1 Ɛhye anzi, Gyisɛse pɛle Galeli Nyevile ne, mɔɔ ye duma bieko a le Taebilease Nyevile la. 2-5 Na menli pemgbenlamgbe ne ala, mɔɔ bɛ nuhua bie mɔ dɔɔnwo mɔɔ ɛnee ɛlɛkɔ Gyɛlusalɛm bɛahɔli Akpabɛnwo ɛvoyia ne bie la doale Gyisɛse wɔ ɛleka biala mɔɔ ɔkɛva la kɛ bɛkanlea kɛ ɔsi ɔyɛ wuliravolɛma ayile a. Ɛhye ati mekɛ mɔɔ Gyisɛse vole hɔdɛnlanle boka ne azo, na ye ɛdoavolɛma ne mɔ bɔle yiale ye la, yeangyɛ biala yɛɛ ɔnwunle kɛ menli pemgbenlamgbe bie ɛlɛfo boka ne bɛakpondɛ ye a.

Ɔhakyile ɔ nye ɔnleanle Felepe na ɔbizale ye kɛ, "Felepe, nienwu a yɛkɛnyia aleɛ yɛkɛdɔ yɛkɛmaa menli dɔɔnwo ɛhye mɔ a?" 6 Ɛnee ɔlɛsɔ Felepe yeanlea ala, ɔluakɛ ɛnee ɔze deɛ mɔɔ ɔbayɛ la ɔsie.

7 Felepe buale kɛ, "Kyesɛ menli ɛya nwiɔ kenle ko ahatualɛ na ahola ayɛ ɛhye!"

8,9 Akee Saemɔn Pita adiema, Andelu, zele bɛ kɛ, "Kakula bie wɔ ɛke mɔɔ ɔlɛ kpanwo dɔlɔfo nnu ɔ nee fɛlɛ nwiɔ a! Noko akee duzu bɔbɔ a ɛhye kɛhola kɛyɛ kɛmaa menli ɛwolaa ɛhye a?"

10 Gyisɛse zele bɛ kɛ, "Bɛmaa awie biala ɛdɛnla aze." Na bɛ muala, mɔɔ bɛ dodo le kɛyɛ apenle nnu la, bɛdɛnlɛdɛnlanle aze wɔ ndile ne azo. 11 Akee Gyisɛse vale kpanwo dolɔfo ne mɔ na ɔyilale zolɛ, ɔyɛle Nana Nyamenle mo na ɔvale ɔmaanle bɛ. Eza ɔyilale fɛlɛ ne noko azo ɔmaanle bɛ muala bɛlile, na awie biala ako yile tɛkɛɛ!

12 Bɛwiele aleɛ ne di la, Gyisɛse zele ye ɛdoavolɛma ne mɔ kɛ, "Bɛsesa ɔ bo zo mgbokpoleka ne ammaa biala anyɛ gyɛne." 13 Bɛsesale la bɛnyianle ahɛndɛne tetɛkɛɛ bulu nee nwiɔ!

14 Mekɛ mɔɔ menli ne mɔ nwunle nwanwanedeɛ ɛhye la, ɔyɛle bɛ azibɛnwo totohyia, ɔti bɛdeanle nu bɛzele kɛ, "Amgba, kapezonli ne mɔɔ yɛ nye la ye ade la a ɛra la!"

15 Gyisɛse nwunle kɛ bɛyɛ anwomoalɛ kɛ bɛkye ye bɛazie ye bɛ belemgbunli, ɔti ɔ ngome ɔvole ɔhɔle awoka ne mɔ azo.

16 Nɔsolɛ ko ne ala, ye ɛdoavolɛma ne mɔ lumuale ɛnweazo lɔ kɛ bɛkahendɛ ye. 17 Mɔɔ aleɛ dwole na Gyisɛse ɛmba la, bɛvole ɛlɛne nu kɛ bɛpɛ azule tandane ne bɛahɔ Kapɛnayɛm. 18,19 Yeangyɛ biala yɛɛ ahumu kpole bie bɔle ɔ bo kɛ ɔtu a, ɔti ɛhye maanle nyevile ne yɛle begyebegye zɛhae. Ɛnee noko bɛhɔ kuma nu kɛyɛ mayɛle nsa anzɛɛ nna bɔbɔ. Arɛlevilɛ nu ala bɛnwunle kɛ Gyisɛse ɛletiedia azule ne anye ara ɛlɛne ne anwo! Bɛ ahonle dule kpole kpalɛ, 20 na yemɔ ɔdeanle nu ɔvɛlɛle bɛ ɔzele bɛ kɛ bɛmmasulo. 21 Akee anyelielɛ nu ala, bɛmaanle ye adenle bɛmaanle ɔravole ɛlɛne ne anu, na ɛkɛ ne ala bɛnwunle kɛ bɛdwu file zo wɔ ɛleka mɔɔ bɛkɔ la.

22,23 Aleɛ hyenle nwonlomɔ la, menli ekpunli ekpunli dɔɔnwo bie rayiale ɛnwea ne anloa kɛ bɛbakpondɛ Gyisɛse. Ɔluakɛ ɛnee bɛze kɛ ɔ nee ye ɛdoavolɛma ne mɔ a rale a, na ɛdoavolɛma ne mɔ noko gyakyile ye ɛkɛ ne a hɔle a: na yemɔ yeanvo ɛlɛne ne anu bie. Ɛnee noko nlɛne ngyikyi ngyikyi dɔɔnwo mɔɔ vi Taebilease la wɔ ɛvoleɛ ne, 24 ɔti mekɛ mɔɔ menli ne mɔ nwunle kɛ Gyisɛse anzɛɛ ye ɛdoavolɛma ne mɔ ɛnle ɛkɛ la, bɛfofole nlɛne ne mɔ anu bɛpɛle azule ne bɛhɔle Kapɛnayɛm kɛ bɛkakpondɛ ye.

25 Mekɛ mɔɔ bɛdwule aze na bɛhɔnwunle ye la, bɛzele kɛ, "Kilehilevolɛ, kɛ ɛzile ɛdwule ɛke ɛ?" 26 Gyisɛse buale kɛ, "Memaa bɛade bɛ nwo ɔ bo wienyi kɛ aleɛ ne mɔɔ memaanle bɛ la ati a bɛdoa me a, na tɛ kɛ bɛdie me bɛdi la ati ɔ. 27 Emomu ɔnle kɛ bɛfonla bɛ nwo wɔ aleɛ ne mɔɔ ɛngyɛ na yeazɛkye la anwo. Ɔti bɛva bɛ anwosesebɛ ne bɛkpondɛ ngoane ne mɔɔ ɔnlɛ awieleɛ, mɔɔ Mame Ngoanedievolɛ ne mevi anwuma maanle ne anu mera kɛ mefa mearɛlɛ bɛ la. Ɔluakɛ ɛhye ala ati a Nyamenle Selɛ ne zoanle me a."

28 Bɛzele ye kɛ, "Duzu a yɛyɛ a ɛnee ɔkɛzɔ Nyamenle Selɛ ne anye a?"

29 Gyisɛse zele bɛ kɛ, "Mɔɔ Selɛ ne kpondɛ ala la a le kɛ bɛkɛlie sonla ne mɔɔ yezoa ye la bɛkɛli."

30,31 Ɛhye anwo bɛbuale ye kɛ, "Saa ɛkulo kɛ yɛdie wɔ yɛdi kɛ wɔmɔ a le Ngoanedievolɛ ne a, ɛnee yɛ nwanwane debie maa yɛnlea. Maa yɛ aleɛ dahuu, kɛmɔ egya mɔ nyianle ye wɔ fiemgbole ne azo la! Kɛmɔ Ngɛlɛlera ne se la, ‘Mosisi maanle bɛ "manna" anzɛɛ aleɛ mɔɔ vi anwuma.’ "

32 Gyisɛse zele bɛ kɛ, "Tɛ Mosisi a vale maanle bɛ a. Egya a maanle bɛ a. Na yemɔ noko a eza ɔlɛmaa bɛ nɔhalɛ Kpanwo ne mɔɔ vi anwuma maanle ne anu la kɛkala a. 33 Nɔhalɛ Kpanwo ne a le Sonla ne mɔɔ yezoa ye yemaa yevi anwuma maanle ne anu yera la, yɛɛ yemɔ a maa ewiade ngoane a."

34 Akee bɛzele ye kɛ, "Awulae, maa yɛ zɛhae kpanwo ne bie dahuu!"

35 Gyisɛse buale kɛ, "Mame a mele Ngoane Kpanwo ne a. Awie biala mɔɔ kɛdoa me bo zo la ɛhɔne ɛnrɛhu ye bieko ɛlɛ. Bɛdabɛ noko mɔɔ bɛdie me bɛdi la nzuhɔne ɛnrɛhu bɛ ɛlɛ. 36 Emomu mɔɔ yɛ nyane la a le kɛ, bɛnwu me, noko akee bɛnlie bɛnli. 37 Noko meze kɛ nuhua ne mɔ mɔɔ Egya ɛye bɛ ɛmaa me la bara me ɛkɛ ne, na menrɛkpo bɛ noko ɛlɛ kenlebie maanle nu. 38 Ɔluakɛ, Egya ne ɛhulolɛdeɛ ti a mevi anwuma maanle ne anu membale kɛ mebayɛ a, na tɛ medame me ti anwo ɛlilɛ ti a membale a. 39 Egya ne ɛhulolɛdeɛ ne noko a le kɛ, ɔnle kɛ memaa mɔɔ yeva yemaa me la anu kokye bɔbɔ minli, emomu ɔwɔ kɛ memaa bɛ zo mekɔ damɛnlangoate ngoane nu wɔ Kenle ne mɔɔ li amozi ne la anu. 40 Ɔluakɛ, Egya ne ɛhulolɛdeɛ a le kɛ, awie biala mɔɔ kɛnwu Sonla Ra ne na ɔkɛlie ye ɔkɛli la banyia ngoane mɔɔ ɔnlɛ awieleɛ a. Mebadwazo ye wɔ Ewuledwazolɛ Kenle ne anu."

41 Ɛhye maanle Dwuuma ne mɔ bɔle ɔ bo kɛ bɛtendɛ bɛ nzo abo bɛatia ye, ɔboalekɛ ɔyɛle ɔ nwo kɛ ɔdaye mumua ne a ɔle Kpanwo ne mɔɔ vi anwuma maanle ne anu la. 42 Na bɛdeanle nu bɛzele kɛ, "Wio! Anzɛɛ tɛ ɛhye a Gyisɛse, Dwosefi ara ne mɔɔ yɛze ɔ ze nee ɔ nli la ɔ? Na kɛ ɔsi mɔɔ akee ɛnɛ ɔse yɛ kɛ ɔvi anwuma a ɔrale ɛ?"

43 Gyisɛse zele kɛ "Bɛmmatendɛ bɛ nzo abo wɔ ɛhye mɔɔ meha la ati. 44 Ɔluakɛ awie biala ɛnrɛhola ɛnrɛdoa me kyesɛ Selɛ ne mɔɔ zoanle me la twe ye bɛlɛ me, na dodo biala noko mɔɔ ɔkɛhwe bɛ ɔkɛmaa me la, mebadwazo bɛ meara ngoane nu bieko wɔ Ewudwazo Kenle ne. 45 Kɛmɔ bɛhɛlɛ ye wɔ Ngɛlɛlera ne anu la, ‘Nana Nyamenle bahilehile bɛ muala!’ Bɛdabɛ mɔɔ Selɛ ne kɛdendɛ kɛhile bɛ mɔɔ bɛkɛnwu nɔhalɛ ne la, bɛbara me ɛkɛ ne. 46 Ɛhye ɛngile kɛ awie ɛnwu Selɛ ne ɔdaye ɔ nye zo, kyesɛ medame me ngomekye.

47 "Mese bɛ nɔhalɛ nu kɛ, awie biala mɔɔ die me di la ɛnyia ngoane mɔɔ ɔnlɛ awieleɛ dɛbadɛba! 48-51 Ɛhɛe, mame a le Ngoane Kpanwo ne a! Kpanwo ne mɔɔ vi anwuma rale, mɔɔ bɛ ze mɔ lile ye wɔ fiemgbole ne azo la ɛmmaa ngoane mɔɔ ɔnlɛ awieleɛ, yemɔti mɔɔ bɛlile la bɛ muala bɛwuwule. Na Kpanwo ne mɔɔ vi anwuma maanle ne anu la yemɔ a maa awie biala mɔɔ kɛli bie la ngoane mɔɔ ɔnlɛ awieleɛ a. Mame a le zɔhane Ngoane Kpanwo ne mɔɔ vi anwuma maanle nu rale na ɔde aze dahuu la. Awie biala mɔɔ ɔkɛli zɛhae Kpanwo ne la ɔbadɛnla ngoane nu dahuu; me nwonane ne a le zɛhae Kpanwo anzɛɛ aleɛ ne mɔɔ bakpɔne ewiade a."

52 Akee Dwuuma ne mɔ bɔle ɔ bo kɛ bɛsu ɛhye anwo kpolera. Bɛbizale kɛ, "Kɛ ɔkɛyɛ na nrenyia ɛhye ahola ava ɔ nwo nane amaa yɛali ɛ?"

53 Gyisɛse zile zo bieko kɛ, "Memaa bɛade bɛ nwo ɔ bo wienyi kɛ: Saa bɛanli Sonla Ra ne anwo nane ne na eza bɛanno ye mogya ne a, bɛnrɛhola bɛnrɛnyia ngoane ne mɔɔ ɔnlɛ awieleɛ la ɛlɛ. 54 Na awie biala mɔɔ ɔkɛli me nwonane ne na eza ɔkɛnlo me mogya ne la lɛ ngoane mɔɔ ɔnlɛ awieleɛ a, ɔti mebadwazo ye wɔ Ewudwazo Kenle ne anu. 55 Ɔluakɛ me nwonane ne le nɔhalɛ aleɛ kpalɛ ne bɔkɔɔ, yɛɛ me mogya ne noko a le nzule kpalɛ ne a. 56 Awie biala mɔɔ ɔdi me nwonane ne na eza ɔno me mogya ne la, ɔde me nu, yɛɛ medame noko mede ye nu. 57 Tease Nyamenle ne mɔɔ zoanle me la tumi nu a mede a: zɔhane noko ala yɛɛ ɔlua me tumi nu awie biala mɔɔ kɛli me nwonane ne bie la badɛnla ngoane nu a! 58 Mame a le Ngoane Kpanwo nɔhalɛ ne mɔɔ vi anwuma maanle nu rale la; na awie biala mɔɔ ɔkɛli zɛhae Kpanwo ne bie la ɔbadɛnla ngoane nu kɔkpula melɛ mɔɔ ɔnlɛ awieleɛ, na ɔnrɛwu kɛmɔ bɛ ze mɔ lile bɛ anwuma kpanwo ɛdeɛ ne na bɛwule la." 59 Ɔhanle edwɛkpa ɛhye wɔ Kapɛnayɛm ayia sua ne anu.

60 Ye ɛdoavolɛma ne dɔɔnwo bɔbɔ ande ɔ bo, ɔti bɛzele kɛ, "Edwɛkɛ ɛhye yɛ se somaa kɛ yɛkɛde ɔ bo. Nwane bɔbɔ a kɛde ɛhye abo a?"

61 Gyisɛse nwunle kɛ mɔɔ ɔhanle la kye ye ɛdoavolɛma ne mɔ adwenle; ɔti ɔbizale bɛ kɛ, "Bɛnde ɛhye abo ɔ? 62 Ɛnee akee saa bɛnwu kɛ Mame Sonla Ra ne melɛsia meahɔ anwuma maanle ne anu bieko a yemɔ duzu a bɛkɛdwenle a? 63 Sunsum Nwuanzanwuanza ne angomekye ala a maa ngoane mɔɔ ɔnlɛ awieleɛ a. Nwonane yemɔ ɔle debie gyɛne; yemɔti bɛdabɛ mɔɔ bɛtɛwole bɛ fofolɛ wɔ Sunsum nu la asa ɛnrɛha ahyɛlɛdeɛ ɛhye ɛlɛ. Na kɛkala mɔ, mehile bɛ adenle mɔɔ saa bɛfa zo a bɛbanyia ngoane ɛhye mɔɔ ɔnlɛ awieleɛ ɛlɛ la. 64 Noko bie mɔ wɔ bɛ nu mɔɔ bɛnlie ɛhye bɛnli a." Ɔluakɛ mɔlebɛbo ne ala ɛnee Gyisɛse ze mɔɔ ɛnlie ɛnli nee mɔɔ baye ye amaa la amuala.

65 Akee ɔzile bɛ zo bieko kɛ, "Ɛhye ati a menganle mengilele bɛ kɛ, awie biala ɛnrɛhola ɛnrɛdoa me kyesɛ Selɛ ne twe ye maa me la."

66 Ɛhye maanle ye ɛdoavolɛma ne mɔ dɔɔnwo kpole kɛ bɛkɛli ɔ nzi bieko.

67 Gyisɛse bizale Bulu Nee Nwiɔ ne kɛ, "Anzɛɛ bɛdabɛ noko bɛkulo kɛ bɛgyakyi me bo zo ɛdoalɛ ɔ?"

68 Saemɔn Pita buale kɛ, "Awulae, nwane anwo a yɛbahɔ a? Ɛ ngomekye ala a ɛlɛ edwɛkɛ ne mɔɔ maa ngoane mɔɔ ɔnlɛ awieleɛ la a, 69 yɛɛ yɛdie yɛdi, na eza yɛze noko kɛ amgba Wɔmɔ a ɛle Nana Nyamenle Ara Nwuanzanwuanza ne a."

70 Gyisɛse buale bɛ kɛ, "Menyele bɛ bulu nee nwiɔ, noko ko wɔ bɛ nu mɔɔ ɔle abɔnsam a." 71 Ɛnee Dwudase Yesekaleɔto mɔɔ le Saemɔn Yesekaleɔto ara la a ɔlɛdi ye edwɛkɛ a. Ɔluakɛ ɛnee ɔboka Bulu Nee Nwiɔ ne anwo, na yemɔ noko yɛɛ ɔbaye ye yeamaa a.