa amọ, Sọọl amaanyʌñ atịmme anyọñ ufọk.