João 3

Gyisɛse ɛyia Nekɔdimɛse fealera nu

1,2 Kenle ko nɔɔzo bie Dwuunli kpanyinli ko mɔɔ vi Falasiima eku ne anu mɔɔ bɛfɛlɛ ye Nekɔdimɛse la rale Gyisɛse ɛkɛ, kɛ ɔ nee ye bali adwelie. Ɔzele Gyisɛse kɛ, "Yɛmenle, yɛ muala yɛze kɛ ɛle kilehilevolɛ mɔɔ Nana Nyamenle a amgba zoanle wɔ a. Wɔ nwanwane ninyɛne ne mɔ di ɛhye anwo daselɛ bɔkɔɔ."

3 Gyisɛse buale ye kɛ, "Mese wɔ nɔhalɛ nu ala kɛ: Saa bɛanwo wɔ fofolɛ a, yemɔ ɛnrɛhola Nana Nyamenle Anwuma belemgbunli maanle ne anu kɔ ɛlɛ."

4 Nekɔdimɛse deanle nu zele kɛ, "Duzu edwɛkɛ a le ɛhye? Kɛ ɔkɛyɛ na sonla mɔɔ ɛnyi la bɛazia bɛawo ye bieko ɛ? Ɔkɛhola ɔkɛzia ɔkɛhɔ ɔ nli akunlu ɔkɛmaa ɔkɛwo ye bieko ɔ?"

5 Gyisɛse zele ye kɛ, "Meka ye nɔhalɛ nu mekile wɔ kɛ: Saa bɛtɛwole sonla fofolɛ wɔ nzule nee Sunsum nu a, ɔnrɛhola Nyamenle Anwuma maanle ne anu kɔ. 6 Mɔɔ bɛwo ye wɔ nwonane nu la le nwonane, yɛɛ mɔɔ bɛwo ye wɔ Sunsum nu la le sunsum; 7 zɔhane ati mmamaa ɔyɛ wɔ azibɛnwo kɛ mese ɔwɔ kɛ bɛwo wɔ bieko a. 8 Kɛmɔ ɛte anwoma nganeɛ, noko ɛnze ɛleka mɔɔ ɔvi ɔba anzɛɛ ɛleka mɔɔ ɔlɛkɔ la, zɔhane ala a Sunsum ne noko de a."

9 Nekɔdimɛse zele kɛ, "Kɛ ɔkɛyɛ na ɛhye ahola azi ɛ?"

10,11 Gyisɛse buale ye kɛ, "Ɛse ɛle Yizilayɛ kilehilevolɛ, yɛɛ akee noko ɛnde ɛhye abo a? 12 Saa meha azɛlɛ ye azo edwɛkɛ mehile wɔ na ɛnlie ɛnli a, ɛnee kɛ ɔkɛzi ɔkɛyɛ na meka anwuma edwɛkɛ mekile wɔ a, ɛnee wɔalie wɔali ɛ? 13 Awie biala ɛtɛkɔle anwuma maanle ne anu kɛ Nyamenle Ara kotokokye ne ala mɔɔ vi nehane ɛra la. 14 Na kɛmɔ Mosisi maanle kɔbele ɛwɔlɛ sɛkɛlɛneɛ ne zo wɔ fiemgbole ne azo la, zɔhane ala a bɛbamaa Sonla Ra ne zo a, 15 amaa ɔlua zo awie biala mɔɔ kɛlie ye kɛli la yeanyia ngoane mɔɔ ɔnlɛ awieleɛ. 16 Ɔluakɛ, kɛmɔ Nana Nyamenle hulole ewiade kpole la ati yɛɛ ɔyele ye ɛhulolɛ Ralɛ kotokokye ne ɔmaanle, amaa awie biala mɔɔ kɛlie ye kɛli la angɔ munzule nu na emomu ɔkɛnyia ngoane mɔɔ ɔnlɛ awieleɛ a. 17 Nana Nyamenle anzoa ɔ Ra ne kɛ ɔrabu ewiade fɔlɛ, na emomu ɔzoanle ye kɛ ɔralie ye ngoane.

18 "Awie biala mɔɔ die ye di la ɛnde munzule biala anu. Emomu bɛdabɛ mɔɔ bɛnlie ye bɛnli noko la, bɛbu bɛ fɔlɛ dɛbadɛba, ɔluakɛ bɛanlie Nana Nyamenle Ara kotokokye ne bɛanli. 19 Bɛ ndɛnebualɛ ne abo a le kɛ: Wienyi anzɛɛ Kɛnlaneɛ ne vi anwuma maanle ne anu rale ewiade anu, noko akee bɛhulole awozinli ne bɛdɛlale Wienyi anzɛɛ Kɛnlaneɛ ne, ɔlua bɛ ninyɛndane ne ati. 20 Bɛvale anwuma maanle ne Wienyi anzɛɛ Kɛnlaneɛ ne anwo ɛkpɔlɛ, ɔboalekɛ bɛhulole kɛ bɛkɛvea awozinli nu na bɛkɛyɛ bɛ ninyɛmunli ne. Bɛvile Wienyi anzɛɛ Kɛnlaneɛ ne anwo kɛmɔ bɛsulo kɛ bɛ ninyɛmunli ne kɛla ali na bɛkɛhwe bɛ nzo wɔ nwolɛ la ati. 21 Na bɛdabɛ noko mɔɔ bɛyɛ kpalɛ la ba Wienyi anzɛɛ Kɛnlaneɛ ne anu amaa awie biala anwu bɛ gyima kpalɛ ne mɔɔ bɛlɛdi, mɔɔ le Nyamenle ɛhulolɛdeɛ ne anwo gyima la."

22 Nzinlii Gyisɛse nee ye ɛdoavolɛma ne mɔ vile Gyɛlusalɛm hɔle Dwudiya maanle nu, na bɛhyɛle ɛkɛ ne ekyii bɛzɔnenle menli.

Dwɔn nee Gyisɛse

23,24 Mekɛ ɛhye anu ɛnee bɛtɛnyianle bɛtɛtole Dwɔn Sɔnevolɛ ne efiade. Ɛnee ɔwɔ Enɔn, mɔɔ zua Salem la ɔlɛsɔne menli, ɔluakɛ, ɛkɛ ne afoa nu a ɛnee nzule dɔɔnwo wɔ a. 25 Kenle ko awie nee Dwɔn ɛdoavolɛma ne mɔ zule kpolera kɛ Gyisɛse ɛzɔnenlɛ nu azubɔlɛ ɛdeɛ ne a le kpalɛ a. 26 Ɔti bɛrale Dwɔn ɛkɛ na bɛzele ye kɛ, "Yɛmenle, nrenyia ne mɔɔ ɛyiale ye wɔ Azule Dwɔdan ne anzi lɔ, mɔɔ ɛse yemɔ a le Ngoanedievolɛ ne la noko ɛlɛsɔne menli, yɛɛ ɛleka ne mɔɔ ɔwɔ la a menli ne kpokpoti ɛlɛpia bɛ nwo ahɔ a."

27 Dwɔn buale kɛ, "Awie biala nee ye gyima mɔɔ Nana Nyamenle ɛva ɛwula ɔ sa a. 28 Me gyima ɛdeɛ ne a le kɛ menwɔziezie adenle ne anu menwɔmaa nrenyia zɔhane, amaa awie biala adoa ye. Bɛkɛhakye kɛ menganle ye wienyi mengilele bɛ kɛ tɛ mame a le Ngoanedievolɛ ne a. Me deɛ ne ala a le kɛ membanzieziele adenle ne anu memaanle ye. 29 Kɛ ɔkɛyɛ biala la, ye ɛkɛ ne ala a menli dɔɔnwo ne ala bahɔ a. Atɔfolɛ nrenyia ne anwo a atɔfolɛ raalɛ ne kɔ a! Yɛɛ atɔfolɛ nrenyia ne agɔnwo mɔ noko nee ye di nwolɛ fɛlɛko. Mame yɛɛ mele Atɔfolɛ Nrenyia ne agɔnwo ne a, ɔti fɛlɛko ɛyi me tɛkɛɛ wɔ ye anyunluhɔlɛ ne anwo. 30 Ɔwɔ kɛ ye dibilɛ ne kɔ anwuma anwuma tɛla me."

31 "Yemɔ ɔvi anwuma maanle ne anu a yera a, ɔti ɔle kpole ɔtɛla awie biala. Mame mevi azɛlɛ ye azo ɛke ala, ɔti me ndelebɛbo ne noko wɔ aze ɛke ala. 32 Yemɔ ɔdi mɔɔ ɔdaye mumua ne yenwu ye na yede la anwo daselɛ, noko akee menli ekyii bie ala a die ye di a!

33,34 "Bɛdabɛ mɔɔ bɛdie ye bɛdi noko la nwu kɛ Nana Nyamenle le nɔhalɛdivo kpole. Ɔluakɛ, sonla ɛhye mɔɔ Nana Nyamenle ɔdaye mumua ne ɔzoanle ye la ka Nana Nyamenle edwɛkɛ ne komii, kɛmɔ Nana Nyamenle Sunsum ne mɔɔ dwule ɔ nwo zo la le kpole la. 35 Selɛ ne kulo nrenyia ɛhye edwɛkɛ, ɔluakɛ ɔ Ra a le ye, yɛɛ Nana Nyamenle noko ɛva ninyɛne muala ɛwula ɔ sa. 36 Na bɛdabɛ mɔɔ bɛdie Nyamenle Ra ne bɛdi la amuala lɛ damɛnlangoate ngoane; bɛdabɛ mɔɔ bɛnlie ye bɛnli na eza bɛnli ye mɛla zo la ɛnrɛnwu anwuma maanle ne anu ɛlɛ, na munzule totohyia kpalɛ noko baha bɛ dahuu."