1 Ntak iduhọ ndiwet mbufo nditọ ete mbaña ini ye ifet emi mme ñkpọ emi editibede. 2 Koro mbufo emefiọk ke idem mbufo nte ke usen Ọbọñ edidi nte inọ ke okoneyo. 3 Ke ini emi kpukpru owo edọhọde ete, "Kpukpru ñkpọ edobo, ifure onyuñ odu," ke unana idorenyin, nsobo eyesim mmọ! Mmọ idibọhọke, editie nte ubiak emi esimde ñwan emi oyomde ndiman eyen.

4 Edi mbufo nditọ Ete, iduhọ ke ekim, ndien usen oro inyeneke ndibabuat mbufo nte inọ. 5 Kpukpru mbufo edi mme mmọ emi edude ke uñwana enyuñ edude ke uyama usen. Ñnyin idighe mbio okoneyo mme mbio ekim. 6 Ke ntre, ikpanaha ñnyin ide idap nte mme mmọ eken, ñnyin inyene ndikpeme eyo ñnyuñ ndu ke mbeñeidem. 7 Edi ke okoneyo ke mme owo ede idap, edi ke okoneyo ke mme owo ekpa mmin. 8 Edi ñnyin idi mbon uñwaña usen, ndien inyene ndikpeme idem. Ñnyin inyene ndisine mbuọtidem ye ima nte mbọbọ ukwak ekọñ emi ebọpde ke ikpanesit, ndien idorenyin ubọhọ ñnyin nte itam ibuot.

9 Abasi ikemekke ñnyin ndibọ ukut iyaresit Esie, edi ndibọ edinyaña ñnyene emi otode ke Ọbọñ ñnyin Jisọs Kraist, 10 emi akakpade ọnọ ñnyin man otodo ñnyin idu uwem ọtọ kiet ye Enye, mme ñnyin idu ke uwem mme ikpakpa ke ini emi Enye edidide. 11 Ke ntak emi, edọñ kiet eken esit, enyuñ eñwam kiet eken, kpa nte mbufo ekade iso ndinam emi.

12 Ñnyin imekpe mbufo ubọk nditọ ete, nditiñ enyin nse mme mmọ emi enamde ọkpọsọñ utom ke otu mbufo, mme mmọ emi Ọbọñ ama ekemek ndida mbufo usuñ ñnyuñ ñkpep mbufo ñkpọ. 13 Enam ñkpọ ye mmọ ye akamba ukpono ye ima, ke ntak utom emi mmọ enamde. Edu ke emem ke otu mbufo.

14 Ñnyin imekpe ye mbufo nditọ ete: eduri mme mbio ifu utọñ, edọñ mbon esit ndik esit, eñwam mbio mmemidem, enyene ime ye kpukpru owo. 15 Ekut ete baba owo kiet isioho usiene idiọk ke idiọk, edi ke kpukpru ini yak edi uduak mbufo ndinam eti ñkpọ ye kiet eken, ye kpukpru owo nde. 16 Edara kpukpru ini. 17 Ebọñ akam kpukpru ini. 18 Enyene esit ekọm ke kpukpru ifet; emi edi se idide uduak Abasi ọnọ uwem mbufo ke Kraist Jisọs.

19 Ekubiọñọ Edisana Spirit. 20 Ekusin edisiak uduak Abasi ke ndek. 21 Edomo kpukpru ñkpọ ese: emum se ifọnde ekama. 22 Efara idem ke kpukpru oruk idiọkñkpọ. 23 Yak Abasi emi ọnọde ñnyin emem anam mbufo esana ke kpukpru usuñ, onyuñ ekpeme ofuri idem, Spirit ukpọñ ye obukidem mbufo ke kpukpru ndudue ke ini edidi Ọbọñ ñnyin Jisọs Kraist. 24 Enye emi okokotde mbufo eyenam, koro Enye edide anam akpanikọ. 25 Ebọñ akam ñko ebaña ñnyin nditọ ete. 26 Ekọm kpukpru nditọ ete ye ntim inua nditọ ete. 27 Ami mekpe mbufo ubọk ke odudu ukara Ọbọñ ndikot ñwed emi nnọ kpukpru mme nditọ ete. 28 Yak mfọn Ọbọñ ñnyin Jisọs Kraist odu ye mbufo.