1 Akee Paelɛte maanle bɛvale Gyisɛse bɛhɔle na bɛhɔbilale ye empele. 2 Azogya ne mɔ nwonle mbowule abotile vale zoale ye, na bɛwulale ye kɔbenle tɛladeɛ. 3 Akee bɛdeɛdeanle nu bɛzile ye amgbu bɛzele kɛ, "Akoaba, ‘Dwuuma Belemgbunli!’ "

4 Paelɛte vindele bieko na ɔhɔzele Dwuuma ne kɛ, "Mekava ye mearɛlɛ bɛ kɛkala, noko memaa bɛade bɛ nwo ɔ bo wienyi kɛ, mennwu ɛtane biala wɔ ɔ nwo."

5 Gyisɛse zo ye mbowule abotile ne na ɔwula ye kɔbenle tɛladeɛ ne ɔvindele. Na Paelɛte zele bɛ kɛ, "Bɛnlea, nrenyia ne ɛne."

6 Mɔɔ Dwuuma azɛlɛvolɛ mgbanyinli ne mɔ nee Dwuuma mgbanyima ne mɔ anye bɔle ɔ nwo zo ala la, bɛdeɛdeanle nu bɛzele kɛ, "Bɔ ye meanubaka nu! Bɔ ye meanubaka nu!"

Paelɛte zele bɛ kɛ, "Ɛnee bɛdabɛ bɛva ye bɛhɔbɔ ye meanubaka nu ɛ, na mame ɛdeɛ mennwu ɛtane wɔ ɔ nwo."

7 Bɛbuale ye kɛ, "Yɛlɛ mɛla bie, na mɛla ne kile kɛ ɔwɔ kɛ ɔwu, ɔluakɛ ɔfɛlɛ ɔ nwo Nyamenle Ra."

8 Mɔɔ Paelɛte dele ɛhye la, akee ye ahonle dule kpole dɛlale dɛba ne bɔbɔ. 9 Bɛ nee Gyisɛse ziale hɔle aako nu lɔ bieko, na ɔbizale ye kɛ, "Ɛvi nienwu?" Noko Gyisɛse ambua ye.

10 Paelɛte deanle ye nu zele kɛ, "Ɛnrɛdɛne me zo ɔ? Ɛnze kɛ melɛ tumi kɛ megyakyi wɔ anzɛɛ mebɔ wɔ meanubaka nu ɔ?"

11 Gyisɛse zele ye kɛ, "Saa bɛanva tumi ne bɛanvi anwuma bɛammaa wɔ a, ɛnrɛhola ɛnrɛnyia me nwo zo tumi biala. Ɔti bɛdabɛ mɔɔ bɛyele me bɛmaanle wɔ la, bɛ gyakɔ!"

12 Paelɛte dele ɛhye la, ɔhulole kɛ ɔkɛgyakyi ye, na Dwuuma ne deɛdeanle nu zele ye kɛ, "Saa ɛgyakyi nrenyia ɛhye a, ɛnee tɛ ɛ gɔnwo a le Siza! Ɔluakɛ awie biala mɔɔ yɛ ɔ nwo belemgbunli la, ɛnee ɔtia Siza."

13 Paelɛte dele ɛhye la, ɔvale Gyisɛse ɔrale bɛ nwo ɛkɛ ne bieko, na ɔvole ɔdɛnlanle ndɛnebualɛ ebia ne mɔɔ bɛfɛlɛ ye Gabata wɔ Hibulu aneɛ nu la azo. 14 Ɛnee akee bɛbɔ kɛyɛ ewiazo bulu nee nwiɔ, wɔ kenle ne mɔɔ li Akpabɛnwo ne anyunlu la anu.

Na Paelɛte zele Dwuuma ne mɔ kɛ, "Bɛnlea, bɛ Belemgbunli ne ɛne!"

15 Bɛdeanle nu bɛzele kɛ, "Fa ye kɔ! Fa ye kɔ! Bɔ ye meanubaka nu!"

Paelɛte zele bɛ kɛ, "Kɛ Duzu? Membɔ bɛ Belemgbunli ne meanubaka nu ɔ?"

Azɛlɛvolɛ mgbanyinli ne mɔ buale ye zele kɛ, "Yɛmɛ yɛnlɛ belemgbunli biala kɛ Siza angome."

16 Akee Paelɛte vale Gyisɛse maanle bɛ kɛ bɛhɔbɔ ye meanubaka nu.

17 Ɔti akee bɛ sa hanle ye amozii; na bɛvale ye meanubaka ne bɛzoale ye, na bɛ nee ye vile sua ne azo hɔle ɛleka ne mɔɔ bɛfɛlɛ ye Hibulu nu "Gɔlogɔta", mɔɔ ɔ bo a le kɛ "Etile Kanrɛlɛ" la. 18 Ɛkɛ ne a bɛbɔle ye nee menli nwiɔ bie noko meanubaka nu a, na Gyisɛse wɔ bɛ avinli. 19 Paelɛte hɛlɛle bɔle Gyisɛse meanubaka ne ati avinli kɛ, "Gyisɛse mɔɔ vi nazalɛte, Dwuuma belemgbunli ne ɛne." 20 Ɛleka ne mɔɔ bɛbɔle gyisɛse meanubaka nu la bikye sua ne azo; na bɛhɛlɛle ɛhye noko wɔ Hibulu, Laten, nee Giliki aneɛ ne mɔ anu, ɔti menli dɔɔnwo holale gengale.

21 Akee azɛlɛvolɛ mgbanyinli ne mɔ zele Paelɛte kɛ, "Kakyi ‘Dwuuma Belemgbunli’ ne mɔɔ wɔhɛlɛ la, yɛ ye kɛ, ‘Ɔse, mame a mele Dwuuma Belemgbunli’ ne a."

22 Paelɛte buale bɛ kɛ, "Mɔɔ mehɛlɛ la, mehɛlɛ."

23,24 Mekɛ mɔɔ azogya ne mɔ bɔle Gyisɛse meanubaka nu wiele la, bɛyɛle bɛ adwenle kɛ bɛkyɛ ye tɛladeɛ ne anu nna bɛamaa bɛ nuhua ko biala anyia bie. Noko bɛzele kɛ, "Bɛmmamaa yɛtete ye tɛladeɛ ne anu," ɔluakɛ ɔle woladapi. "Bɛmaa yɛhwe nwolɛ adunyi yɛnlea kɛ ɔkɛyɛ nwane deɛ." Ɛhye maanle mɔɔ bɛha ye Ngɛlɛlera ne anu dɛba la lile munli kɛ, "Bɛhyɛle me nwo ninyɛne ne mɔ, na eza bɛhwenle me tɛladeɛ ne noko anwo adunyi." 25 Na ɛhye noko a bɛyɛle a.

Ɛnee Gyisɛse ɔ nli, Male, yɛɛ ɔ nli adiema raalɛ ne, mɔɔ ɔ hu a le Kulopase la, yɛɛ Male mɔɔ vi Magedala la gyigyi meanubaka ne anwo ɛkɛ ne. 26 Mɔɔ Gyisɛse nwunle kɛ ɔ nli gyi ɛdoavolɛ ne mɔɔ ɔkulo ye la anwo ɛkɛ ne la, ɔzele ye kɛ, "Raalɛ ye, ɛra ne ɛne."

27 Akee ɔhanle ɔhilele ɛdoavolɛ ne noko kɛ, "Nea, ɛ nli ɛne." Ɔvi zɔhane mekɛ ne, Dwɔn vale Male hɔle ɔdaye ye sua nu.

28 Na mɔɔ Gyisɛse nwunle kɛ debie biala ɛra awieleɛ la, amaa Ngɛlɛlera ne ali munli la, ɔzele kɛ, "Nzuhɔne ku me." 29 Ɛnee nwanye bie mɔɔ yɛ ɛnwonle kɛ bɔnyema la wɔ kɔpo nu gyi ɛkɛ, ɔti bɛvale emiane bɛkyekyele baka ti na bɛvale bɛbɔle nu bɛmaanle ye kɛ ɔnlo.

30 Mɔɔ Gyisɛse vale ɔ nloa hanle ye la, ɔdeanle nu ɔzele kɛ, "Yewie," akee ɔbɔle ɔ ti aze na ɔwule.

31 Dwuuma mgbanyima ne mɔ angulo kɛ menli mɔɔ bɛbɔ bɛ meanubaka nu la kɛhenda mbaka ne azo kɛmaa alehyenlɛ ne mɔɔ le Ɛnwomenlelielɛ Kenle ne la kɛrado bɛ. Ɛhye noko le kenle kpole, ɔlua Akpabɛnwo ɛvoyia ne ati. Ɔti bɛzɛlɛle Paelɛte kɛ ɔmaa bɛbubu bɛ gyakɛ na bɛawu ndɛndɛ; amaa bɛahola bɛayeye bɛ avunli ne mɔ bɛavi mbaka ne mɔ azo. 32 Ɔti azogya ne mɔ rabubule menli nwiɔ ne mɔɔ bɛbɔle bɛ meanubaka nu bɛbokale Gyisɛse anwo la agyakɛ, 33 na mɔɔ bɛdwule Gyisɛse anwo ɛkɛ ne la, bɛnwunle kɛ yewu dɛbadɛba, ɔti bɛambubu ɔ gyakɛ ɛdeɛ ne. 34 Emomu, azogya ne mɔ anu ko vale ye atwɛ ne wɔle ɔ nvenle foa, na mogya nee nzule vi ɛkɛ ne vindele. 35 Na sonla ne mɔɔ ɛlɛdi nwolɛ daselɛ la nwunle ɛhye mɔ ɔdaye ɔ nye zo, ɛhye ati ye daselɛlilɛ ne le nɔhalɛ bɔkɔɔ, amaa ɛdawɔ noko wɔalie wɔali. 36,37 Azogya ne mɔ yɛle ɛhye amaa Ngɛlɛlera ne mɔɔ se, "Bɛnrɛbu ye bowule ko bɔbɔ anu" la ali munli. Yɛɛ eza Ngɛlɛlera ne bieko se, "Bɛbakpogya bɛ nye zo bɛanlea sonla ne mɔɔ bɛwɔle ye atwɛ ne la." Ɛhye maanle ɔdaye noko ɔlile munli.

38 Nzinlii, Dwosefi mɔɔ vi Arelematia, mɔɔ ɛnee ɔdaye noko ɔle Gyisɛse ye ɛdoavolɛma ne anu ko wɔ azule bo ɔlua kɛ ɔsulo Dwuuma ne mɔ la ati la, zile ye ahonle razɛlɛle Paelɛte adenle kɛ ɔmaa ye Gyisɛse funli ne ɔvi meanubaka ne azo. Paelɛte noko maanle ye adenle.

Ɔti ɔrale na ɔravale ye funli ne ɔhɔle. 39 Nekɔdimɛse, mɔɔ ɔdaye noko ɔrale Gyisɛse anwo ɛkɛ ne mekɛ bie wɔ nɔɔzo la, vale alufuanlɛ nee kolɔbo mɔɔ bɛfa bɛkyengye funli la tone nu ɛya ko rale. 40 Na bɛ mu nwiɔ, bɛvale ɛhye mɔ bɛguguale ɛdanlɛ tendenle bie anu na bɛvale bɛkyekyele Gyisɛse funli ne, kɛmɔ Dwuuma sonla ɛziele amaamuo ne de la. 41 Ɛleka ne mɔɔ bɛbɔle Gyisɛse meanubaka nu la bikye tola bie, mɔɔ sɛka bie mɔɔ bɛtɛsiele funli nu ɛlɛ la wɔ ɛkɛ a. 42 Ye zɔhane ati, amaa bɛ nwo ayɛ ndɛ, kolaa na ɛnwomenlelielɛ Kenle ne adwu, na eza sɛka ne bikye bɛ la ati, bɛziele ye wɔ ɛkɛ ne ala.