1 Nọ ñwed esọk enjel ufọk Abasi emi odude ke Efisọs ñnyuñ dọhọ enye ntem ete:

"Emi edi etop emi otode enye emi akamade mme ntantaọfiọñ itiaba ke ubọk nnasia esie, emi asañade ke ufọt mme ñkpọ uwukikañ gold itiaba oro.

2 Ami mọdiọñọ mme edinam fo, mme ñkpọsọñ utom fo ye nsinifik fo. Ami mọdiọñọ nte ke afo ukemeke ndiyọ mme oburobut owo, ndien ke ntre afo ọduñọde mme mmọ oro edọhọde ete ke mmimọ idi mme Ọbọsuru okut ete ke mmọ edi mme osu nsu. 3 Afo emesin ifik etieti, onyuñ okut ukut ke ntak mi, ndien afo ukufiakke edem.

4 Edi emi edi ndudue emi ñkutde nto fi: afo umaha mi aba nte afo akamade ke editọñọ. 5 Kere baña idaha emi afo akadade mbemiso afo ọduọ. Tua ñkpọfiọk, wọñọde kpọñ mme idiọkñkpọ fo, nyuñ fiak nam nte afo ekesinamde ke editọñọ. Ke midighe ntre, ke afo mutuaha ñkpọfiọk, unyuñ ukpọñ mme idiọkñkpọ fo, ami ñyedi ntiene fi ñnyuñ ntañ mme udiọkikañ fo mfep ke mme itie mmọ.

6 Edi se, emi edi se afo anamde ọfọn: afo amasua se mme mbon ñka emi ekerede Nikoletan enamde kpa nte Ami nsuade.

7 Edieke afo enyenede utọñ, kpañ utọñ ndien kop se Spirit ọdọhọde mme ufọk Abasi! Mme mmọ emi ema ekekan ke eñwan emi ke Ami ndinọ mmọ unen ndidia mfri eto uwem emi etibede ke iñwañ Abasi."

8 Wet nọ enjel ufọk Abasi ke Simina:

"Etop emi oto Enyemi edide Akpa ye Akpatre, emi akakpade ndien ọtọñọ ntak odu uwem.

9 Ami mọdiọñọ mme mfina mbufo, Ami mọdiọñọ nte ke mbufo edi ubuene, edi ke akpanikọ mbufo edi mme enyene inyene! Ami mọdiọñọ mme oburobut ikọ emi mme mmọ emi edọhọde ete idi mme Ju etiñde edian mbufo, edi mmọ idighe mme Ju, mmọ edi udim kiet emi edide eke Setan! 10 Ekukop ndik ebaña ukut emi edisimde mbufo. Ekpañ utọñ, Setan eyedomo mbufo ese ke edinam emum ubak mbufo esin ke ufọk ñkpọkọbi; ukut mbufo edibighi ke usen duop. Enam akpanikọ ye Ami, ekpededi ọkọsuñọ ke ñkpa; ndien Ami ñyenọ mbufo anyanya uwem. 11 Edieke mbufo enyenede utọñ ndikop ekop se Spirit etiñde ọnọ mme ufọk Abasi! Mme mmọ emi ekande, unọmọ udiana ñkpa idisimke mmọ."

12 "Wet nọ enjel ufọk Abasi emi odude ke Pekamum:

Emi edi etop emi otode Enyemi enyenede ofut iso iba emi ọsọpde. 13 Ami mọdiọñọ ebiet emi afo oduñde, do ke Setan enyene ebekpo esie, kpa ye ado afo ke osuk anam akpanikọ ye Ami. Afo ama esin ndikañ mi kpa ke idem ini emi ekewotde Antipas enyemi etiede ntiense akpanikọ abaña mi, emi ekewotde ke akwa obio mbufo, ke ebiet emi Setan oduñde.

14 Edi se mme ñkpọ ifañ emi ke mbiom mbufo ikpe: mme owo edu ke otu mbufo emi etienede ukpepñkpọ Balam, emi ekekpepde Balak nte atapde nditọ Isrel enam idiọkñkpọ ke edidia udia emi ewade enọ ndem, ye ke edinam use. 15 Ke ukem usuñ oro, mbufo ñko emenyene mme owo ke otu mbufo emi etienede ukpepñkpọ mbon emi ekotde mme Nikoletan.

16 Esana mme idiọkñkpọ mbufo eyak, ke midighe ntre Ami ñyedi ntiene mbufo idibighike, ñnyuñ ñwana ye mme mmọ oro ye ofut emi ọwọrọde mi ke inua.

17 Enye emi enyenede utọñ yak enye okop se Spirit ọdọhọde mme ufọk Abasi. Mme mmọ emi ekande ke Ami ndinọ ndedibe uyo Abasi. Ñyenyuñ nnọ owo mmọ kiet kiet afia itiat emi ewetde obufa enyiñ ke esit, emi owo baba kiet midiọñọke ke ebede Enyemi ọbọde itiat emi."

18 "Wet nọ enjel ufọk Abasi emi odude ke obio Tiatira:

Emi edi etop emi otode Eyen Abasi, emi enyin esie asakde nte ikañ, emi ukot esie ñko emireñde nte akpañkpañ emi etukde. 19 Ami mọdiọñọ se afo anamde. Ami mọfiọk ima fo, ye iwuk fo, ye utom fo, ye ime fo. Ami mọfiọk nte ke afo ke anam ñkpọ idahaemi akan nte afo akanamde ke akpa.

20 Edi, emi edi se ñnyenede mbaña fi. Afo amadara ñwan oro ekerede Jesibel, emi okotde idem esie isuñutom Abasi. Enye ekpep onyuñ ada mme isuñutom mi otun usuñ ekesin ke edinam use ye edidia udia emi ewade enọ mme ndem. 21 Ami mọnọ enye ini nditua ñkpọfiọk mbaña mme idiọkñkpọ esie, edi enye iyomke ndidiañade ñkpọñ ido use esie. 22 Ke ntre, ami ñyebiri enye ke ñkpọ nna udọñọ emi enye ye mme mmọ emi ekesinde efibe ye enye edibọde ndutuhọ eti eti. Ami ñyenam emi idahaemi, ke ebede mmọ etua ñkpọfiọk enyuñ ekpọñ mme oburobut ido emi mmọ ekenamde ye enye. 23 Ami ñyewot mme mbon nsaña esie, ndien do ke kpukpru mme ufọk Abasi edifiọk ete ke Ami ndi Enyemi ndiọñọde ekikere ye mme uduak esit mme owo. Ami ñyenọ owo mbufo kiet kiet utib nte asañade ekekem ye se enye anamde.

24 Edi ama edi mbufo eken ke Tiatira emi mitieneke idiọk ukpep emi, mbufo inyuñ ikpebeke se mme mmọ eken ekotde mme ndedibe ñkpọ Setan, Ami ndọhọ mbufo nte ke ami ndimenke mbiomo efen mbiom mbufo. 25 Edi ana mbufo esọñọ emum se mbufo ema ekenyenyene ekama tutu Ami ndi.

26 Enyemi akande, onyuñ akade iso ndinam uduak mi tutu esim utit, Ami ñyenọ enye unen ndikara mme idut. 27 Enye eyeda esañ ukwak akara mmọ, onyuñ asuan mmọ mbai mbai nte abañ mbat, kpa nte Ami mbọde odudu ukara ke ubọk Ete mi. 28 Ami ñyenọ enye ñko ntantaọfiọñ usiere.

29 Enye emi enyenede utọñ, yak enye okop se Spirit ọdọhọ mme ufọk Abasi."