1 Do ke ekenọ mi eto udomo ñkpọ, emi eketiede nte esañ, ndien edọhọ mi ete, "Daha ke enyọñ ñnyuñ domo edisana ebiet ye itie uwa esie, ñnyuñ bat mme mmọ emi etuakde ibuot ke esit. 2 Edi kusin etehe edisana ebiet ye ñkanñkuk esie. Kudomo enye, koro ema eyak enye enọ mme mmọ emi minimke Abasi ke akpanikọ emi edidighide Edisana obio emi ke ikpat ke ọfiọñ aba ye iba. 3 Ami ñyedọñ mme ntiense mi iba, emi esinede ntaha ekpat, ndien mmọ eyeyarade uduak Abasi ke usen tọsin kiet ye ikie iba ye ata."

4 Mme ntiense iba emi edi mme eto ọlif iba ye ñkpọ udori ikañ iba emi edade ke iso ọbọñ akara ererimbot. 5 Edieke owo ndomokiet añwanade ndinam mmọ se idiọkde, ikañ eyewọrọ mmọ ke inua osobo mme asua mmọ; ndien ke usuñ emi ke ediwot owo kiet ekededi emi ediñwanade ndinam mmọ idiọk ñkpọ. 6 Ema enọ mmọ odudu ndikọbi ikpaenyọñ mbak edim edidep ke ini emi mmọ ediyararede uduak Abasi. Mmọ enyene odudu ñko kabaña mme idim mmọñ, ndinam mmọ ekabade edi iyip; mmọ enyuñ enyene odudu ñko ndida ndiọi udọñọ mmia isọñ ufen ke kpukpru oruk ibat ini nte mmọ emama.

7 Ke ini mmọ ema ekekure mme ikọ ntiense mmọ, unam oro ọkọwọrọde ke akwa ukpe idak isọñ oro eyeñwana ye mmọ. Enye eyekan onyuñ, owot mmọ, 8 ndien mme okpo mmọ eyena ke efak akwa obio oro ekekọñde Ọbọñ mmọ ke krọs. Enyiñ emi adade ọnọ obio oro edi Sọdọm mme Iyip. 9 Mme owo emi etode kpukpru mme idut, oruk, ekpuk ye usem eyese okpo mmọ ke usen ita ye ubak, idinyuñ iyakke ebuk mmọ. 10 Mme andiduñ ererimbot eyenem esit ebaña ñkpa owo iba emi. Mmọ eyenam usọrọ enyuñ enọ kiet eken mme enọ, koro mme asiak uduak Abasi iba emi ema eda akamba ukut esọk mme andiduñọ ke isọñ.

11 Ke usen ita ye ubak ama ekebe, ibifik uwem emi okotode Abasi ama oduk mmọ ke idem ndien mmọ ema edaha ke enyọñ. Ọkpọsọñ ndik ama omum kpukpru mme mmọ emi ekekutde mmọ. 12 Ndien mme asiak uduak Abasi iba emi ema ekop ọkpọsọñ uyo emi otode enyọñ ọdọhọde mmọ ete, "Edọk edi mi!" Nte mme asua mmọ ewukde enyin ese, mmọ ema edọk ke enyọñ ke obubit enyọñ. 13 Kpa ke ndo ndo oro ata ọkpọsọñ unyek isọñ ama etibe; ndien ema esobo ubak kiet ke ubahade duop akwa obio oro. Ndien owo tọsin itiaba ema ekpaña ke unyek isọñ oro. Mme mmọ emi ekesuhọde ema ekop ndik eti eti enyuñ etoro akamba Abasi emi odude ke enyọñ. 14 Udiana ñkpọ ndik okure; edi sese, ñkpọ ndik ọyọhọ ita ọmọñ ededi.

15 Ndien ọyọhọ enjel itiaba ama ofuri obukpoñ esie, ndien mme ñkpọsọñ uyo ema eto ke enyọñ, emi ekedọhọde ete, "Odudu ndikara ererimbot enyene Ọbọñ ye Kraist Esie idahaemi, ndien Enye eyekara ke nsinsi nsinsi!"

16 Do ndien mme adaidaha edip ye inañ oro etiede ke mme ebekpo mmọ ke iso Abasi ema eduọñọ ekibi iso mmọ ke isọñ enyuñ etuak ibuot enọ Abasi,

17 edọhọ ete:

"Ñnyin imọnọ Fi ekọm Ọbọñ ye Abasi andikoñ ñkan,

emi odude, ye emi okodude, koro Afo amada akwa odudu Fo

onyuñ ọtọñọ ndikara ukara.

18 Mme idut emi mibakke Abasi ema eyọhọ ye iyaresit,

koro emi edi ini emi iyaresit Fo enyenede ndidi.

Ini ekem ndikpe ikpe mme akpaña ñkpa.

Ini edi emi ndinọ mme asañautom Fo utib mmọ,

ye ofuri ikọt Fo, kpukpru mme mmọ emi ebakde enyiñ Fo,

ñkpri ye ikpọ ukem ukem.

Emi edi ini ndisobo mme mmọ emi ebiatde ererimbot!"

19 Ema eberede Edisana Ebiet Abasi ke enyọñ, ndien ema ekut ekebe ediomi Esie ke Edisana Ebiet Esie. Ndien emireñ mireñ, ye nduari obuma, ye unyek isọñ, ye ọkpọsọñ edim itiat ema etọñọ.