1 Amaaba awo ke ubon Benyamin, awuọiso awo, anyịñ amọ akedo Kisi ayịn Abiel, ayịn Serọ, ayịn Bekorad, ayịn Afia ake ubon Benyamin. 2 Kisi amaanie ayịn awodeen a-anyịñ ammọ akedooho Sọọl, anye akedo uyaiya akparawa ekpekịtte ke Isrel, ñko anye amaanyọọñ anyan akan awo mfen.

3 Akem mme dọñki e-ekenieghe Kisi, ete Sọọl, emaesoomo, ndin Kisi amaanyʌñ abo Sọọl ayịn awodeen amọ, "Ben ayịnufọk keed yak asaña ye afo ekeyem mme dọñki esoppo do." 4 Ke ntoro anye amaadakka asaña ukañ abod-abod abioinwañ a-abaaha ke idʌñ Ifrem ye ñkañ Salisa, ado ammọ ikikịtte mme dọñki ado. Ammọ emaesaña ekaa ñkañ Saalim, ado mme dọñki ado ikibaaha do. Akem ammọ emaesaña eboiyo ubeñ isọñ idʌñ Benyamin, ado ammọ ikisʌkkọ ikekịt mme dọñki ado.

5 Ke ini ammọ ekesịmme abio Suuf, Sọọl amaabo ayịnufọk a-akesañake ye anye ate, "Di, yak ñnyịn itịmme inyọñ imiidooho ete mmi ayaakpọñ adifịna mbaña mme dọñki akappa afịna ibaña ñnyịn."

6 Ado ayịnufọk amaabọọrọ, "Awo Abasi keed aba ke idʌñ ami; anye anekke anie ukpono, ñko afịd se anye atañ asiwuọ asu. Yak ñnyịn ika do idahami. Akemeido anye ayaidọkkọ ñnyịn itie nte ikpikaa."

7 Sọọl amaabo ayịnufọk amọ, "Ñnyịn ikpikaa, nsoo ke ñnyịn idiinọ ete ado? Ndidia akweeñe ke ekpad ñnyịn. Ñnyịn inieghe enọ se iben isọk awo Abasi ado. Nsoo ke ñnyịn inie?"

8 Ayịnufọk amaamaana abọọrọ anye Sọọl abo, "Sese ami mmenie keed ke mbaak inaañ sekel* silfa. Ami ñyaayaak nnọ awo Abasi nọ anye idọkkọ ñnyịn nte ñnyịn idiidʌk." 9 Ke ini akpa akesido ke Isrel, adieke awo akaaha adikibịp nto Abasi, ammọ ekesibo, "Idi, yak ñnyịn ikibịp akịdñkukịd," sia ekesikoot mme prọfed ayio ado mme akịdñkukịd.

10 Sọọl amaabo ayịnufọk amọ, "A-afọn. Di yak ika." Ke ntoro ammọ emaedaaña ekaa abio a-awo Abasi ado akebaaha.

11 Naña ammọ ekesʌkkọ esaña edọọk abod eka abio ado, ammọ emaekịt mme ubọikpa nte ewuọñọ edibọ mmọọñ, ammọ emaebịp ammọ, "Nte akịdñkukịd a-aba mi."

12 Ammọ emaebọọrọ, "Anye mmọdo. Anye akaa ako ke iso ndufo. Isọsọp idem ke anye adisʌk ndi idʌñ ñnyịn adodo, sia adooho mbon awo enie uwa adinam ke ñkoñ-ñkoñ itie. 13 Ndufo emaesʌk edọdʌk abio, ndufo eyaekịt anye mbemiso anye adọọk akaa ñkoñ-ñkoñ itie adidia ñkpọ. Mme awo idiitọọñọke edidia ñkpọ tutu anye adi, sia adooho ana anye adiọñ uwa ado; ado amaaboiyo, mbon e-ekekoodo eyaedia. Ndufo idọọk ikaa idahami; akpenam ndufo eyaekịt anye udomo ini ami."

14 Ammọ emaedọọk edʌk abio, ke ammọ esʌkkọ edʌk eka, se Samwel mi, naña asasaña abịne ammọ adidọọk ñkaa ñkoñ-ñkoñ itie.

15 Ado mbemiso usen Sọọl akediighe, Abọọñ amaayayaara awọt Samwel: 16 "Udomo ini ami ñkpọñ adiisiere mi, ami ñyaadọñ awo a-atooho isọñ Benyamin yak ubịne fiin. Yet anye adan nte andikara mbon mmi Isrel; anye ayaanyaaña ammọ asio ke ubọk mbon Filistia. Ami mmese mbon mmi, sia ntua ayịd ammọ adọọk adinsịm miin."

17 Ke ini Samwel akekannake anyen akịt Sọọl, Abọọñ amaadọkkọ anye abo, "Se awo ami ñketañña mbaña mmi; anye ayaakara ikọd mmi."

18 Sọọl amaasaña akpere Samwel ke usʌñ inuaatob akebịp, "Mbọk akpandọkkọ miin nte ufọk akịdñkukịd aba?"

19 Samwel amaabọọrọ Sọọl, "Ami ndo akịdñkukịd," "Tọọñọ dọọk sañ ke ñkoñ-ñkoñ itie, sia ana afo adia ñkpọ ye ami mfịn, ndin ubakusen ami ñyausio fiin unyọñ ñnyʌñ udọkkọ afịd se usịne fiin ke esịd. 20 Amaado mme dọñki e-ekesoomoke ke usen ita a-akeboiyoke ko, kuufịna idem ubaña ammọ; emaekịt ammọ. Ñko anie ke idodanyen Isrel awʌhọ ke imiidooho afo ye afịd ekpək ndufo?"

21 Sọọl amaabọọrọ, "Nte ami ntooho ubon Benyamin, andisịb ñkan ke esiin Isrel, ñko idooho ubon ñnyịn asịp akan ke afịd esiin Benyamin? Ntaha afo atañña utọ ikọ ado ye ami-e?"

22 Akem Samwel amaaben Sọọl ye ayịnufọk amọ adʌk adi esịd afe anyʌñ adinam ammọ etie iwuod enọ afịd mbon se ekekoot, e-ekedooho edịb mme duob ke ibad. 23 Samwel amaakoot atem ndidia abo, "Ben unam anye ami ñkunọọhọ fiin do di, anye ami ñkubooho fiin yak asio anịm asaña-asaña."

24 Akem atem ndidia amaaben ifʌkkọ unam ye abʌk se ikiyịre adinịm Sọọl ke iso. Samwel amaabo ate, "Se ekenịm unọọ fiin adom. Dia, sia ekesio anye ami enịm unọ fiin ke usọrọ ami tọọñọ ke ini ami ñkebooho, ‘mmekoot mme isenawo.’ " Ndin Sọọl amaadia ñkpọ ye Samwel usen ado.

25 Ke ammọ emaekesọiyọ ke ñkoñ-ñkoñ itie idi abio, Samwel amaaneme nneme ye Sọọl ke anyọñ ufọk amọ. 26 Ammọ emaedakka eda ke usiere, ndin Samwel amaada ke anyọñ ufọk akoot Sọọl ate, "Beeñe idem ndin ami ñyausio fiin unyọñ." Ke ini Sọọl akebeeñeke idem ama, anye amaasaña keed ye Samwel awuọ esiin. 27 Ke ammọ esʌkkọ esaña ekewuọ utịd abio, Samwel amaabo Sọọl, "Bo ayịnufọk mfo yak asaña aka iso ikpọñ ñnyịn," ayịnufọk amaanyʌñ anam ntoro, "ado afo ba mi ke etək ini, nọ ami udọkkọ fiin etob a-atooho Abasi."