1 Isoobo atọ keed, isoobo idem ndufo atọ keed,

ndufo idịd ndọk,

2 mbemiso ewʌhọ ado atọọñọ adat itie

ndin usen ado aboiyo nte mbio ake afịm abenne,

mbemiso ikañ-ikañ iyadesịd Abọọñ

adi ibịne ndufo,

mbemiso usen ifiobesịd Abọọñ

adi ibịne ndufo,

mbemiso usen ifiobesịd Abọọñ

adi ibịne ndufo.

3 Iyem Abọọñ, afịd ndufo mbon nsuukidem ke isọñ,

ndufo e-enamma se anye awuuk.

Iyem adinenido, iyem nsuukidem;

akpenam me eyainọ ndufo itie udịbe

ke usen iyadesịd Abọọñ.

4 Eyaewuọñọ ekpọñ Kasa

ndin eyaekpọñ Askelọn ke nsobo.

Ke ufọọd uweemeayio Asdọd adiina ukpọk,

enyʌñ ewịppe Ekrọn esio.

5 Adọdiọọk inọ ndufo mbon e-edʌñọke ke mben akpainyañ,

ndufo mbon Kered;

ikọ Abọọñ a-asua inọ ndufo,

Kenan, isọñ mbon Filistia.

Anye abo, "Ami ñyaisobo ndufo,

ndin ndomokeed idiisʌhọke."

6 Isọñ ke mben akpainyañ ayaakappa ado udia ufene,

a-anieñeke ube mmọọñ anọ mme akpemeedọñ

ye aba ubono udịmedọñ.

7 Isọñ ado ayaakappa anie

nsʌhọ mbon Yuda;

do ke ammọ ediikịt udia ufene.

Ke ndubiayio ammọ eyaesuuk enaa

ke mme ufọk Askelọn.

Abọọñ Abasi ammọ ayaakpeme ammọ;

anye ayaatịmme anọ ammọ inie ammọ.

8 "Ami mmaakop mme usọñanyen mbon Mọb

ye mme nsueñ mbon Amọn,

e-ekesọññọ ikọd mmi anyen,

enyʌñ enam adusad ebaña idʌñ ammọ.

9 Ke ntoro, ma uwem mmi,"

Abọọñ Andikponñkan atañ,

kpa Abasi Isrel,

"ke akpanikọ Mọb ayaakappa atie nte Sọdọm,

mbon Amọn nte Komora,

itie a-mbid akọttọ ye itie mme ube inʌñ,

nsi-nsi ndoon.

Ikọd mmi se isʌhọ eyaetañ ammọ nte mbịme;

mme aduuwem ke idịd mmi eyaedat isọñ ammọ enie."

10 Ami ado se ammọ ediibọ nte utịb ntañidem ammọ,

ke ammọ adisuenne ñnyʌñ mmiom

ikọd Abọọñ Andikponñkan.

11 Abọọñ ayaado uteeñe anọ ammọ

ke ini anye asoboke afịd mme abasi ke ederimbod.

Mme idịd ke anyan itie eyaetuak iwuod enọ anye,

afịd ammọ ke isọñ ammọ.

12 "Ndufo mbon Kuus, ñko,

eyaekpañña ke akañkañ mmi."

13 Anye ayaanyan ubọk amọ ase adoro,

anyʌñ asobo Asiria,

akpọñ Ninife ataa ukpọk

ye nsaad nte akpautatan.

14 Mme udịmedọñ ye udịmenañ eyaesuuk enaa do,

afịd aduuk mme unam.

Ñkịdikịd akpautatan ye asio ñkpo ñkịdikịd

eyaedọñọ ke mme adaaha amọ.

Eyaekop uyio ammọ ke mme ubenafịm,

ñwuudo ammọ ayaayọhọ ke mme inuausʌñ

eyaefuuño mme atekke sida.

15 Anye ami ado abio akpọsọñ uyom idaara

a-akesibaaha ke ifuuro.

Anye akebo idem amọ,

"Ami ndo ukweeñe-ukweeñe! Ndin mfen ibaaha ke imiibọhọke ami."

Anye anam die akappa nsobo,

itie nnaa mme ndiọi unam!

Afịd mbon e-esañake eboiyo anye esaha

enyʌñ efʌñ ubọk ammọ.