1 Esioño idem mbufo ndien, ekpọñ kpukpru mme ndiọi ñkpọ, ekusu aba nsu, mme ndibuk mbubik, mme ndifube ufup, mme nditiñ mme ikọ isuñi. 2 Etie nte nditọ emi emanade obufa, emi ekopde nsatitọñ ebaña ata mmọñeba Spirit, man otodo ke ediñwọñ enye, mbufo ekeme ndikọri ñnyuñ ñnyene edinyaña. 3 Kpa nte ikọ Abasi ọdọhọde, "Mbufo emetabi mfọnido Abasi." 4 Edi etiene Abasi emi edide odu uwem itiat emi mme owo esinde, nte ñkpọ emi miwọrọke ñkpọ, edi emi Abasi emekde nte nsọñurua ñkpọ,

5 edi nte mme odu uwem itiat, ndien eyak eda idem mbufo ebọp edisana ebiet Edisana Spirit, ebiet emi mbufo edinamde ñkpọ nte mme ndisana oku, ke ediwa uwa Spirit emi Abasi edibọde ito ke Jisọs Kraist. 6 Koro ikọ Abasi ọdọhọ ete, "Ami menim nsọñurua itiat, emi Ami nimde nte itiat inuk ke Sayọn, ndien owo ekededi emi edinimde Enye ke akpanikọ, ñkpọ ndomokiet idikpuhu enye."

7 Itiat emi edi nsọñurua itiat ọnọ mbufo emi enimde ke akpanikọ, edi kabaña mme mmọ emi minimke ke akpanikọ; "Kpa itiat oro mme ọbọp ufọk ekesinde, ama akabade edi itiat inuk ufọk." 8 Ndien itie ikọ Abasi efen ọdọhọ ete, "Emi edi itiat emi edinamde mme owo etuak ukot, itiat emi edinamde mmọ eduọñọ," mmọ eduọñọ koro mmọ ikenimke ikọ Abasi ke akpanikọ, emi ekedi uduak Abasi ọnọ mmọ.

9 Edi mbufo edi idut emi Abasi emekde, mme oku edidem, edisana idut, mme mmọ emi enyenede Abasi, emi emekde ndisuan etop mbaña mme utibe edinam Abasi, emi okokotde mbufo osio ke ekim esin ke utibe uñwana Esie. 10 Enyene ini emi mbufo mikedighe ikọt Abasi, edi idahaemi mbufo edi ikọt Esie; ama enyene ini emi mbufo mikediọñọke mbọm Abasi, edi ke emi mbufo emebọ mbọm Esie.

11 Ami mekpe mbufo ubọk, mme ufan mi, nte mme isenowo ye mme ododuñ ke ererimbot emi, ekuyak idiọk udọñ obukidem emi añwanade ekọñ ye ukpọñ mbufo akan mbufo ubọk.

12 Ido uwem mbufo ke otu mme mmọ emi minimke Abasi ke akpanikọ akpana ọfọn eti eti, man kadaña emi mmọ etiñde mme nsu nsu ikọ edian mbufo nte mbufo edi mme anam idiọkñkpọ, mmọ ekpewọñọrede enyin mmọ ekut mme nti ido mbufo, ndien etoro Abasi ke usen oro Enye edidide. 13 Esuk idem mbufo ke ntak Abasi enọ mme odudu emi ekarade, ada ukara emi edide andida, ke ibuot ukara, 14 ye mme mmọ emi enye enimde ndiñwam enye ke ukara, emi enye ọdọñde ndimia mmọ emi eduede ufen, ñnyuñ ntoro mme mmọ emi enamde se ifọnde.

15 Koro emi edi uduak Abasi, Enye oyom mbufo enam mme etiñ ndisime ikọ ekibi inua oto ke mme nti ñkpọ emi mbufo enamde. 16 Eduñọ nte nditọ isọñ, edi ekuda itie nditọisọñ mbufo efuk idiọkñkpọ, edi edu uwem nte ifin Abasi.

17 Ekpono kpukpru owo, ema nditọ eka mbufo ke Ọbọñ, ebak Abasi; enyuñ ekpono mbọñ.

18 Mbufo mme isuñutom enyene ndisuk idem nnọ mme eteufọk mbufo, enyuñ ewut mmọ ọyọhọ ukpono, idighe mme mmọ oro efọnde ido ikpọñ ikpọñ edi kpa ye mme mmọ oro esọñde ido. 19 Abasi eyediọñ mbufo ke edinam emi, edieke mbufo eyọde ubiak ukut emi mbufo mikpedotke ndibọ, oto ke oro mbufo etimde ediọñọ uduak Esie. 20 Nso itoro odu edieke afo ọbọde ufen emi afo odotde ndibọ ke ntak emi afo eduede ndudue? Edi edieke afo ọyọde ufen kadaña emi afo anamde se ifọnde, Abasi eyediọñ fi ke ntak oro.

21 Ekedi ke ntak emi ke Abasi okokot mbufo, koro Kraist ke idem Esie ama okut ukut ọnọ mbufo, onyuñ ọkpọñ uwutñkpọ ọnọ mbufo, man otodo mbufo esaña ke nde ikpat Esie. 22 Enye ikanamke baba idiọkñkpọ kiet, owo baba kiet akanam ikopke nte nsu ọwọrọde Enye ke inua. 23 Ke ini emi ekesuñide Enye, Enye ikọbọrọke usiene ye isuñi; ke ini Enye okokutde ukut, Enye ikesinke owo ndik ke idem, edi akayak idorenyin Esie esin ke Abasi, ekpe edinen ikpe. 24 Kraist ke idem Esie okobiom mme idiọkñkpọ ñnyin ke ikpọkidem Esie ke krọs man otodo ñnyin ikpa inọ idiọkñkpọ ndien idu uwem inọ edinen ido. Oto ke mme inia Esie ema ekọk ñnyin. 25 Mbufo ekebiet mme erọñ emi ema ekesop usuñ, edi idahaemi ema etọñọ ntak eda mbufo efiak esọk Ekpeme erọñ ye andikpeme ukpọñ mbufo.