1 Akem Nahas ayịn Amọn amaadọọk akaa akekanna Yabes Kilied akʌk nọ adiinwana ekọñ. Ñko afịd ideen Yabes emaebo anye, "Nam edioomo ye ñnyịn ndin ñnyịn iyaido ikọd mfo."

2 Ado Nahas ayịn Amọn amaabọọrọ, "Ami ndiinyịmme adinam edioomo ye ndufo akpedo ndufo emenyịmme yak ami ikappa ndufo anyen nnasia afịd ndufo nsio nọ ato do mben ndọk nsọk afịd Isrel."

3 Mme ñkpisọñ ke Yabes emaebo anye, "Inọ ñnyịn usen itiaba nọ ñnyịn idọñ isʌñutom etob inọ afịd Isrel; adieke awo idiibaaha se inyaaña ñnyịn, ñnyịn iyaiyaak idem unọ fiin."

4 Ke ini asañautom adisịmme Kibie ake Sọọl anyʌñ atañ se ido anọ mme awo do, afịd mbon abio ado emaebenne uyio ammọ etua ayịd. 5 Kpa idaha ado ke Sọọl akenyọñ inwañ amọ asaña ke edem mme enañ, ndin anye abịp, "Nsoo inam afịd awo? Ntaha ammọ etuañake-e?" Ndin emaeben edọkkọ anye se ideen Yabes eketañ.

6 Ke ini Sọọl akekoppo se amọ etañ, Sịbidịd Abasi amaadoro anye ke idem ekamba-ekamba, esịd amaanekke ayat anye. 7 Anye amaaben enañ iba akpok ke mbaak ke mbaak anọ mme isʌñutom ate eben esaña ke afịd adaña Isrel etañ ebo, "Se ediinam ye mme enañ afịd awo se imiidikeeneke Sọọl ye Samwel ado ami." Ndin uteeñe Abọọñ amaadoro mme awo ke idem, ammọ enyʌñ ewuọñọ edi ke esịd keed. 8 Ke ini Sọọl abatta ammọ ke Besek, ideen Isrel emaesịm tọsịn ikie ita (300,000) ñko mbon Yuda ekedo tọsịn edịb mme duob (30,000).

9 Ammọ emaebo mme isʌñutom e-ekediighe, "ibo ideen Yabes Kilied, ‘Ñkpọñ ke utịn amaasakka ndufo eyaenie adinyaaña.’ " Ke ini mme isʌñutom ekekaaha ekedọkkọ ideen Yabes ñkpọ ami esịd amaadat ammọ. 10 Mbon Yabes emaebo mbon Amọn, "Ñkpọñ ñnyịn iyaisuuk iwuod inọ ndufo yak inam ñnyịn se ndufo ema."

11 Edem usen ado Sọọl amaabakka mme ideen amọ ke itie ita; ke ufọọd akonayio ammọ esiaha edọñọ itie nnaaekọñ mbon Amọn enyʌñ ewot ammọ tutu utịn asakka edem usen. Mbon se ikidu uwem emaesuana, tutu awo amọ iba ibaaha itie keed.

12 Ndin mbon awo emaebo Samwel, "Anie awo ikibịp ibo, ‘Nte Sọọl adiido adidem ñnyịn?’ Yaak ibon ado inọ ñnyịn nọ ñnyịn iwot ammọ."

13 Ado Sọọl amaabọọrọ, "Ibaaha awo se ediiwot mfịn sia usen mfịn Abọọñ anyaaña Isrel."

14 Ndin Samwel amaabo mbon awo, "Idi, yak ñnyịn ika Kilkal ikitịmme idemme ubọọñ ke ndo." 15 Ke ntoro mme awo emaekaiya Kilkal ekenam Sọọl adidem ke iso Abọọñ. Do ammọ emaenam uwa ewuana ke iso Abọọñ, ndin Sọọl ye afịd nditọ Isrel emaenam akwa idaara.