1,2 Mɔɔ Awulae nwunle kɛ Falasiima mgbanyima ne mɔ ɛde kɛ menli dɔɔnwo ɛlɛba ye ɛzɔnenlɛ ne abo, bɔbɔ tɛ ɔdaye mumua ne a ɔlɛsɔne bɛ a, na ye ɛdoavolɛma ne mɔ angome ala a ɛlɛsɔne adɛla Dwɔn ɛdeɛ ne la, 3 ɔvile Dwudiya na ɔziale ɔhɔle Galeli maanzinli ne anu.

4 Mɔɔ ɔkɔ la ɛnee ɔwɔ kɛ ɔdua Samɛlea, 5,6 na kɛyɛ sɛnzɛngyinla yɛɛ ɔdwule Gyekɔbo bula ne mɔɔ wɔ azɛlɛ ne mɔɔ ɔvale ɔmaanle ɔ ra Dwosefi la azo, wɔ mɔɔ ɔka ekyii ɛdwu Saekaa sua ne azo la anwo a; na kɛmɔ ɛnee Gyisɛse ɛvɛ la ati ɔdɛnlanle bula ne anwo.

7 Yeangyɛ biala Samɛleanli raalɛ bie rale kɛ ɔbaza nzule; Gyisɛse zɛlɛle ye kɛ ɔmaa ye bie ɔnlo. 8 Ɛnee yeha ɔ ngomekye ala, ɔluakɛ, ɛnee ye ɛdoavolɛma ne mɔ ɛhɔ sua zo kadɔ aleɛ. 9 Ɔzinle raalɛ ne anwo kpole kɛ Dwuunli kɛbiza yemɔ Samɛleanli debie a, ɔluakɛ, bɛ nee bɛ ɛndendɛ mgbane bɔbɔ, na ɔyɛle ɛhye nzonlɛ na ɔhanle ɔhilele Gyisɛse.

10 Gyisɛse buale ye kɛ, "Saa ɛze nwanwane ahyɛlɛdeɛ mɔɔ Nana Nyamenle ɛlɛfa amaa wɔ, na eza ɛze me sonla holɛ a, anrɛɛ ɛkɛbiza ngoane nzule ɛkɛvi me ɛkɛ!"

11 Raalɛ ne zele ye kɛ, "Ɛdawɔ mumua ne ɛlɛ ɛ sa mgbane, ɛnlɛ nyɛma, yɛɛ ɛnlɛ bokiti! Ɛnee nienwu bɔbɔ a ɛbanyia ngoane nzule ɛhye a? Bula ye noko le kuma kpalɛ! 12 Anzɛɛ ɛkpondɛ wɔaze me kɛ ɛle sonlakpole ɛtɛla yɛ ze Gyekɔbo ɔ? Kɛ ɔkɛzi ɔkɛyɛ na ɛdawɔ wɔahola wɔamaa yɛ nzule kpalɛ adɛla mɔɔ yɛ ze Gyekɔbo nee ɔ mra nee ye nlankɛ bɛnlonle la ɛ?"

13 Gyisɛse buale kɛ, saa menli no nzule ɛhye bie a ɔngyɛ ɛnee nzuhɔne ɛlɛku bɛ bieko. 14 Ɔzele kɛ, "Noko akee me nzule ɛdeɛ ne mɔɔ menwɔva menwɔmaa la kakyi azudenle mɔɔ ɔmaa bɛ ngoane mɔɔ ɔnlɛ awieleɛ la."

15 Raalɛ ne akee zele kɛ, "Yɛmenle, mebodo wɔ, maa me nzule zɔhane bie; ammaa ɔlua nzule ti dahuu meandia adenle tendenle ɛhye."

16 Gyisɛse zele ye kɛ, "Kɔ kɔvɛlɛ ɛ hu na ɛ nee ye bɛrɛla."

17,18 Raalɛ ne buale ye kɛ, "Menlɛ me hu."

Gyisɛse buale zele ye kɛ, "Nɔhalɛ, ɛnlɛ ɛ hu amgba! Ɔluakɛ wɔhɔ agyalɛ fane nnu, na nrenyia ne mɔɔ ɛ nee ye veɛvea ɛkɛ ne kɛkala la yemɔ ɔtɛgyale wɔ bɔbɔ."

19 Raalɛ ne deanle nu zele kɛ, "Yɛmenle, mekola menwu kɛ ɛle kapezonli bɔkɔɔ. 20 Emomu kile me deɛmɔti bɛmɛ Dwuuma bɛse Gyɛlusalɛm ala a ɔwɔ kɛ awie biala sonle Nyamenle wɔ la; wɔ mekɛ mɔɔ yɛmɛ Samɛleama noko yɛse wɔ Boka Gɛlaezem ne azo a ɔwɔ kɛ bɛsonle Nyamenle la."

21-24 Gyisɛse zele ye kɛ, "Ɔnrɛhyɛ biala ɛnee ɛhye mɔ biala ɛngyia bieko kɛ yɛkɛzonle Selɛ ne wɔ Gyɛlusalɛm anzɛɛ boka ye azo. Ɔluakɛ tɛ ɛleka mɔɔ yɛsonle ye la a ahyia a, na emomu kɛ yɛsi yɛsonle ye la ɔ. Ɔluakɛ, Nana Nyamenle le Sunsum, ɔti bɛdabɛ mɔɔ bɛsonle ye la ɔwɔ kɛ sonle ye wɔ sunsum nee nɔhalɛ nu."

25 Raalɛ ne zele kɛ, "Nɔhalɛ, meze kɛ Ngoanedievolɛ ne, mɔɔ eza bɛfɛlɛ ye Kelaese la bara, na yemɔ yɛɛ saa ɔba a ɔbahile ninyɛne muala anu yeahile yɛ a."

26 Gyisɛse zele ye kɛ, "Mame a le Ngoanedievolɛ ne a!"

27 Na ɛkɛ ne ala yɛɛ akee ye ɛdoavolɛma ne rale a. Ɔzinle bɛ nwo kɛ ɔ nee raalɛ ɛlɛtendɛ a, noko akee bɛ nuhua biala angola nwolɛ edwɛkɛ biza.

28,29 Raalɛ ne akee gyakyile ye buakɛ ne wɔ bula ne anwo ɛkɛ, na ɔziale ɔhɔbɔle sua ne azo amra amuala amaneɛ ɔzele kɛ, "Bɛranlea nrenyia bie mɔɔ yeha mɔɔ mɛyɛ la amuala yehile me a! Asoo tɛ ɛhye a le Ngoanedievolɛ ne ɔ?" 30 Ɛhye ati menli ne mɔ noko dule twi vile namule ne anu rale kɛ bɛbanlea Gyisɛse.

31 Mekɛ ɛhye amuala ɛnee ɛdoavolɛma ne mɔ ɛlɛbodo Gyisɛse kɛ ɔli debie. 32 Noko ɔzele bɛ kɛ, "Kyɛkyɛ." Ɔvale ɔzɔle zo kɛ, "Melɛ aleɛ bie medi mɔɔ bɛmɛ bɛnze a."

33 Na ɛdoavolɛma ne mɔ bizale bɛ nwo ngoko ngoko kɛ, "Ɛnee nwane a ɛrɛlɛ ye aleɛ ne a?"

34 Gyisɛse akee hanle ye wienyi kɛ, "Mame me aleɛ a le kɛ menwɔyɛ Awulae Nyamenle ne mɔɔ zoanle me la gyima ne nee ye ɛhuloledeɛ ne. 35 Asoo bɛnze kɛ yeha siane nna na aleɛbulɛ mekɛ ne adwu zo ɔ? Nea! Mese bɛ kɛ; bɛmaa bɛ nye zo bɛnlea ɛya ne mɔ kɛ aleɛbulɛ mekɛ ne ɛdwu a. 36 Menli mɔɔ babu la banyia ahatualɛ kpalɛ, na bɛbava aleɛ dɔɔnwo bɛagua mbonwole ne mɔ azo! Na fɛlɛkolilɛ bedevinli baha duavolɛma ne nee buvolɛma ne mɔ amuala. 37 Ɔboalekɛ, ɔle nɔhalɛ bɔkɔɔ kɛ bie mɔ dua, yɛɛ bie mɔ noko bu. 38 Na menzoanle bɛ wɔ mɔɔ awie mɔ ɛlua ye dɛba la anu; awie mɔ a yɛle gyima ne a, yɛɛ bɛmɛ bɛhɔ bɛhɔbu a."

39 Ɔlua raalɛ ne daselɛ ne mɔɔ ɔlile ye ɔ nwo mɔɔ se, "Yeha mɔɔ meyɛ ye fealera nu la amuala yehile me" la ati, menli ne mɔɔ vi Samɛlea sua ne azo rale la anu dɔɔnwo liele lile kɛ amgba yemɔ a le Ngoanedievolɛ ne a. 40,41 Na mɔɔ bɛradole Gyisɛse wɔ bula ne azo la, bɛzɛlɛle ye kɛ ɔ nee bɛ ɛdɛnla; na ɔdaye noko ɔkponlenle zolɛ, na ɔ nee bɛ dɛnlanle kenle nwiɔ. Na menli dɔɔnwo dele edwɛkpa ne na bɛliele ye bɛlile. 42 Bɛzele raalɛ ne kɛ, "Akee tɛ mɔɔ ɛhanle la ala ati a yɛlie yɛli bɔbɔ a; na yɛdayɛ mumua ne yɛdie ye yɛdi, na yɛnwu ye kofee kɛ amgba yemɔ a le Kelaese, aleɛabo Ngoanedievolɛ ne a."

43,44 Na kenle nwiɔ, ne anzi, ɔhɔle Galeli. Gyisɛse mumua ne ɛlumua ɛha kɛ, "Kapezonli biala ɛnlɛ anyunlunyia wɔ ɔdaye ye sua zo." 45 Zɔhane ati, ɔdwule Galeli la, bɛliele ye bɛdole nu ɔluakɛ, bɛnwunle ye nwanwane ninyɛne ne mɔɔ ɔyɛle wɔ mekɛ mɔɔ bɛhɔle Akpabɛnwo ɛvoyia ne abo wɔ Gyɛlusalɛm la.

46,47 Mɔɔ ɔpɛ nu wɔ Galeli la, ɔravindele Kana, sua ne mɔɔ ɔhakyile nzule ne nwanye wɔ zo la azo la azo. Na ɔwɔ ɛkɛ ne la, Arane gyima nu kpanyinli bie mɔɔ vi Kapɛnayɛm na ɔ ra nrenyia anwo ɛdo ye ɛsesebɛ la dele kɛ Gyisɛse vi Dwudiya ɛlɛpɛ nu wɔ Galeli. Nrenyia ɛhye zile nu too ɔhɔle Kana ɔhɔkpondɛle Gyisɛse na ɔzɛlɛle ye kɛ ɔralie ɔ ra ne mɔɔ asɛɛ ɛwu la ngoane.

48 Gyisɛse bizale ye kɛ, "Ɔti bɛ nuhua biala ɛnrɛlie me ɛnrɛli kyesɛ meyɛ nwanwanedeɛ na mekile sɛkɛlɛneɛ molozo kolaa anzɛɛ?"

49 Na nrenyia ne zele ye kɛ, "Yɛmenle, saa wɔammaa ɛ nwo anyɛ ndɛ wɔamba a me ra ne bawu."

50 Gyisɛse akee zele ye kɛ, "Sia kɔ sua nu. Ɛ ra ne ɛde kpɔkɛ!" Nrenyia ne noko liele Gyisɛse lile na ɔzile nu kɛ ɔkɔ sua nu. 51 Mɔɔ ɔlua adenle zo la, ye azonvolɛ ne mɔ bie yiale ye na bɛbɔle ye amaneɛ kɛ, ɔ ra ne ɛde kpɔkɛ bɔkɔɔ. 52 Ɔbizale bɛ kɛ, "Ɛnee mekɛ ne boni a ɔbɔle ɔ bo kɛ ɔte kpɔkɛ a?" Na bɛbuale ye kɛ, "Anoma ewiazo kɛyɛ dɔne ko yɛɛ ye ebunlu ne dule arɛlevilɛ nu a!" 53 Na selɛ ne nwunle kɛ mekɛ ne mɔɔ Gyisɛse hanle edwɛkɛ ne la anu ala ɔ. Akee ɔ nee ye aako nu amra amuala liele lile kɛ amgba Gyisɛse a le Ngoanedievolɛ ne a.

54 Ɛhye yɛɛ ale Gyisɛse nwanwanedeɛ mɔɔ tɔ zo nwiɔ mɔɔ ɔvi Dwudiya ɔrale Galeli la ɔyɛle a.