1 Adikem ke ini ado mbon Filistia ebono mbon ekọñ ammọ edika ñkenwana ye mbon Isrel. Akis amaabo Defid, "Ana afo adiọọñọ ke afo ye ikọd mfo ana eñkeene miin ke isañ ekọñ ami."

2 Defid amaabo, "Ndin afo ayaakịt ke idem mfo se ayịnufọk mfo akeme adinam."

Akis amaabọọrọ, "Afọn, ami ñyaunịm fiin nte awoukpeme mmi ke nsi-nsi."

3 Ndin Samwel amaakpa, afịd Isrel emaetua anye enyʌñ ebuuk anye ke isọñ emana amọ ke Rama. Sọọl amaabịne mme nsañaekpo ye mme mbiaidiọñ asioño ke idʌñ.

4 Mbon Filistia emaebono edi edinam nnaaekọñ ke Sunem, ke ini Sọọl akebokko afịd Isrel anyʌñ anịm nnaaekọñ ke Kilboa. 5 Ke ini Sọọl akekịtte udịmekọñ Filistia, idem amaanyeñ anye; ndịk amaayọhọ anye esịd. 6 Sọọl amaabịp Abọọñ, ado Abọọñ ikibọọrọke anye ke ndab me ke Urim me ato ke mme prọfed. 7 Sọọl ndin amaabo mme mbon utom amọ, "Iyem awonwaan a-adooho akịdñkukịd innọ miin, nọ ato do ami ñkebịp anye."

Ammọ emaebo, "Keed mmọdo ke Endọ."

8 Ke ntoro Sọọl amaakpəho idem amọ, asịne mme afọñ mfen, ndin ke akonayio anye ye ideen iba emaekaa ebịne awonwaan ado. Anye amaabo "Se ñkukịd nnọ miin, nyʌñ koot anye a-ami mboho nsiak anyịñ nnọ."

9 Ado awonwaan ado amaabo, "Ke akpanikọ afo amediọọñọ se Sọọl akenam. Anye amaasioño mbon nsañaekpo ye mme mbiaidiọñ ke isọñ. Ntak a-afo akọọhọ afia ñkpa anọọ adiñwot miin-e?"

10 Sọọl amaanwọñọ ñkpọ ke anyịñ Abọọñ, "Ke akpanikọ adaña nte Abọọñ abaaha ke uwem, awo iduunọọhọ fiin ufen ke ntak ami."

11 Ndin awonwaan ado amaabịp, "Anie ke ami ndiikoot nsio unọ fiin?"

Anye amaabo, "Koot Samwel sio."

12 Ke ini awonwaan ado akịtte Samwel, anye amaatua ke akpọsọñ uyio anyʌñ abo Sọọl, "Ntaha afo ambiañake miin-e? Afo ado Sọọl!"

13 Adidem Sọọl amaabo anye, "Kuukop ndịk. Nsoo ke afo akịt?"

Awonwaan ado amaabọọrọ, "Ñkịt awo nte ekpo* naña ato isọñ adọọk adi."

14 Anye amaabịp, "Anye aba nte nsoo ñkpọ?"

Anye amaabo, "Akaanadeen a-asịneke ewịra asʌk awuọ adi."

Ndin Sọọl amaadiọọñọ ke ado Samwel, ñko anye amaasuuk iwuod asịn ke isọñ ndin amaaduọ akʌp iso ke isọñ.

15 Samwel amaabo Sọọl, "Nsoo ido ntak a-afo amfịnake miin ke adiñkoot miin nsio?"

Sọọl amaabo, "Ami mba ke ekamba mfịna. Mbon Filistia esʌk enwana ye ami, ñko Abasi adakka añkpọñ miin. Anye imbọọrọke miin aba, imbọọrọke ito prọfed me ke ndab. Ke ntoro ami ukoot fiin yak andọkkọ se mbiinam."

16 Samwel amaabo, "Nsoo inam afo ambịp miin, idahami a-adooho Abọọñ amaakedakka ukpọñ fiin anyʌñ akanna ado asua mfo? 17 Abọọñ anam se anye akekama inua mmi atañ. Abọọñ abakka abioubọọñ asio ke ubọk mfo anyʌñ ayaak anọ mbọhọidʌñ mfo, Defid. 18 Sia adooho afo ukukoppo item unọ Abọọñ me adinam se anye akeyem ke iyadesịd amọ ke abaña mbon Amalek, Abọọñ u-unam fiin ntom mfịn ami. 19 Abọọñ ayauyaak fiin ye mbon Isrel asịn ke ubọk mbon Filistia, ndin ñkpọñ afo ye ayịn mfo eyaeba ye ami. Abọọñ ayaanyʌñ ayaak mbon ekọñ Isrel asịn ke ubọk mbon Filistia."

20 Ini keed ini keed Sọọl amaanyanna aduọ ke isọñ, ayọhọ ye ndịk ke ntak ikọ se Samwel aketañ. Inweek ikibaaha anye aba, sia adooho anye ikidiaha ñkpọ ndomokeed afịd usen ado ye afịd akonayio ado.

21 Ke ini awonwaan ado akediighe abịne Sọọl anyʌñ adikịt ke idem anekke anyeñ anye, anye amaabo, "Sese ayịnufọk mfo akop item unọ fiin. Ñkekama uwem mmi ke ubọk mmi nnam se afo akebo yak nam. 22 Mbọk ndin afo ñko nyʌñ kop uyio ayịnufọk mfo nyʌñ yak ami unọ fiin ndidia yak adia nọ afo anie inweek asaña atịmme anyọñ."

23 Anye amaasịn anyʌñ abo, "Ami ndiidiaha ñkpọ."

Ado ikọd amọ emaediana ye awonwaan ado ekpeiye anye, ndin anye amaakop uyio ammọ. Anye amaadakka ada ke isọñ atie ke ifịm.

24 Awonwaan ado amaanie ñyịn enañ e-ekekʌkkọ ke ufọk, anye amaaben usọp-usọp awot. Anye amaaben ndomuyo, anuakka akama anam uyo se yiis imiisịneke. 25 Ndin anye amaaben adidot Sọọl ye ikọd amọ ke iso ammọ ediaha. Kpa akonayio ado ammọ emaedaaña enyọñọ.