1 Emi edi ediyarade Jisọs Kraist emi Abasi ọkọnọde Enye ndiwut mme isuñutom Esie kabaña se iditibede ke esisit ini. Enye akanam ediyarade emi oto ke edidọn enjel Esie ebine owo Esie Jọn. 2 Jọn ama ewet kpukpru mme ikọ emi enye okokopde oto Abasi ye Jisọs Kraist, ye kpukpru mme ñkpọ emi enye okokopde, okonyuñ okutde.

3 Edieke afo okotde ñkukut emi nte mme owo ekopde ọfọn ke ufọk Abasi, afo eyebọ asaña asaña edidiọñ oto Abasi. Mme mmọ emi ekpañde utọñ enọ ini emi ekotde ñkukut emi enyuñ enam se ñkukut emi etemede eyenyuñ ediọñ mmọ. Koro ini ekpere emi mme ñkpọ emi ediwọrọde isu.

4 Jọn ọnọ ñwed emi esọk mme ufọk Abasi itiaba emi edude ke idut emi ekotde Esia. Mme ndima ufan, mbufo ekpekam ebọ mfọn ye emem emi otode Abasi emi odude, emi okonyuñ odude, emi edidide! ndien onyuñ otode mme spirit itiaba emi edude ke iso Ebekpo Esie, 5 onyuñ oto Jisọs Kraist emi ayararede akpanikọ emi ke mbuọtidem ọnọ ñnyin. Enye ekedi akpa owo emi ekesetde ke ñkpa, idinyuñ itọñọke ntak ikpa aba. Enye okoñ akan kpukpru mme mbọñ ke ofuri iso isọñ. Itoro enyene Enye emi amade ñnyin kpukpru ini, onyuñ anam ñnyin iwọrọ ufin idiọkñkpọ ke ndiduọk iyip uwem Esie nnọ ñnyin. 6 Enye ama atañ ñnyin obok ke idak ukara Esie onyuñ anam ñnyin idi mme oku Abasi Ete Esie; nọ Enye nsinsi ubọñ Enye ada ukara ke nsinsi Amen.

7 Sese, Enye ke ededi, obubit enyọñ onyuñ akan Enye okuk, ndien kpukpru enyin eyekut Enye, kpa ye mme mmọ oro ekekimde enye ke ñkañ. Ndien mme idut eyetuaña ke mfuhọ ye ke ọkpọsọñ ndik ke Enye ama edi. Emi edi akpanikọ. Amen.

8 Abasi Ete andikoñ ñkan, "Emi odude, emi okodudedu, emi edidude," ọdọhọ ete, "Ami ndi ntọñọ ye utit kpukpru ñkpọ."

9 Edi ami, Jọn, eyen eka mbufo, enye emi mbuanade ukut ye mbufo ke ntak Ọbọñ, ñwet ñwed emi nnọ esọk mbufo. Ami, ñko, mmabuana ke ime emi Jisọs ọnọde, ndien ñnyin iyebuana Obio Ubọñ Esie.

Ami ñkodu ke obio ufọt mmọñ emi ekotde Patmọs, ebiet emi ekebinde mi ke odudu esio ke obio ekenim ke ntak edikwọrọ ikọ Abasi, ye ke ntak emi ami ñketiñde se ami ñkọdiọñọde mbaña Jisọs Kraist.

10 Ekedi ke usen emi enyenede Ọbọñ, ami ñkodude ke Spirit, ndien ami mma ñkop akamba uyo ke edem mi, uyo emi ekebietde uyo obukpoñ 11 ọdọhọde ete: "Wet kpukpru se afo okutde nim, ñnyuñ nọ ñwed emi esọk mme ufọk Abasi itiaba emi ke obio Efisọs, ye enye emi odude ke obio Simina ye mme mmọ emi edude ke obio Pekamum, Tiatira, Sadis, Filadelfia ye Laodisia".

12 Ke ini ami ñkọwọñọrede ndikut anditiñ ikọ, ami mma ñkut mme eto uwuk tiande (Kandle) eke gold itiaba. 13 Enye emi akadade ke ufọt mme eto uwuk tiande emi ekebiet Jisọs, ndien enye esine anyan ewura emi ekesimde isọñ ikpat esie, ndien ọbọbọ mbọbọ gold ke ikpanesit esie. 14 Idet ye ibuot esie akasana nte mfri ukim, nte snow, ndien enyin esie asak nte edeme ikañ. 15 Mme ikpat esie ekesem nte okpoho okuk emi etarade ke ikañ ndien etuk, ndien uyo esie oyomo nte awawa ke mben inyañ. 16 Enye akakama mme ntantaọfiọñ itiaba ke ubọk nnasia esie ye akañkañ enyene iso iba emi ọsọpde eti eti ke inua esie, ndien iso esie akayama nte ọkpọsọñ eyo ufọt uwemeyo emi obubit enyọñ mifukke.

17 Ndien kadaña emi ami ñkutde enye, ami mma nduọ ke isọñ ke ukot esie nte owo emi akpade. Enye ama odori mi ubọk nnasia esie ke idem onyuñ ọdọhọ ete, "Kufehe ndik. Ami ndi Akpa ye Akpatre. 18 Ami ndi Enyemi odude uwem. Ami mma ñkpa, edi se, Ami mafiak ndu uwem ke nsinsi nsinsi. Ami ñkama ukpọhọde ñkpa ye obio ekpo." 19 "Wet kpukpru se afo okutde idaha emi nim, ye se ediyararede inọ fi ke esisit ini. 20 Emi edi se mme ntantaọfiọñ itiaba emi afo okokutde ke ubọk nnasia mi edade enọ, ye mme eto uwuk tiande gold itiaba oro: mme ntantaọfiọñ itiaba oro edi mme enjel ufọk Abasi itiaba, ndien mme eto uwuk tiande gold itiaba oro edi mme ufọk Abasi itiaba oro ke idem mmọ."