1 Samwel amaabo afịd Isrel ate, "Ami mmaakpañ utọñ nnọ afịd se ndufo eketañ ye ami ñko mmenam adidem inọ ndufo. 2 Idahami ndufo emenie adidem nte adat usʌñ. Amaado ami, ami mmesọñ ñnyʌñ mfịd iwad, ñko nditọ mmi mmọ mi ye ndufo. Ami mmaado adadusʌñ ndufo tọọñọ ke uyịn mmi tutu adiwuọ usen mfịn. 3 Se ami ndaaha mmi. Itañ ikọ ntiense indian miin ke iso Abọọñ ye mbon a-anye ayette adan. Abaakenañ anie ke ami mben kpaanam? Dọñki anie ke ami mben kpaanam? Anie ke ami ntʌk akpa? Anie ke ami mfiik? Anie ke ami mbọ ubọkedem kpaanam adibọp anyen nnọ idiọọk? Akpedo ami mmenam ndomokeed ke atu mme ñkpọ ami akpa, ñyaanam yak afọñ."

4 Ammọ emaebọọrọ, "Afo utʌkkọ unyʌññọ ufiik ñnyịn. Afo unyʌññọ ubọ ñnyịn ñkpọ ndomokeed ke ubọk kpaanam."

5 Samwel amaabo ammọ, "Abọọñ ado atie ntiense inọ ndufo, ñko mbon se anye ayet adan etie ntiense enọ usen mfịn, ke ndufo ikịtte ñkpọ ndomokeed ke ubọk mmi."

Ammọ emaebo, "Anye ado ntiense."

6 Ndin Samwel amaabo mme awo ate, "Ado Abọọñ akeyet Moses ye Erọn adan anyʌñ aben mme eteete ndufo asio ke isọñ Iyib. 7 Idahami ndin, ida mi, sia ami ñyaaben mme ñkpọ mme ñkpọ ye idiọọñọ ke iso Abọọñ iwọt ndufo afịd mme ndinen utom se Abọọñ akenam inọọ ndufo ye mme eteete ndufo."

8 "Ke Yekọb amaakedʌk Iyib, ammọ emaeseeme enọ Abọọñ eyem unwam, Abọọñ amaanyʌñ adọñ Moses ye Erọn, ekesioño mme eteete ndufo ke isọñ Iyib eben ammọ edinọ itie ami.

9 "Ado ammọ emaefre Abọọñ Abasi ammọ; ke ntak ado, anye amaanyam ammọ anọ Sisera, a-akedooho adaiso mbon ekọñ Hasọ, ye ke ubọk mbon Filistia ye adidem Mọb, e-ekenwanake ekọñ ye ammọ. 10 Ammọ emaeseeme enọ Abọọñ enyʌñ ebo, ‘Ñnyịn iminam idiọọkñkpọ; ñnyịn imiwuọ ikpọñ Abọọñ inyʌñ ikikpono Baal ye Astọred. Ado idahami inyaaña ñnyịn isio ke ubọk mme asua ñnyịn, ndin ñnyịn iyainam ñkpọ unọ fiin.’ 11 Ndin Abọọñ amaadọñ Yerub-Baal,* Barak,* Yefta ye Samwel,* ndin anye amainyaaña ndufo asio ke ubọk mme asua ndufo i-ikannake ndufo ekʌk, nọ ato do ndufo edʌñ ke ifuuro.

12 "Ado ke ini ndufo ekekịtte ke Nahas adidem mbon Amọn asʌk adi adinwana ye ndufo, ndufo emaembo miin, ‘Iyoo ñnyịn iyem adidem yak adikara ñnyịn,’ akpesʌkado Abọọñ Abasi ndufo akedooho adidem ndufo. 13 Sese ndin adidem ake ndufo ekemekke, anye a-ndufo ekebeeñeke; ise do ke Abọọñ i-inịm ndufo adidem ke iso. 14 Adieke ndufo ebaaha Abọọñ enyʌñ enam ñkpọ enọọ anye enyʌñ ekop item enọọ anye inyʌññọ itre utọñ ke mme ewʌhọ amọ, ñko adieke ndufo ye adidem i-ikarake ndufo ekeeneke Abọọñ Abasi ndufo, afọn! 15 Ado adieke ndufo imiidikoppo item inọ Abọọñ ñko adieke ndufo etreke utọñ enọọ mme item, ubọk amọ ayaidoro ndufo ke idem kpa naña akedoro mme eteete ndufo.

16 "Ndufo ituak ida ndin inyʌñ ikịt mme ikpọ ñkpọ ake Abọọñ ayemme inam ke iso ndufo! 17 Idooho ini idọk abakpa ado mmi? Ami ñyaaseeme nnọ Abọọñ nte yak anye adọñ aduma ye edịm. Ndin ndufo eyaediọọñọ utọ idiọọkñkpọ a-ndufo ekenamma ke iso Abọọñ ke ini ndufo ekebeeñeke anye yak inọ adidem."

18 Ndin Samwel amaakoot anyịñ Abọọñ, ñko kpa usen ado Abọọñ amaanam aduma asakka, edịm anyʌñ adep. Ke ntoro afịd awo emaeda ke uteeñe enọ Abọọñ ye Samwel.

19 Afịd awo emaebo Samwel, "Bọñ akam nọ Abọọñ Abasi mfo nọ nditọufọk mfo mbaak ñnyịn idikpañña, sia ñnyịn imidian idiọọkñkpọ ke ndiọiñkpọ ñnyịn mfen ke adiyem adidem."

20 Samwel amaabọọrọ, "Ikiiyak idem inyeñ. Ndufo emenam afịd ndiọi ñkpọ ami; ado ikiiwọññọ ikpọñ Abọọñ ado inam ñkpọ inọ Abọọñ ke afịd esịd ndufo. 21 Ikiiwakka ikeene mme abasi ubọk awo. Ammọ inamma ufọn ndomokeed inọ ndufo, me adinwam ndufo sia ammọ ibaaha ufọn. 22 Ke ntak akwa anyịñ amọ Abọọñ idiisịnne ikọd amọ, sia adooho Abọọñ amaakop inem adinam ndufo edo ake amọ. 23 Amaado ami, nsaa mmi-o ami adinam Abọọñ idiọọkñkpọ ke aditre ibọñ akam inọọ ndufo. Ami ñyaanyʌñ ikpeep ndufo usʌñ a-afọnnọ anyʌñ anen. 24 Ado ikịt ibo ke emebaak Abọọñ enyʌñ enam ñkpọ enọ anye ke mbuọdidem ke afịd esịd ndufo; ise utọ ikpọ ñkpọ se anye anam inọ ndufo. 25 Ado adieke ndufo ekaaha iso enam idiọọkñkpọ, eyaesobo ndufo ye adidem ndufo."