1 Ndin ikọ Samwel adi afịd Isrel.

Akem nditọ Isrel emaewuọ ekaa ekọñ ye mbon Filistia. Nditọ Isrel ekenam nnaaekọñ ammọ ke Ebenesa, mbon Filistia enam ake ammọ ke Afek. 2 Akem mbon Filistia etịm udịmekọñ ammọ nọ ekesoobo ye Isrel, ñko naña ekọñ akaiso atara, mbon Filistia emaekan nditọ Isrel, ewot awo ñkpọ nte ikie inaañ (400) ke ikọdekọñ. 3 Ke ini mbon ekọñ etịmmeke enyọñ itie nnaaekọñ ammọ, mme ñkpisọñ ke Isrel ebịp ebo, "Nsoo inam yak Abọọñ anam nọ mbon Filistia ikan ñnyịn ntom? Yak ikaa Silo ikiben akebe edioomo Abọọñ nọ anye adisaña ye ñnyịn inyaaña ñnyịn asio ke ubọk mme asua ñnyịn."

4 Ke ntoro, ibon ado emaesio ideen edọñ nnọ ekaa Silo, ekeben akebe edioomo Abọọñ Andikponñkan, anye a-atieghe ke ufọọd mme serubim. Ñko nditọ ideen Elai iba, Họfni ye Finehas, mmọdo ekeba do ye akebe edioomo Abasi.

5 Ke ini akebe edioomo Abọọñ akediighe itie nnaaekọñ, afịd Isrel emaesio ñkpo ekamba-ekamba tutu isọñ anyeghe. 6 Ke adikop ñkpoyo, mbon Filistia emaebịp ebo, "Nsoo iben afịd uyom ami idi ke itie nnaaekọñ mme Hibru?"

Ke ammọ ekoppo ke akebe edioomo Abọọñ adʌk adi itie nnaaekọñ, 7 idem amaanyeñ mbon Filistia. Ammọ emaebo, "abasi* a-adi nnaaekọñ. Ñnyịn imitak! Utọ ñkpọ anyem kpaanaanam itịppeke akpa. 8 Ñnyịn imitak! Anie awo idiifak ñnyịn isio ke ubọk mme ñkpọsọñ abasi ami? Ammọ edo mme abasi ekenọọhọ nditọ Iyib mme unọmọ ke utọ ke utọ ke anaan. 9 Isọñ idem, ndufo mbon Filistia! Edoñño ideen, imiidooho ntoro ndufo ediido ifʌn enọọ mbon Hibru, naña ammọ ekedo inọọ ndufo. Idoñño ideen enyʌñ enwana ekọñ!"

10 Ke ntoro, mbon Filistia emaenwana ekọñ enyʌñ ekan nditọ Isrel, ndin afịd awo enyʌñ efeeñe enyọñọ atayad ammọ. Uwot awo amaanekke akpon; mbon ekọñ Isrel tọsịn edịb mme duob (30,000) eketak. 11 Emaebọ akebe edioomo Abasi, ñko nditọ Elai naña iba, Họfni ye Finehas emaekpañña.

12 Kpasʌk usen ado awo ubon Benyamin amaasiak itọk tọọñọ ke iso ekọñ akesịm Silo ye ñwaiya afọn ye ntọñ ke iwuod. 13 Ke anye asịmme, Elai mmọdo aketie ke ñkpọitie ke mben usʌñ ase, sia adooho idem amaanyeñ anye ke ntak akebe edioomo Abasi. Ke ini awo ami adʌkkọ idʌñ atañ se itịppe, afịd idʌñ emaetọọñọ aditua.

14 Elai amaakop akpọsọñ ayịd ado anyʌñ abịp abo, "Nsoo ido ntak ñkpoyo ami?"

Ete ado amaasọp akanna abịne Elai, 15 Elai akedo isua anaañ mme duob mme itiaita ndin anyen amọ amaakịm ndin anye ikikanna imọọnọ ñkpọ. 16 Anye amaabo Elai, "Ami nto udịmekọñ ndi idaha ado; ami nto do mfeghe ndi usen mfịn."

Elai amaabịp anye abo, "Ayịn mmi nsoo ñkpọ ido?"

17 Ete a-akebenne etob ado adi amaabọọrọ abo, "Isrel emaefeeñe ke iso mbon Filistia, ndin e-ekan mbon ekọñ ñnyịn, mbon ñnyịn e-enyʌñ enekke ekpañña. Ñko nditọ mfo iba, Họfni ye Finehas, ekpañña, enyʌñ ebọ akebe edioomo Abasi."

18 Ke ini anye atañña ikọ akesiak akebe edioomo Abasi, Eli amaadiañña ke ñkpọitie amọ aduọ edem-edem ke mben inuaatob. Itọñ amaabʌññọ anye, anye anyʌñ akpa, sia adooho anye akedo akaanadeen, ñko anye amaadoppo. Anye amaadat* Isrel usʌñ ke isua aba.

19 Anwaan ayịn amọ, anwaan Finehas, akesaña ye idịb ndin amaakpere ini uman amọ. Ke ini anye akoppo ke e-eben akebe edioomo Abasi ñko ke ete ebe amọ ye ebe amọ emaekpañña, uman amaatọọñọ anye inikeed-inikeed; anye amaaman ayịn ado ubiakuman amaakan anye ubọk. 20 Ke anye ayemme ikpa, ibaan e-ekebaaha ye anye emaebo, "Kuukop mmemidem ke afo ameman ayịn." Ado anye ikibọọrọke inyʌññọ inọ ñkpañutọñ.

21 Anye amaasio ayịn ado anyịñ Ikabọd, anyʌñ abo, "Ubọọñ* amaakpọñ Isrel" ato ke ntak ebenne akebe edioomo Abasi ye ke ntak ñkpa ete ebe ye ebe amọ. 22 Anye amaabo, "Uku akpọñ Isrel sia eben akebe edioomo Abasi."