1 Do ndien ke ñkekut nte idiọk unam kiet ọwọrọde ke akwa akpainyañ edi. Enye enyene mme nnuk duop ye ibuot itiaba, ye anyanya ke nnuk esie kiet kiet, ndien ewet enyiñ emi asabarede Abasi ke mme ibuot esie. 2 Idiọk unam emi ami ñkokutde ekebiet anawuri ekpe, ye ukot emi ebietde ukot usimekpe, ndien inua esie ebiet eke ekpe. Urukikọt enyene mba emi ama ayak odudu esie ọnọ idiọk unam emi, ye ebekpo esie, ye ofuri ubọñ ukara esie.

3 Eketie nte ke ema ewot ibuot esie kiet oto ke unan, edi unan oro okowotde enye ama akpa. Ofuri ererimbot ema edu ke ñkpaidem ndien enyuñ etiene idiọk unam emi. 4 Mme owo ema etuak ibuot enọ urukikọt enyene mba oro koro enye ama ọnọ idiọk unam oro odudu esie. Mmọ ema enyuñ etuak ibuot enọ idiọk unam oro ñko, enyuñ edọhọ ete, "Anie etie nte idiọk unam emi? Anie ekeme ndiñwana ye enye?"

5 Ema enọ idiọk unam emi odudu nditiñ mme nsionsio enyene ndik ye oburobut ikọ enyuñ enọ enye unen ndikara ke ọfiọñ aba ye iba. 6 Enye ama ọtọñọ ndisuñi Abasi, ye enyiñ Esie, ye ebiet emi Enye oduñde, ye kpukpru mme mmọ emi eduñọde ke enyọñ. 7 Ema enọ enye odudu ndiñwana ye ikọt Abasi ye ndinyuñ ñkan mmọ. Ndien ema enọ enye odudu ndikara kpukpru ekpuk, ye idut, ye usem, ye oruk. 8 Kpukpru owo emi eduñde ke isọñ eyetuak ibuot enọ enye, oro edi, owo kiet kiet emi mikewetke enyiñ esie isin ke ñwed uwem emi enyenede Eyen Erọñ emi ekewotde, mbemiso ekebobot ererimbot.

9 Enye emi enyenede utọñ ndikop, yak enye okop. 10 "Eyemum enye emi akanade nte emum, eyewot enye emi akanade nte ewot ke akañkañ." Ntem eyom ime ye mbuọtidem ke otu ikọt Abasi.

11 Mma ntọñọ ntak ñkut idiọk unam efen nte ọwọrọde ke isọñ edi. Enye ekenyene nnuk iba nte nnuk eyen erọñ, ndien enye ama etiñ ikọ nte urukikọt enyene mba. 12 Enye akada odudu akpa idiọk unam oro anam ñkpọ onyuñ enyik ererimbot ye mme andiduñọ ke esit etuak ibuot enọ akpa idiọk unam oro, emi unam emi okowotde enye ama akakpa. 13 Udiana idiọk unam emi ama anam mme ikpọ ñkpọ ñkpaidem; enye ama anam ikañ oto ke enyọñ ọsuhọde edi ke isọñ ke iso kpukpru owo. 14 Ndien enye ama abiaña kpukpru mme mmọ emi eduñọde ke isọñ oto ke mme utibe ñkpọ emi ekenọde enye ukeme ndinam ke iso akpa idiọk unam oro. Idiọk unam emi ama enyik kpukpru owo emi eduñọde ke ererimbot ndibot mbiet ñkpọ ndida ñkpono idiọk unam oro ekenọde enye unan ke akañkañ edi enye ke osuk ododu uwem. 15 Ema enọ ọyọhọ idiọk unam iba emi odudu ndiduọk ibifik uwem nsin ke edibobot mbiet akpa idiọk unam oro, man otodo edibobot mbiet idiọk unam emi ekeme nditiñ ikọ ñnyuñ ñwot kpukpru mmọ emi midituakke ibuot inọ enye.

16 Idiọk unam emi ama enyik kpukpru owo, ñkpri ye ikpọ, mme enyene ñkpọ ye mme ubuene, ofin ye eyen, ndinyime emiñ mmọ idiọñọ ke ubọk nnasia mmọ, ye ke ekoiso mmọ nde. 17 Owo baba kiet idikemeke ndidep mme ndinyanyam ke mibọhọke enye enyene idiọñọ emi, oro edi, enyiñ idiọk unam oro mme ibat emi adade ọnọ enyiñ esie. 18 Emi oyom ọniọñ. Owo kiet ekededi emi enyenede ifiọk ekeme ndidiọñọ se ibat idiọk unam emi ọwọrọde, koro ibat oro ada ọnọ enyiñ owo ndien ibat oro edi ikie itiokiet ye ata ye itiokiet (666).