1 Ke emi ama ekebe ami mma ñnyene ñkukut efen, ndien ami mma ñkut ana iñwañ enyinusuñ ke enyọñ. Ndien uyo emi ekebietde uyo obukpoñ, emi ami mma ñkekokop nte eketiñde ikọ ye ami, ama ọdọhọ ete, "Dọk di mi, ndien ami ñyewut fi se iditibede ke ini iso."

2 Ke ndo ndo oro Spirit ama ada ukara ke idem mi. Ebekpo ama odu do ke enyọñ emi owo kiet eketiede ke esit. 3 Iso esie emireñ nte nsọñurua itiat emi ekotde jaspa ye kanelia, akpara onyuñ okuk ebekpo oro esin, ebiet nsọñurua itiat emi ekotde emeral. 4 Mme ebekpo edip ye inañ efen ema ekanade ebekpo oro ekuk, emi mme mbuot edip ye inañ emi ekesinede mfia ọfọñ idem enyuñ eyara mme anyanya gold eketiede ke esit. 5 Ekepkep ye mme uyom ye mbumede obuma ema eto ke ebekpo oro ewọñọ. Mme utueneikañ itiaba ekesak ke iso ebekpo oro, emi edi mme Spirit Abasi itiaba. 6 Ñkpọ emi ekebietde akpainyañ emi ekesemde nte akrasi ama ada ke iso ebekpo oro. Se ikadade ikan ebekpo emi ikuk ekedi mme odu uwem ñkpọ inañ emi mme enyin ekeyọhọde idem mmọ ke iso ye ke edem. 7 Akpa odu uwem ñkpọ emi ekebiet ekpe, ọyọhọ iba ekebiet eyen enañ; ọyọhọ ita ekenyene iso nte iso owo; ndien ọyọhọ inañ ekebiet ntrukpom emi efede fe. 8 Kiet kiet ke otu mme odu uwem ñkpọ inañ emi ekenyene mme mba itiokiet, ndien enyin ọkọyọyọhọ mmọ idem ofuri ofuri, ke esit ye ke enyọñ tutu esim idak mba mmọ. Mmọ iketreke ndikwọ ikwọ ke uwemeyo ye ke okoneyo ete: "Edisana, Edisana, Edisana edi Ọbọñ Abasi andikpon ñkan, Emi okodude, Emi odude, emi edinyuñ idide."

9 Mme odu uwem ñkpọ inañ oro ekwọ ikwọ ubọñ, ukpono ye ekọm enọ Enyemi etiede ke ebekpo, emi odude uwem ke nsinsi nsinsi. Ke mmọ ema ekanam emi, 10 mme mbuot edip ye inañ oro eduọñọ ke isọñ ke iso Enyemi etiede ke-ebekpo, enyuñ etuak ibuot enọ Enyemi odude ke nsinsi nsinsi. Mmọ eduọñọ mme anyanya mmọ ke iso ebekpo oro, enyuñ edọhọ ete, 11 "Ọbọñ ñnyin ye Abasi ñnyin! Afo omodot ndibọ ubọñ, ukpono ye odudu, koro Afo okobot kpukpru ñkpọ, ndien edi ke uduak Fo ke ekenọ mmọ uduot mmọ ye uwem."