1 Ke emi ama ekebe ami mma ñkop se iketiede nte ọkpọsọñ uyo akwa otu owo ke enyọñ, nte ọdọhọde ete,

"Toro Ọbọñ! Aleluya!

Edinyaña oto Abasi ñnyin.

Ubọñ ye odudu enyene Enye ikpọñ.

2 Ikpe Esie edi nnen nnen ye akpanikọ.

Enye ọnọ akwa añwan use

emi akasabarede ererimbot

ye use esie utib ikpe.

Abasi osio enye usiene iyip mme isuñutom Esie."

3 Mmọ ema etọñọ ntak efiori ete,

"Ubọñ enyene Abasi,

Nsuñikañ ntaikañ akwa obio emi akaka iso

ndidọk enyọñ ke nsinsi nsinsi."

4 Mme ada idaha edip ye inañ ye mme odu uwem ñkpọ inañ oro ema eduọñọ ke isọñ, enyuñ etuak ibuot enọ Abasi emi eketiede ke ebekpo, ndien ema edọhọ, ete,

"Amen! Ubọñ enyene Abasi!"

5 Do ke uyo okoto ke ebekpo ọwọrọ, onyuñ ọdọhọ, ete,

"Etoro Abasi ñnyin,

kpukpru mme isuñutom Esie,

ye kpukpru owo, ñkpri ye ikpọ,

emi ebakde Enye!"

6 Ami mma ñkop se ikebietke uyom akwa otu owo, emi ebietde mbufut mmọñ emi ọwọrọde oto ke enyọñ obot, ye nte uyo obuma emi asiahade. Ami mma ñkop mmọ edọhọde; ete,

"Nọ Abasi ubọñ!

Koro Ọbọñ Abasi ñnyin,

Enye emi okopde odudu akan etie ke ebekpo!

7 Eyak, ñnyin idara inyuñ inem idem ñnyin esit;

eyak ñnyin itoro ñkoñkoñ odudu Esie!

Koro ini ndọ Eyen Erọñ edikem,

ndien ñwan ndọ esie etim idem esie ebeñe.

8 Enọ enye edisana ñkisi

ndida mbana idem esie."

(Edisana ñkisi emi ada ọnọ mme edinen ido ikọt Abasi.)

9 Do ndien ke enjel oro ọkọdọhọ mi ete, "Wet ñkpọ emi. Ọfọfọn ọnọ mme mmọ emi ekotde edi usọrọ ndọ Eyen Erọñ." Ndien enjel oro amadian ete, "Emi edi mme ikọ Abasi emi edide ata akpanikọ."

10 Ami mma nduọ enye ke ukot ndituak ibuot nnọ enye. Edi enye ama ọdọhọ mi ete, "Kunam ntre! Ami ndi asañautom kiet ye afo, ye eke nditọ ete fo, kpukpru mme mmọ emi emumde akpanikọ emi Jisọs ayararede ekama. Tuak ibuot nọ Abasi." Koro akpanikọ emi Jisọs akayararede edi se ikadade mme Asiak Uduak Abasi usuñ.

11 Ami mma ñkut nte enyọñ ebererede, ye afia enañ mbakara do. Ekekot andiwat enye Anam Akpanikọ; edi unen ke enye ada ekpe ikpe onyuñ ada añwana mme ekọñ esie. 12 Enyin esie ekebiet edeme ikañ, ndien Enye ama ayara ediwak anyanya ke ibuot esie. Ema ewet enye enyiñ ke idem emi owo baba kiet midiọñọke ke mibọhọke Enye ikpọñ ikpọñ ọdiọñọ se ọwọrọde. 13 Iyip ama ofuk ọfọñ idem emi enye ekesinede. Enyiñ emi ekekotde enye ekedi Ikọ Abasi. 14 Mme udim ekọñ enyọñ ema etiene enye ke edem, enyuñ ewat ke mme mfia enañ mbakara, enyuñ esine edisana mfia ñkisi.

15 Edisọp akañkañ ama ọwọrọ enye ke inua, emi enye edidade ikan mme idut. "Enye ayakara mmọ ke ọkpọsọñ iyaresit ubọk." Ndien Enye edi andidighi ufikmmin ọkpọsọñ iyaresit Akwa Abasi. 16 Ke ewura ye ke ukot esie ema ewet enyiñ emi:

Edidem mme Ndidem ye Ọbọñ mme Mbọñ.

17 Do ndien ke ami ñkokut enjel kiet nte adade ke utin. Enye ama ofiori ke ọkpọsọñ uyo ọnọ kpukpru mme inuen emi efede ke ikpa enyọñ, ete, "Edi, ediboho ebiet kiet kabaña akwa usọrọ Abasi, 18 man edi edita mme obukidem mme mbọñ, mme ada iso ekọñ ye eke mme mbon ekọñ, obukidem mme enañ mbakara ye eke mme andiwat mmọ, obukidem kpukpru mme owo, ofin ye eyen, ñkpri ye ikpọ."

19 Ndien ami mma ñkut idiọk unam oro ye mme mbọñ ererimbot ye mme udim ekọñ mmọ ebokde idem ọtọ kiet ndiñwana ye Enye emi awatde ke enañ mbakara, ye udim ekọñ esie. 20 Ema emum idiọk unam oro nte owo ñkpọkọbi, ye asiak nsu nsu uduak emi akanamde mme utibe ñkpọ ke iso esie. (Enye akada mme utibe ñkpọ emi abiaña mme mmọ emi ekenyenede idiọñọ unam oro ye mme mmọ emi eketuakde ibuot enọ mbiet idiọk unam oro). Ema emum idiọk unam oro ye asiak nsu nsu uduak oro, mmọ mbiba, etop ye uwem esin ke ñkpọdiọhọ ikañ emi asakde ye itai.

21 Ema eda akañkañ emi ọkọwọrọde ke inua Enye emi eketiede ke enyọñ enañ mbakara ewot mme udim ekọñ mmọ, ndien kpukpru mme inuen ema eta mme obukidem emi mmọ ekekemede ndita.