സദൃശവാക്യങ്ങൾ 7

വ്യഭിചാരിണിയായ സ്ത്രീക്കുള്ള മുന്നറിയിപ്പ്

1 എന്റെ കുഞ്ഞേ, എന്റെ വചനങ്ങൾ പ്രമാണിക്കുകയും

എന്റെ കൽപ്പനകൾ നിന്റെ ഉള്ളിൽ സംഗ്രഹിക്കുകയും ചെയ്യുക.

2 എന്റെ കൽപ്പനകൾ പ്രമാണിക്കുക, എന്നാൽ നീ ജീവിക്കും;

എന്റെ ഉപദേശങ്ങൾ നിന്റെ കണ്ണിലെ കൃഷ്ണമണിപോലെ സൂക്ഷിക്കുക.

3 അവ നിന്റെ വിരലുകളിൽ ചേർത്തുബന്ധിക്കുക;

നിന്റെ ഹൃദയഫലകത്തിൽ ആലേഖനംചെയ്യുക.

4 ജ്ഞാനത്തോട്, "നീ എന്റെ സഹോദരി" എന്നും,

വിവേകത്തോട്, "നീ എന്റെ അടുത്ത ബന്ധു" എന്നും പറയുക.

5 അവ നിന്നെ വ്യഭിചാരിണിയായ സ്ത്രീയിൽനിന്നും

ലൈംഗികധാർമികതയില്ലാത്തവളുടെ പ്രലോഭനഭാഷണങ്ങളിൽനിന്നും രക്ഷിക്കും.

6 എന്റെ വീടിന്റെ ജനാലയ്ക്കരികിൽ

അഴികളിലൂടെ ഞാൻ പുറത്തേക്കുനോക്കി.

7 യുവാക്കളുടെ മധ്യത്തിൽ ഞാൻ ശ്രദ്ധിച്ചു,

ഒരു ലളിതമാനസനെ ഞാൻ കണ്ടു,

ഒരു ശുദ്ധഗതിക്കാരനായ യുവാവിനെത്തന്നെ.

8 അയാൾ തെരുക്കോണിലുള്ള അവളുടെ വീടിന്റെ അടുത്തേക്ക്;

അവളുടെ ഭവനംതന്നെ ലക്ഷ്യമാക്കി നീങ്ങുകയായിരുന്നു,

9 അന്തിമയക്കത്തിൽ പ്രകാശം മങ്ങി,

രാവ് ഇരുണ്ടുവരുന്ന നേരത്തുതന്നെ ആയിരുന്നു അത്.

10 അപ്പോൾ കുടിലചിത്തയായ ഒരുവൾ

വേശ്യാസമാനം വസ്ത്രംധരിച്ച്, അവനെ എതിരേറ്റുവന്നു.

11 അവൾ ധിക്കാരിയും ധാർഷ്ട്യക്കാരിയുമാണ്,

അവൾ ഒരിക്കലും വീട്ടിൽ അടങ്ങിയിരിക്കാത്തവളുമാണ്;

12 അവൾ ഇതാ തെരുവോരങ്ങളിൽ, ഇതാ ചത്വരങ്ങളിൽ

എല്ലാ കോണുകളിലും അവൾ പതിയിരിക്കുന്നു.

13 അവൾ അവനെ കടന്നുപിടിച്ചു ചുംബിച്ചു

ലജ്ജാരഹിതയായി അവനോടു പറഞ്ഞു:

14 "എനിക്കിന്നു വീട്ടിൽ സമാധാനയാഗത്തിന്റെ മാംസം ശേഷിപ്പുണ്ട്,

ഇന്നു ഞാൻ എന്റെ നേർച്ചകൾ നിറവേറ്റിക്കഴിഞ്ഞു.

15 അതിനാൽ നിന്നെ എതിരേൽക്കാൻ ഞാൻ പുറത്തേക്കിറങ്ങി വന്നിരിക്കുന്നു;

ഞാൻ നിന്നെ അന്വേഷിച്ചു, ഇതാ നിന്നെ കണ്ടെത്തിയിരിക്കുന്നു!

16 ഞാൻ എന്റെ കിടക്ക വിരിച്ചൊരുക്കിയിരിക്കുന്നു

ഈജിപ്റ്റിലെ വർണശബളമായ ചണനൂൽകൊണ്ടുതന്നെ.

17 മീറ,*7:17 അതായത്, നറുമ്പശ ചന്ദനം, ലവംഗം എന്നിവകൊണ്ട്

എന്റെ കിടക്ക ഞാൻ സുഗന്ധപൂർണമാക്കിയിരിക്കുന്നു.

18 വരൂ, പ്രഭാതംവരെ നമുക്കു ലീലാവിലാസങ്ങളിൽ രമിക്കാം

നമുക്കു പ്രേമരാഗങ്ങളിൽ അഭിരമിക്കാം!

19 എന്റെ ഭർത്താവ് ഭവനത്തിലില്ല;

അയാൾ ദൂരയാത്ര പോയിരിക്കുകയാണ്.

20 അയാൾ നിറഞ്ഞ പണസഞ്ചിയുമായാണ് പോയിരിക്കുന്നത്;

മടക്കം ഇനി പൗർണമിനാളിലേയുള്ളൂ."

21 മോഹനവാഗ്ദാനങ്ങളുമായി അവൾ അവനെ വഴിപിഴപ്പിച്ചു;

മധുരഭാഷണത്താൽ അവൾ അവനെ വശീകരിച്ചു.

22 ഉടൻതന്നെ അവൻ അവളെ പിൻതുടർന്നു

അറവുശാലയിലേക്ക് ആനയിക്കപ്പെടുന്ന കാളയെപ്പോലെ,

കുരുക്കിലേക്കു*7:22 ഈ വാക്കിനുള്ള എബ്രായപദത്തിന്റെ അർഥം വ്യക്തമല്ല. പായുന്ന മാനിനെപ്പോലെ,*7:22 മൂ.ഭാ. ഭോഷരെപ്പോലെ

23 അവന്റെ കരളിൽ ശരം തറയ്ക്കുന്നതുവരെ,

കെണിയിലേക്കു പക്ഷി പറന്നടുക്കുന്നതുപോലെ,

സ്വന്തം ജീവനാണ് അപഹരിക്കപ്പെടുന്നത് എന്ന അറിവ് അവനു ലവലേശവുമില്ല.

24 അതുകൊണ്ട് എന്റെ കുഞ്ഞുങ്ങളേ, എൻമൊഴി കേൾക്കുക;

എന്റെ ഭാഷണത്തിന് ശ്രദ്ധ നൽകുക.

25 നിന്റെ ഹൃദയം അവളുടെ വഴികളിലേക്കു തിരിയരുത്

അവളുടെ മാർഗത്തിലേക്കു വഴിതെറ്റിപ്പോകുകയുമരുത്.

26 അവൾ നശിപ്പിച്ച ഇരകൾ ധാരാളമാണ്;

അവൾമൂലം വധിക്കപ്പെട്ട ജനക്കൂട്ടം അസംഖ്യമാണ്.

27 അവളുടെ ഭവനം പാതാളത്തിലേക്കുള്ള രാജവീഥിയാണ്,

അത് മൃത്യുവിന്റെ അറകളിലേക്കു നയിക്കുന്നു.