1 Ñwed emi oto Jud, isuñutom Jisọs Kraist, emi onyuñ edide eyen eka Jems. Ñwet nnọ mme mmọ oro Abasi okokotde, emi eduñọde ke ima Abasi Ete ye ke ukpeme Jisọs Kraist. 2 Yak mbọm, emem, ye ima edi eke mbufo ke ọyọhọ udomo.

3 Mme ndima ufan mi! Ami mma ndomo ndiwet ñwed nnọ mbufo kabaña edinyaña emi ñnyin ibuanade, ke ini ñkenyenede udọñ ndiwet mbufo. Idahaemi ami ñwet ndisọñọ mbufo idem, nte yak mbufo ekaka iso ndiñwana eñwan mbuọtidem emi Abasi ọkọnọde ikọt Esie ofuri ofuri ini kiet. 4 Koro mme mmọ emi mibakke Abasi efiọnọrede eduk ke otu ñnyin, emi etimerede etop emi otukde mfọn Abasi ñnyin, man eda efuk uwem use mmọ, enyuñ ekañ Jisọs Kraist Ete ufọk ye Ọbọñ ñnyin. Ke ata anyan ini ikọ Abasi ama etetiñ abaña ubiomikpe emi mmọ ema ekebọbọ.

5 Okposuk edi nte mbufo ema ekefọfiọk kpukpru ñkpọ emi, ami ñyom nditi mbufo nte ọbọñ akanyañade nditọ Isrel osio ke isọñ Ijipt, ndien ke akpatre Enye ama osobo mme mmọ oro mikenimke ke akpanikọ. 6 Ti baña mme enjel emi mikọduhọ uwem itre ke adaña ukara mmọ, edi ewọñọ ekpọñ ebiet iduñ mmọ: ebọp mmọ ke nsinsi ñkpọkọbi ke ñkimñkim ebiet ke idak isọñ, ke ebiet emi Abasi enimde mmọ ebet akwa usen emi edibierede ikpe mmọ. 7 Ti Sọdọm ye Komora, ye mme obio emi ekedianade mmọ, emi mme andiduñọ ke esit ekenamde nte mme enjel oro ekenamde, ndien ema enam mbubiam ido use, ye mme nsio nsio oburobut uwem eken, edian ye irenowo ndikop idiọk udọñ ye eke mmọ iren nte iban. Ema eda ikañ esobo mme ikpọ obio emi, ndien emi akaiso ndidi nduriutọñ ọnọ ñnyin nte ke nsinsi ikañ odu, ebiet emi edimiade mme anam idiọkñkpọ ufen.

8 Ke ukem ukem usuñ emi ñko, mme mmọ emi ekut ñkukut emi anamde mmọ enam idiọkñkpọ ye ikpọkidem mmọ, mmọ efumi ukara Abasi enyuñ emiom mme odudu emi edude ke enyọñ emi enyenede uteñe. 9 Idem akamba enjel Maikel ikanamke uduot ñkpọ eke etiede ntem. Ke utọk esie ye Setan, ke ini emi mmọ ekenenide ebaña owo emi enyenede ndida okpo Moses, Maikel ikesuñike Setan, edi ọkọdọhọ ete, "Ọbọñ asua ọnọ fi!" 10 Edi mme mmọ emi esuñi se mmọ midiọñọke, ndien mme ñkpọ oro mmọ ediọñọde eto ntuk nte mme unam ikọt, edi mme ñkpọ emi osobode mmọ.

11 Enyene ndik eti eti ye mmọ! mmọ enyene usuñ mmọ. Mmọ emetiene usuñ emi Ken eketienede. Ke ntak okuk mmọ emeyak idem mmọ enọ ndudue emi Balam akanamde. Mmọ esọñ ibuot nte Kora ọkọsọñde ibuot, ndien nte ekedide ye enye esobo mmọ.

12 Mmọ etie nte mme ndedehe itie ke ebuana udia mbufo, ke edidia udia ye mbufo ke unana iso obut. Mmọ ekere ebaña idem mmọ ikpọñ ikpọñ. Mmọ ebiet obubit enyọñ emi oyobio ọkpọride edi idepke edim. Mmọ ebiet mme eto emi misioñoke mfri kpa ke idem ini mfri; mme eto emi ema ekewuberede esio ke oruñ ndien ekpaña.

13 Mmọ ebiet mme awawa akpainyañ emi esiode mme edinam mmọ emi enyenede but ewut nte efot mmọñ. Mmọ ebiet mme mfum mfum ntantaọfiọñ, emi Abasi ama ekenim itie ke ntọtuñọ itie ekim ọnọ ke nsinsi.

14 Ekedi Enọk, ọyọhọ emana itiaba ọtọñọde ke Adam, ke ata anyan ini emi ekebede, eketiñ ikọ emi enim abaña mmọ: "Sese, Ọbọñ eyedi ye ediwak tọsin ndisana enjel Esie, 15 ndikpe ikpe kpukpru owo, ndibiom kpukpru mme anam idiọk emi mibakke Abasi ikpe kabaña kpukpru mme ndiọi ñkpọ emi mmọ ekenamde ke unana edibak Abasi, ye ke ntak kpukpru mme oburobut ikọ emi mme mmọ emi mibakke Abasi eketiñde ebaña Abasi." 16 Mme mmọ emi ekaiso ndikokuni kpukpru ini enyuñ esua ikọ enọ mme mmọ efen, mmọ etiene mme ndiọi udọñ mmọ; mmọ ekpọi inua ebaña idem mmọ, ndien ebiaña mme mmọ eken man mmọ enyene usuñ mmọ.

17 Edi eti mme ufan mi! Eti se eketiñde enọ mbufo ke mme ini emi ekebede ke inua mme Ọbọsuru Ọbọñ ñnyin Jisọs Kraist. 18 Mmọ ekedọhọ mbufo ete, "Ke ini mme akpatre usen ema edi, mme owo eyewọñọ ewut idem enyuñ eda mbufo enam mbubru, mme owo emi etienede idiọk udọñ mmọ ke unana mbak Abasi." 19 Mmọ emi edi mme mmọ emi etọde ubahade, emi udọñitọñ obukidem mmọ akarade mmọ, mmọ emi minyeneke Spirit Abasi.

20 Edi ama edi mbufo, mme ufan mi, ekaiso ndibọp idem mbufo ke mbuọtidem emi asanade ama. Ebọñ akam ke odudu Edisana Spirit, 21 ndien enim idem mbufo ke ima Ọbọñ, adaña nte mbufo ebetde Ọbọñ ñnyin Jisọs Kraist ke mbọm Esie ndinọ mbufo nsinsi uwem. 22 Wut mmọ emi enyenede eyighe mbọm, 23 nyaña mmọ ke edidabade mmọ nsioño ke ikañ. Ewut mbọm emi abuahade ye ndik kabaña mme mmọ efen ukem ukem, edi esua kpa ọfọñidem mmọ emi idiọkñkpọ use ama akabiat.

24 Ubọñ enyene Enyemi ekemede ndikpeme mbufo ekuduọ, ndien nda mbufo ke unana ndo ye idara ñwọrọ ke utibe iso Esie, 25 Yak Enye Abasi Andinyaña ñnyin ke Jisọs Kraist Ọbọñ ñnyin ọbọ ubọñ, edikoñ, odudu ye ukara, ọtọñọde ke mme eyo emi ekebede, ye ke emi, ye ke nsinsi nsinsi. Amen.