1 Ke akpatre, ñnyin ikekemeke, ndiyọ aba. Ke ntre ñnyin ima ibiere ndika iso nditie ikpọñ ke Atens. 2 Kadaña emi ñnyin ikọdọñde Timoti, eyen ete ñnyin emi anamde utom ye ñnyin ọnọ Abasi ke edikwọrọ Eti Mbuk emi abañade Kraist, ñnyin ikọdọñ enye ndisọñọ mbufo idem, onyuñ anam mbuọtidem mbufo ọsọñada, 3 man owo mbufo ndomo-kiet edifiak edem ke ntak mme ukọbọ emi. Mbufo ke idem mbufo emefiọk ete ke utọ ukọbọ emi edi ubak ke otu uduak Abasi ọnọ ñnyin. 4 Ke adaña emi ñnyin ikosuk idude ye mbufo, ñnyin ima ibabak itiñ inọ mbufo ite ke eyekọbọ ñnyin nte mbufo etimde efiọk, oro edi ukem ukem se iketibede emi.

5 Ntak edi oro ami ñkenyenede ndidọñ Timoti. Ñkekemeke ndiyọ aba, do ami mma ndọñ enye edifiọk ñkpọ abaña mbuọtidem mbufo. Ndik ama anam mi ñnyuñ ñkere nte ke usuñ kiet mme eken, Setan edidomo mbufo, ndien kpukpru ñwaidem ñnyin ewọrọ ikpuikpu. 6 Ke emi Timoti ama okoto ñkañ mbufo afiak ebine ñnyin, enye ama ada eti mbuk emi abañade mbuọtidem ye ima mbufo ọsọk ñnyin. Enye etiñ ọnọ ñnyin nte mbufo ekerede nti ekikere ebaña ñnyin kpukpru ini, ñko ke mbufo emeyom ndikut ñnyin kpa nte ñnyin iyomde ndikut mbufo. 7 Ke ntem, ke kpukpru ukut ye mfina ñnyin, ñnyin imokop idọñesit kabaña mbufo, nditọ ete. Ekedi mbuọtidem mbufo ọkọnọ ñnyin isọñesit, 8 koro, idahaemi ñnyin imeneñede idu uwem, edieke mbufo esọñọde eda ke uwem mbufo ke Ọbọñ Jisọs.

9 Idahaemi ñnyin imekeme ndinọ Abasi ekọm mbaña mbufo. Ñnyin imọkọm Enye kabaña idara emi ñnyin inyenede ke iso Abasi ñnyin ke ntak mbufo. 10 Ke okoneyo ye uwemeyo, ñnyin ibeñe Enye ke ofuri esit ñnyin ite Enye ayak ñnyin ikut mbufo iso ye iso man inọ mbufo se mbufo enanade ke mbuọtidem mbufo. 11 Yak Abasi ñnyin ye Ete ke idem Esie, ye Ọbọñ ñnyin Jisọs, eberede usuñ ọnọ ñnyin ndidi mbine mbufo. 12 Yak Abasi anam ima mbufo ye kiet eken, ye kpukpru owo nde, akaka iso ndikọri tutu okpon ekesim akamba idaha emi ima ñnyin inyenede inọ mbufo adade. 13 Ke usuñ emi Enye eyenam esit mbufo ọsọñ ndien mbufo eyefọn ema enyuñ esana ke iso Abasi ye Ete ñnyin ke ini Ọbọñ ñnyin Jisọs edidide ye kpukpru mme mmọ emi enyenede Enye.