João 15

Nɔhalɛ nwanye tola ne

1 "Mame a le nɔhalɛ Nwanye Tola ne a, yɛɛ Egya noko a le Ɛyasovo ne a. 2 Ngane biala mɔɔ ɛnzo ma la ɔpepɛ bɛ ɔgua, na nuhua ne mɔɔ so ma noko la yemɔ ɔyeye nwolɛ amaa bɛazo dɔɔnwo kpalɛ. 3 Yeyeye bɛ nwo dɛbadɛba yemaa bɛ anwosesebɛ ɔlua mɛla ne mɔɔ menvale memaanle bɛ la ati. 4 Bɛdɛnla me nu, na medame noko mendɛnla bɛ nu. Ɔluakɛ ngane biala te ɔ nwo fi baka ne anwo a, ɔngola ɔnzo, kyesɛ ɔbeta nwanye baka ne anwo. Zɔhane ala noko yɛɛ saa bɛkoati me a, bɛnrɛhola ma biala so a.

5 "Nɔhalɛ nu, mame a le Nwanye Tola ne a; yɛɛ bɛmɛ noko a bɛle ye ngane ne mɔ a. Awie ko biala mɔɔ kɛdɛnla me nu, na medame noko menwɔdɛnla ye nu la ɔbazo ma dɔɔnwo. Ɔluakɛ saa bɛkoati me a bɛnrɛhola ɛhwee biala yɛ. 6 Awie biala mɔɔ kɛde ɔ nwo kɛvi me nwo la bɛpɛ ye bɛto, na ɔyɛ ɛyɛne bɛfa ye bɛkua senle. 7 Na saa bɛtɛnla me nu na bɛdi me mɛla zo a, yemɔ debie biala mɔɔ bɛkɛbiza me la, menwɔyɛ menwɔmaa bɛ. 8 Ɛdoavolɛ biala mɔɔ nɔhalɛ nu le me deɛ la so ma dɔɔnwo. Na ɛhye noko fa anyunlunyia kpole bɛlɛ Egya.

9 "Kɛmɔ Selɛ ne kulo me la, zɔhane ala a medame noko mekulo bɛ a; ɔti bɛdɛnla me ɛhulolɛ nu. 10 Saa bɛdi me mɛla zo a mebanyia bɛ nwo ɛhulolɛ dahuu, kɛmɔ medi Egya mɛla zo na ɔlɛme nwo ɛhulolɛ la. 11 Meha ɛhye mɔ mehile bɛ, amaa bɛali fɛlɛko ne mɔɔ melɛdi la bie, amaa bɛ fɛlɛkolilɛ ne ali munli. 12 Me mɛla ne ɛne: bɛhulo bɛ nwo ngoko ngoko kɛmɔ mehulo bɛ la. 13 Ɛhulolɛ biala ɛndɛla kɛ sonla kɛva ye ngoane kɛdo ɛkɛ kɛmaa ɔ gɔnwo mɔ. 14 Na saa bɛdi me mɛla zo noko a, ɛnee bɛle me gɔnwo mɔ. 15 Bɛnle me ngɛkɛlɛ bieko, ɔluakɛ menlelɛ ɛnga ɔ ti anu edwɛkɛ ɛngile ye ngɛkɛlɛ. Ɔti saa meha mɔɔ Egya hanle hilele me la amuala mehile bɛ ɛdeɛ a, ɛnee ɔkile kɛ bɛle me gɔnwo mɔ.

16 "Tɛ bɛmɛ a bɛyele me a; na emomu mame a menyele bɛ a. Menyele bɛ amaa bɛazo ma kpalɛ dahuu, amaa saa bɛdua me duma nu bɛbiza Selɛ ne debie biala a yeava yeamaa bɛ. 17 Me mɛla mɔɔ mefa meamaa bɛ la ɛne. Bɛhulo bɛ nwo ngoko ngoko. 18 Bɛhakye kɛ saa ewiade kpɔ bɛ a, ɛnee bɛmmamaa ɔyɛ bɛ ɛzulolɛ, ɔluakɛ ɔlumuale ɔkpɔle me dɛba kolaa na yeakpɔ bɛ. 19 Saa bɛle ewiade amra a anrɛɛ ewiade bahulo bɛ edwɛkɛ, na ɔluakɛ meye bɛ mevi ewiade, na bɛnle ye deɛ bieko la ati, yemɔ a le bɛ anwubɛnyunlu. 20 Asoo bɛkakye mɔɔ menganle mengilele bɛ la ɔ? ‘Akɛlɛ ɛndɛla ɔ menle dibilɛ!’ Ɔti saa bɛhwi mame bɔbɔ me nyunlu a, ɛnee bɛnwu ye wienyi kɛ bɛbahwi bɛdabɛ noko bɛ nyunlu. Yɛɛ saa bɛdiele me noko a, anrɛɛ bɛbadie bɛdabɛ noko. 21 Aleɛabo amra bagyegye bɛ kɛmɔ bɛle me deɛ la ati, ɔluakɛ bɛnze ahenle ne mɔɔ zoanle me la.

22 "Saa meamba meammanga edwɛkɛ ne meangile bɛ a, anrɛɛ bɛnli fɔlɛ. Na kɛkala ɛdeɛ, bɛngola bɛnza bɛ ne wɔ bɛ ɛtane ne mɔ anwo. 23 Awie biala mɔɔ kpɔ me la ɛnee ɔkpɔ Egya noko. 24 Saa meanyɛ nwanwane ninyɛne zɔhane mɔɔ awie biala ɛtɛyɛle bie ɛlɛ la wɔ bɛ nye zo a, anrɛɛ bɛnli fɔlɛ. Na kɛkala mɔ, yeamba ye zɔhane; ɔboalekɛ bɛnwu nwanwane gyima ne, noko akee bɛbu zo na bɛkpɔ me nee Egya ne. 25 Ɛhye noko ɛmaa mɔɔ ngapezoma ne mɔ hanle wɔ Sonla Ra ne anwo kɛ: ‘Bɛkpɔle me ɛkpɔlɛ gyɛne’ la ɛyɛ nɔhalɛ bɔkɔɔ.

26 "Na saa Arɛlekyekyevolɛ ne, mɔɔ le Nɔhalɛ Sunsum ne mɔɔ vi Egya nu mɔɔ mebazoa ye meavi Egya ne lɔ la ba a, ɔbali me nwo daselɛ. 27 Bɛdabɛ noko bɛle me alasevolɛ, ɔluakɛ bɛ nee me a bɔle me gyimayɛlɛ ne abo a."