1 Ke ukem ukem usuñ emi mbufo iban enyene ndisuk idem nnọ mme ebe mbufo, man edieke ubak mmọ minimke ikọ Abasi ke akpanikọ, eyenam mmọ enim ke akpanikọ oto ke uwem mbufo. Ntak ididuhọ mbufo nditiñ baba ikọ kiet, 2 koro mmọ eyekut nte ido uwem mbufo asanade onyuñ enyenede uteñe.

3 Mbufo ekuda mme enyọñ enyọñ ñkpọ mbanaidem eñwana ndinam idem mbufo eye, nte usuñ emi mbufo enamde idet mbufo, ye mme nsọñurua itiat mbanaidem emi mbufo ekọñọde, enyuñ esinede, kpa ye ọfọñ idem emi mbufo esinede. 4 Utu ke oro, uyai mbufo enyene ndito ata esit idem mbufo, akani uyai emi asañade ye nsuhọde idem ye ifure ifure spirit, emi enyenede akamba udori ke iso Abasi. 5 Koro iban emi ekesinde ifik ke utom Abasi ke eyo oko, emi ekenyenede idorenyin ke Abasi, ekesinam idem mmọ eye ke utọ usuñ emi, ke ndisuk idem mmọ nnọ mme ebe mmọ.

6 Sera eketie ntre, enye ama osuk ibuot ọnọ Ebraham tutu enye okokot enye "Ete ufọk mi." Mbufo emi edi nditọ esie iban idahaemi, edieke mbufo enamde se ifọnde, ke ntre mbufo idinyeneke baba ndik ndomokiet.

7 Mbufo ñko mme ebe, ke edidu ọtọ kiet ye mme iban mbufo, mbufo enyene ndifiọk ete ke mmọ edi mme mmemmem ñkpọ. Ke ntre ana enam ñkpọ ye mmọ esin ukpono, koro mmọ ñko eyebọ kpa nte mbufo ebọde, enọ uwem emi otode Abasi. Enam emi man ñkpọ baba kiet edibiọñọ akam mbufo.

8 Ke edida ñkesim utit, kpukpru mbufo ekpenyene ndinyene ekikere kiet ye udọñ kiet, ema kiet eken nte nditọ ete, enyuñ efọn ido ye kiet eken ye nsuhọde idem. 9 Ekusio owo usiene idiọkñkpọ, mme usiene isuñi ke isuñi; utu ke oro, esio usiene ke edidọdiọñ, koro edidiọñ edi se Abasi ọkọñwọñọde ndinọ mbufo ke ini emi enye okokotde mbufo.

10 Kpa nte ikọ Abasi etiñde, "Owo ekededi emi oyomde ndidu uwem inemesit, onyuñ ekerede ndikut nti ñkpọ, enyene ndifara edeme esie ke nditiñ oburobut ikọ inua, onyuñ etre ndisu nsu. 11 Enye enyene ndiwọñọde ñkpọñ idiọk, ndien nnam eti ñkpọ; enye enyene ndiyom emem ñnyuñ mbine enye. 12 Koro Abasi owukde enyin Esie ese mme ndinen owo, onyuñ akpañ utọñ ọnọ akam mmọ kpukpru ini, edi Enye akpaedem ọnọ mmọ emi enamde idiọk".

13 Anie ekeme ndibiomo mbufo ndo edieke mbufo esinde ifik ndinam se ifọnde? 14 Edi edieke mbufo ekutde ukut ke edinam se ifọnde, ana mbufo edara! Ekufehe owo enyin, ekunyuñ efina idem mbufo. 15 Edi eteñe Kraist ke esit mbufo enyuñ enam Enye Ọbọñ mbufo. Edu ke mbeñeidem kpukpru ini ndibọrọ owo kiet ekededi emi obupde mbufo etiñ ntak emi mbufo enyenede idorenyin.

16 Edi enam emi ke nsuhọde idem ye ukpono. Enam esit mbufo asana man otodo kadaña emi etiñde idiọk ikọ edian mbufo kabaña nti ido mbufo nte mme anditiene Kraist mmọ ekpekop but ebaña se mmọ etiñde. 17 "Koro ọfọn ndikut ukut ke ntak edinam eti ñkpọ, edieke emi edide uduak Abasi, akan ndinam idiọk."

18 Koro Kraist ke idem Esie akakpa ọnọ mbufo; Enye akakpa inikiet ofuri ofuri kabaña mme idiọkñkpọ, eti owo akada itie idiọk owo, man Enye ada mbufo ọsọk Abasi. Ema ewot Enye ke ikpọkidem, edi enam Enye odu uwem ke Spirit. 19 Ndien ke idak edidu uwem Esie ke Spirit Enye ama aka ọkọkwọrọ ikọ ọnọ mme spirit emi ekesinde ke ñkpọkọbi. 20 Emi ekedi mme spirit mmọ emi mikesukke ibuot inọ Abasi, ke ini emi Enye ekebetde ke ime ke mme usen emi Nua ọkọkọñde ubom ubọhọ Owo ifañ emi ekedude ke ubom ubọhọ, kpukpru ekedi owo itiaita, ema enyaña mmọ eto ke mmọñ; 21 emi ekedide mbiet ñkpọ emi akanyande ubọk owut edina babtisim emi anyañade mbufo idahaemi. Idighe ediyet mbat idem edi eñwọñọ emi enamde enọ Abasi oto ke edisana esit. Enye añyaña mbufo oto ke ediset ke ñkpa Jisọs Kraist, 22 Enye ama ọkọdọk enyọñ ndien etie ke Ubọk nnasia Abasi, ndikara kpukpru mme enjel ye mme odudu ukara ke enyọñ ye mme odudu.