1 "Bɛmmamaa bɛ ahonle tu. Kɛmɔ bɛdie Nana Nyamenle bɛdi la, zɔhane ala yɛɛ bɛlie medame noko bɛli a. 2,3 Egya sua zo, tɛnlabelɛ dɔɔnwo wɔ ɛkɛ, na saa ɔnle zɔ a, anrɛɛ meha mehile bɛ. Mekɔ meahɔziezie ɛleka meamaa bɛ. Saa mewie a mebara bieko na mearava bɛ, amaa bɛaradɛnla ɛleka mɔɔ mewɔ la. 4 Bɛze ɛleka mɔɔ melɛkɔ, nee adenle ne mɔɔ bɛdua nu bɛkɔ ɛkɛ ne la noko."

5 Tɔmase zele ye kɛ, "Kyɛkyɛ, Awulae, yɛnze ɛleka mɔɔ ɛlɛkɔ a, na kɛ ɔkɛyɛ na yɛanwu ye adenle ne ɛ?"

6 Gyisɛse zele ye kɛ, "Nɔhalɛ nu, mame a le Adenle ne, nee Nɔhalɛ ne nee Ngoane ne a. Awie biala ɛngola ɛngoati me ɛngɔ Egya anwo lɔ. 7 Saa bɛze me ɛdeɛ a, ɛnee noko bɛze Egya. Ɔvi ɛnɛ mɔɔ kɔ la bɛze ye, yɛɛ eza noko bɛnwu ye!"

8 Felepe zele kɛ, "Awulae, wɔmɔ kile yɛ Egya ne ala, na yɛ kunlu kɛdwo."

9 Gyisɛse buale kɛ, "Felepe, ɔti me nee bɛ de ɛke mekɛ tendenle ɛhye amuala anzi ye, ɛtɛnwunle me sonla holɛ? Awie biala mɔɔ ɛnwu me la ɛnwu Egya noko. Na duzu ati a akee ɛse mengile wɔ Egya ne a? 10 Anzɛɛ ɛnlie ɛnli kɛ mede Egya ne nu, yɛɛ Egya ne noko de me nu ɔ? Tɛ me ti anwo tumi a mefa meka edwɛkɛ a, na Egya ne mɔɔ de me nu la tumi ɔ. Mame noko yɛɛ ɔdua me nwo zo ɔyɛ ye gyima ne a. 11 Ɛhye ati bɛlie me bɛli kɛ mede ye nu, yɛɛ ɔdaye noko Ɔde me nu. Na saa tɛ ye zɔhane bɔbɔ a, ɛnee bɛva bɛ nye bɛdo nwanwane ninyɛne mgbole ne mɔɔ bɛnwu kɛ meyɛ la na bɛlie me bɛli.

12,13 "Nɔhalɛ nu meka meahile bɛ kɛ, awie biala mɔɔ kɛlie me kɛli la ɔbayɛ nwanwane gyima ne mɔɔ meyɛ la bie, na ɔbayɛ mɔɔ yɛ nwanwane tɛla bɛ bɔbɔ a, ɔluakɛ melɛkɔ Egya ne anwo lɔ. Debie biala mɔɔ bɛkɛbiza ye wɔ me duma nu la, mebayɛ meamaa bɛ, ɔluakɛ ɛhye bawula Egya ne anyunlunyia wɔ deɛ mɔɔ mame, Sonla Ra ne mebayɛ meamaa bɛ la ati. 14 Bɛlua me duma nu bɛbiza, na mebayɛ meamaa bɛ!

15,16 "Saa bɛkulo me a, ɛnee bɛli me mɛla ne mɔ azo; na mebazɛlɛ Egya amaa yeamaa bɛ Arɛlekyekyevolɛ fofolɛ, mɔɔ yemɔ ɔnrɛgyakyi bɛ ngome ɛlɛ a. 17 Yemɔ a le nɔhalɛ Sunsum ne mɔɔ ewiade ne ɛnrɛhola nee ye ɛnrɛdɛnla la, ɔluakɛ ɔngola ɔnnwu ye yɛɛ ɔnze ye, na bɛmɛ bɛze ye, ɔboalekɛ ɔ nee bɛ a de a, yɛɛ ɔde bɛ nu noko. 18 Menrɛgyakyi bɛ nrisa ɛlɛ. Mebazia meara bɛ nwo ɛkɛ ne bieko. 19 Yeha ekyii ɛnee ewiade ɛnnwu me bieko, na bɛmɛ bɛbanwu me dahuu. Kɛmɔ mede ngoane nu la ati, bɛdabɛ noko bɛbadɛnla ngoane nu. 20 Kenle ko zɔhane bɛbade ɔ bo kɛ, mede Egya nu yɛɛ bɛdabɛ noko bɛde me nu, yɛɛ medame noko mede bɛ nu. 21 Mɔɔ die me mɛla ne, na ɔdi zolɛ la a kulo me a, na kɛmɔ ɔkulo me noko la ati, me Ze bahulo ye; na medame noko meahulo ye, na meala me nwo ali meahile ye."

22 Dwudase, (tɛ Dwudase Yesekaleɔto ɔ), zele ye kɛ, "Awulae, ɛhye mɔ amuala abo a le duzu, mɔɔ ɔti ɛbala ɛ nwo ali wɔahile yɛ ngomekye na wɔagyakyi ewiade a?"

23 Gyisɛse buale ye kɛ, "Awie biala mɔɔ ɔkulo me la ɔbali me mɛla ne azo, na Egya bahulo ye; na yɛbara yɛ nee ye aradɛnla. 24 Bɛdabɛ mɔɔ bɛngulo me la ɛnli me mɛla ne mɔ azo. Na mɛla ne noko ɛnle me deɛ, na Egya ne mɔɔ zoanle me la deɛ ɔ. 25 Melɛka ɛhye mɔ meahile bɛ wɔ mekɛ mɔɔ me nee bɛ tɛbɔ ɛke la. 26 Na saa Selɛ ne soa Arɛlekyekyevolɛ ne mɔɔ tɛ yemɔ a le me, mekile Sunsum Nwuanzanwuanza ne mɔɔ barali me gyakɛ anu la a, ɔbahilehile bɛ ninyɛne dɔɔnwo, na eza noko yeahakyehakye bɛ wɔ mɔɔ medame meha mehile bɛ la anwo.

27 "Anzondwolɛ a mefa meagyakyi bɛ a; medame me anzondwolɛ a mefa meamaa bɛ a; tɛ anzondwolɛ ne mɔɔ ewiade fa maa la a mefa meamaa bɛ a. Bɛmmamaa bɛ ahonle tu, eza noko mmamaa bɛsulo. 28 Bɛhakye mɔɔ menganle mengilele bɛ la: Melɛkɔ, noko eza mebara bɛ nwo ɛke bieko. Na saa bɛkulo me amgba a, ɛnee bɛbali fɛlɛko wɔ me nwo, ɔluakɛ kɛkala akee mekɔ Selɛ ne mɔɔ le kpole tɛla me la anwo lɔ. 29 Melumua meha ɛhye mɔ mehile bɛ kolaa na bɛazi, amaa saa bɛsi a, bɛanwu nɔhalɛ ne na bɛalie me bɛali.

30 "Menlɛ melɛ dɔɔnwo me nee bɛ ɛndendɛ bieko, ɔluakɛ ewiade ɛhye anu abɔnsam tumivolɛ ne ɛbikye. Ɔnlɛ tumi biala wɔ me nwo zo, 31 noko kɛ ɔkɛyɛ na ewiade anwu kɛ amgba mekulo Selɛ ne la ati, mebayeye me ahonle nu meayɛ mɔɔ Selɛ ne kpondɛ kɛ meyɛ la. Bɛdwazo, bɛraze bɛmaa yɛhɔ."