1 Adikem ke Samwel amaakesọñ, anye amaasio ayịn amọ awodeen nte adadusʌñ* ke Isrel. 2 Akpa ayịn ammọ akekere Yuel ndin udiana akekere Abiya, ammọ ekenyʌñ enam utom ke Beeseba. 3 Ado nditọ ideen amọ ikikeeneke usʌñ amọ. Ammọ emaewakka ekeene idiọọk udod enyʌñ ebọ ubọkedem enyʌñ ekpe ukwañ ikpe.

4 Akem afịd mme ñkpisọñ ke Isrel emaeboho itie keed enyʌñ edika ebịne Samwel ke Rama. 5 Ammọ emaekebo anye, "Afo amesọñ, ñko nditọ mfo ikeeneke usʌñ mfo; ke ntoro, sio adidem inọ ñnyịn nọ idat* ñnyịn usʌñ, kpa naña mme idịd mfen enie."

6 Ado ini a-ammọ ekebooho, "Inọ ñnyịn adidem yak idat ñnyịn usʌñ," ado ikinemme Samwel esịd; ke ntak ado anye amaabọñ akam anọ Abọọñ. 7 Ndin Abọọñ amaabo Samwel: "Kpañ utọñ kop afịd se mme awo ami ubo fiin; idooho afo ke ammọ esịn ado ammọ ensịn miin nte adidem ammọ. 8 Kpa naña ammọ ekenam tọọñọ ke usen ami ñkesioho ammọ ke isọñ Iyib tutu adiwuọ usen mfịn, ekaiso ensịn miin ekekpono mme abasi mfen, ntoro ke ammọ enam ye afo. 9 Idahami kpañ utọñ nọ ammọ; ado nekke dʌt ammọ utọñ nyʌñ nam nọ ammọ ediọọñọ se adidem a-adiikara ammọ adiidat nte unen imọ."

10 Samwel amaatañ afịd ikọ Abọọñ anọ afịd mbon e-ekebịppe anye ebaña adidem. 11 Anye amaabo ammọ, "Se adidem a-adiikara ndufo adiiyem nte unen amọ ado ami: Anye ayaakoono nditọ ideen ndufo anam ammọ enam utom ye mme sariọd ye mme enañmbakara amọ, ndin ammọ eyaefeeñe ke iso mme sariọd amọ. 12 Anye ayaanam usʌk ammọ edoñño mme adaiso ekọñ ke atu mme tọsịn (1,000) ye usʌk mme adaiso ekọñ ke atu mme aba mme duob, ñko usʌk eyaefʌñ isọñ amọ enyʌñ edọk idọk inwañ amọ, ndin usʌk eyaedo mme anam ñkpọ ekọñ amọ ye ukwak sariọd amọ. 13 Anye ayaaben nditọ ibaan ndufo anam edoñño mbon se iyet awo inem ufịk adan ye mme atem ndidia ye mbon unam ndomuyo. 14 Anye ayaaben inwañ ndufo se ifọọn ikan ye inwañ fain ye inwañ ọlif anyʌñ ayaak anọ nsaña amọ. 15 Anye ayaaben mbaak keed ke itie duob ke mme abakpa ye mme inwañ fain ndufo anọ mme adaaha ye nsaña amọ. 16 Anye ayaaben mme nditọufọk ndufo ideen ye ibaan ye nti enañ ndufo se ifọọn ikan ye mme dọñki ndufo adat anọ idem amọ. 17 Anye ayaaben keed ke mbaak duob ufene ndufo, ñko ndufo ke idem ndufo eyaekappa edoñño ifʌn enọ anye. 18 Ke usen ado amaadisịm, ndufo eyaetua eyem ubọkkọ ke ubọk adidem a-ndufo ekemekke mi, ado Abọọñ idiibọọrọke ndufo ke usen ado."

19 Ado mme awo emaesịn adikpañ utọñ nnọ Samwel. Ammọ emaebo, "Iyoo! Ñnyịn iyem adidem adikara ñnyịn. 20 Ndin ñnyịn iyaiba nte mme idịd mfen, inie adidem se idat ñnyịn usʌñ inyʌñ isiboiyo iso ekọñ ikinwana inọọ ñnyịn."

21 Ke ini Samwel amaakekop afịd se mbon awo eketañ, anye amaaben akedọkkọ Abọọñ. 22 Abọọñ amaabọọrọ anye abo, "Kpañ utọñ nọ ammọ ñnyʌñ nọ amọ adidem."

Ndin Samwel amaabo nditọ Isrel, "Afịd awo itịmme inyʌñ isọñ idʌñ ndufo."