1 Adọdiọọk anọ abio mbon ufiik awo,

e-esọọñọ iwuod enyʌñ esappa idem!

2 Anye ikoppo item inọ awo ndomokeed,

anye inyịmmeke ntʌnọ.

Anye ibuọttọ idem ye Abọọñ,

anye isịkkeke ikpere Abasi amọ.

3 Mme adaaha ke esịd amọ

edoñño mme ekpe e-ekuunọkuun;

mme andikara amọ edoñño ewaikọd ndubiayio,

i-imiisʌhọke ñkpọ ndomokeed inịm inọ ubakusen.

4 Mme prọfed amọ ikponoke idem;

ammọ edoñño mbon mbubịk.

Mme aku amọ esappa adisana itie,

enyʌñ enam afai ke mbed.

5 Abọọñ a-abaaha ke esịd amọ ado adinen;

anye inamma ndudue.

Kwa ubakusen anye akpe ikpe amọ ke unen,

ndin afịd ufa usen anye itreke,

kpayeado awo ukwañido ikoppo abuud.

6 "Ami mmesobo mme idịd;

mmewuut mme ñkpọsọñ itie ammọ.

Ami mmekpọñ mme efaak ammọ ukpọk,

awo ndomokeed isañake iboiyo.

Mme abio ammọ enaa nte anaan;

mme awo ibaaha, ena ukpọk.

7 Ke abaña Yeruselem ami ñkekere,

‘Ke afo ayañkpono miin ke akpanikọ,

anyʌñ anyịmme ibọ ntuunọ!’

Ndin awo ikpisoboke itie udịbe amọ,

afịd mme ufen mmi ikpidoroke anye ke idem.

Ado ammọ ekesʌk eyeyem

adinam ñwo ke afịd se ammọ enam.

8 Ke ntoro ida imbet miin," Abọọñ atañ,

"ke usen a-ami ndiidakka nda nnọ ikọ ntiense.

Ami mmaanyịmme aditañ mme idịd mbon,

adibon mme abio ndidem,

ñnyʌñ ñnwañña ifiobesịd mmi ndoot ammọ ke idem,

afịd ikañ-ikañ iyadesịd mmi.

Eyaesobo afịd ederimbod

ke ikañ iyadesịd ufịb mmi.

9 "Amaakem ami ñyaanam mme ñkpọkinua ikọd mmi esana,

nọ afịd ammọ ekpekoot anyịñ Abọọñ,

enyʌñ enam ñkpọ enọ anye esịd keed.

10 Tọọñọ ke edem inyañ Kuus,

mbon e-eñkponoke miin, ikọd mmi e-ekesuanake,

eyaeben mme enọ ensọk miin.

11 Ke usen ado afo, Yeruselem, abuud iduunamma fiin

ke afịd ndudue a-afo akennamma miin,

sia ami ñyaasio ke idem mfo mfep

mbon ñkokkoidem ye ñkpooninua.

Ndufo idiinieghe ntañidem aba

ke adisana abod mmi.

12 Ado ñyaakpọñ ke atu ndufo

mbon ime ye nsuukidem.

Nsʌhọ Isrel

eyaebuọt idem ke anyịñ Abọọñ.

13 Mme ñyọhọnsʌhọ Isrel idiinamma ndudue;

ammọ idiisʌhọke nsu.

Edeme abiaña

idiibaaha ke inua ammọ.

Ammọ eyaedia ñkpọ enyʌñ esuuk enaa

ndin awo ndomokeed idiinamma ammọ ekop ndịk."

14 Kwọ ikwọ, Adiaha Saiyọn;

sio ñkpo, Isrel!

Nem esịd nyʌñ daara ke afịd esịd mfo,

Adiaha Yeruselem!

15 Abọọñ a-abenne ufen mfo afep,

anye amaanam mme asua mfo etịmme edem.

Abọọñ, Adidem Isrel, mmọdo ye afo;

afo uduufegheke ndịk aba ubaña idiọọk ndomokeed.

16 Ke usen ado

ammọ eyaebo Yeruselem,

"Kuufeghe, Saiyọn;

kuuyak ubọk mfo amem.

17 Abọọñ Abasi mfo mmọdo ye afo,

Uko ke Ekọñ a-anyaañake.

Anye ayaanie ekamba idadesịd ke afo;

ke ima amọ anye iduuduatta fiin aba ke nsuannọ,

ado ayaudaara fiin ke ikwọ."

18 "Ami ñyaasịññe ke atu ndufo,

afịd mbon se ifʌhọ ibaña mme adimek usọrọ mfo,

a-adooho mbiomo ye asuenne inọọ ndufo.

19 Ke ini ado ami ñyaafʌnnọ

afịd mbon e-ekifiighe ndufo.

Ami ñyaanyaaña mbʌñọ;

ñyaatañ mbon ntañmfeb mbok.

Ami ñyaanọ ammọ itooro ye ukpono

ke afịd idʌñ a-ammọ ekebọọhọ ufen abuud.

20 Ke ini ado ami ñyaitañ ndufo mbon;

ke ini ado ami ñyaiben ndufo ñnyọñ ufọk.

Ami ñyainọ ndufo ukpono ye itooro

ke atu afịd mbon awo ke ederimbod,

ke ini ami ntịmmeke inọọ ndufo inie ndufo

kpa ke iso ndufo,"

Abọọñ atañ.